Ads by Google Ads by Google

Tala otooto mai le Fa’amasinoga


[ata: SN]
ausage@samoanews.com

TAUMALOTO AIAVA

 

Ua poloaina e le Fa’amasinoga Maualuga le ali’i o Taumaloto Aiava, ina ia ona tuua vave loa Amerika Samoa ma aumau ai i fafo atu mo le umi e 5 tausaga o lana nofovaavaaia, ina ua fa’amalieina le fa’amasinoga i mau sa tuuina atu e le malo, e lagolago ai le le usita’i o Aiava i tuutuuga o lana nofovaavaaia sa tu’uina atu i le 2014.

 

O se tasi o tuutuuga o le nofovaavaaia a le ua molia na tuuina atu i le 2014, o le totogi lea o lana salatupe i le fa’amasinoga. Ae ina ua le fa’amaoni le ua molia e totogi lana salatupe, na talosagaina ai loa e le Ofisa Nofovaavaaia le Fa’amasinoga mo sana poloaiga e sailia mai ai le ua molia.

 

E tele masina o tau sailia e le fa’amasinoga le ua molia, ma fa’atoa maua ai loa i le masina o Tesema o le tausaga na te’a nei, ma pu’e fa’apagota ai loa ae taofia i le toese i Tafuna e fa’atali ai le aso e lau ai lana fa’asalaga.

 

O le vaiaso na te’a nei na tuuina atu ai loa le fa’aiuga a le fa’afmasinoga fa’asaga i lenei ali’i.

 

Na faatoese le ua molia i le fa’amasinoga e tusa ai o lona le usitaia o lana poloaiga, ma ia talosagaina ai se isi avanoa mo ia se’i toe fo’i atu ai i tua e mafuta i lona aiga aemasie lona atali’i. Sa ia ta’utino fo’i i le fa’amasinoga, o le a saili sana galuega e totogi ai lana salatupe.

 

Na talosaga le loia a le ua molia ia Douglas Fiaui i le fa’amasinoga, mo se isi avanoa e tu’u atu ia Aiava e saili ai sana galuega e totogi ai lana salatupe. Na faailoa e Fiaui i le fa’amasinoga e fa’apea, sa usita’i le ua molia i poloaiga uma lava o lana nofovaavaaia, se’i vagana ai lava le poloaiga o le totogi o lana salatupe ua faatamala ai o ia, ona o le tupe uma sa ia te ia, sa fa’aalu lea e tausi ai si ona atali’i.

 

Saunoa le fa’amasino sili ia Michael Kruse e fa’apea, ina ua mae’a ona latou iloiloina ma ona uso a Fa’amasino le faila a le ua molia, na iloa ai le tele o avanoa sa tuuina atu e le fa’amasinoga ia te ia, ma o ni isi o ia avanoa e aofia ai le taofia lea o lona tuliina o fa’asalaga fa’a falepuipui.

 

Peita’i e foliga mai i le silasila a le fa’amasinoga, e leai se fa’aaloalo o lenei alii i le fa’amasinoga, atoa ai ma lona le fa’aaoga tatau o avanoa ua tuuina atu.

 

O le faaiuga la a le fa’amasinoga, o le a leai se isi faaiuga e faaleaoga ai lana nofovaavaaia, ae o le a faamalosia loa le poloaiga lona 3 o lana nofovaavaaia sa tuuina atu i le 2014, o lona tuua lea o Amerika Samoa ma aumau ai i fafo atu mo le umi o lana nofovaavaaia e 5 tausaga.

 

TAO LIU

 

O le ali’i Asia lea na tu’uaia i lona umia faasolitululafono o fualaau faasaina faapea se a’upega, ua ia ta’utino i le fa’amasinoga e fa’amaonia tuuaiga fa’asaga ia te ia. O le vaiaso na te’a nei na ta’usala ai e le fa’amasinoga maualuga ia Tao Liu i moliaga o le umia faasolitulafono o fualaau faasaina o le aisa, umia faasolitulafono o fualaau faasaina o le mariuana, umia o se fana e lei laiseneina, atoa ai ma lona sola ese mai i le toese i Tafuna.

 

I le tali ioe ai o Liu i moliaga e pei ona ta’usala ai o ia e le fa’amasinoga, sa ia tautino ai e fa’apea, i se taimi o le aso 21 Aokuso 2016 i Amerika Samoa, sa ia umia faasolitulafono ai vaega o le fualaau fa’asaina o le aisa ma le mariuana, atoa ai ma lona umia o se a’upega e lei lesitalaina.

 

Sa ia tautino fo’i e faapea, a o taofia ai o ia i le toese i Tafuna i le masina o Oketopa 2016 e fa’atali ai le faaiuga o lana fa’amasinoga, na ia sola ese ai i tua e aunoa ma se fa’atanaga.

 

Na ta’utino Liu e fa’apea, o lana solitulafono sa faia i lea aso sa le tusa lea ma ala o le tulafono. Ua malamalama le ua molia, e le mafai ona toe suia lana tali ioe ua tuuina atu i le fa’amasinoga, pe afai e tuuina atu se faaiuga a le fa’amasinoga ae le tusa ai ma lona mana’o.

 

O lo o taofia pea Liu i le toese i Tafuna e fa’atali ai le aso 20 Aperila lea ua fa’atulaga e lau ai lana fa’asalaga.