Ads by Google Ads by Google

Tala otooto mai le Fa’amasinoga


[ata: SN]
ausage@samoanews.com

ONOSA’I FILIPO

 

O le aso Tofi o le vaiaso fou lea ua toe tolopo i ai le mataupu a le ali’i o Onosa’i Filipo, mo le fa’ataunu’uina o lana iloiloga faapitoa ma iloa tonu ai le tulaga o le a oo i ai lana mataupu, pe toe auina atu o ia i Samoa, pe fa’aauau pea ona aumau o ia i le teritori mo le fa’amae’aina o aso o lana pemita e 30 aso o lo o totoe na malaga mai.

 

E le i atoa se vaiaso talu ona taunu’u Filipo i Amerika Samoa, ae a’afia loa o ia i le tulafono, ina ua faia sa latou fusuaga ma ni isi o ali’i i le mae’a ai lea o se latou inugapia sa faia i Nuuuli.

 

Na fa’ai’u puta le inugapia ina ua togi e Filipo le ali’i na a’afia i le fagupia ma manu’a ai lona ulu. O Filipo na taunu’u mai i le aso Lua o le vaiaso na te’a nei, ae o le faaiuga o le vaiaso lava na te’a nei na a’afia ai o ia i le tulafono.

 

O ni isi o fautuaga ua tuuina atu e le Fa’amasinoga ia Filipo e usita’i ai, o le aua lea ne’i ona toe soli se tulafono, a ia usita’i uma i tulafono a le malo e aofia ai tulafono a le Ofisa o Femalagaaiga.

 

Afai ae musu le sponsor a Filipo e fa’aauau pea ona toe nofo o ia i le teritori mo aso o lo o totoe o lana pemita, lona uiga o le a fa’amalosia loa le toe fa’afo’i o ia i Samoa i le vaiaso fou.

 

TU’UAIA NI ALI’I SE TO’ALUA I LE SAUAINA O LA TA’ITO’ALUA

 

E to’alua ni ali’i na taofia e Leoleo i le fa’aiuga o le vaiaso na te’a nei, ona o tu’uaiga i lo la fa’ao’olima lea i o la ta’ito’alua a o la tagofia le ‘ava malosi. O le isi ali’i e 36 tausaga le matua mai Leone, lea o lo o tu’uaia i le faaoolima i le tulaga tolu ma le faia o sauaga fa’asaga i fafine, ae o le isi ali’i e 43 tausaga le Pago Pago, lea o lo o tu’uaia i le faaoolima i le tulaga tolu atoa ai ma le faaleaga meatotino i le tulaga tolu.

 

O le po o le aso Faraile na vili ai e le fafine mai Leone le Ofisa o Leoleo mo se fesoasoani, i le mae’a ai lea ona faaoolima lona to’alua ia te ia. Na taua e le fafine i Leoleo e fa’apea, o le la vevesi ma lona to’alua na amata mai ina ua manava atu le ua molia e le o i ai se mea’ai i le fale, ma amata ai loa ona faamisamisa atu lona to’alua ia te ia.

 

Na faia se la taugaupu pe tusa ma le 10 minute le umi, ma i’u ai loa i le tago atu o lona to’alua ma futi mai lona ulu ae ta tu’i ona foliga, a o matamata i ai lana fanau e to’alua. Na fa’aauau gaioiga a le ua molia i lona ta tu’i o foliga o lona to’alua, atoa ai ma le kiki o lona papatua ao ta’atia o ia i lalo.

 

E le o se taimi muamua lenei ua faia ai e le ua molia uiga nei i lona to’alua, e pei ona fa’amatala e le fafine i Leoleo.

 

Mo le ali’i na taofia mai e Leoleo i Pago Pago, o le vevesi na tula’i mai ina ua alia’e se misa a le ulugali’i i le vaega e paka ai ta’avale i luma o se faleoloa i le po o le aso Toona’i. Na fai tetele le misa a le ulugali’i, ma i’u ina tu’i ai loa e le ua molia lona to’alua i totonu o le ta’avale, a o paka ai i tafatafa o le la ta’avale le ta’avale a se Leoleo o lo o ofu savili.

 

Na fa’afesootai e le Leoleo ofu savili le ofisa o Leoleo i Fagatogo mo se fesoasoani, ma aga’i atu ai loa Leoleo e tali i le valaau, peita’i e taunu’u atu ua alu ese le ta’avale a le ua molia ma lona to’alua.

 

E le i atoa se 20 minute talu ona toe fo’i ane Leoleo i le Ofisa i Fagatogo, ae taunuu loa se telefoni mai se molimau i Pago Pago, ma talosagaina ai se fesoasoani i se ali’i o lo o ia fasi lona to’alua i luma o le latou fale. Na taunu’u Leoleo ma iloa ai, o le ulugali’i tonu lava lea na ripotia le vevesi i luma o se Faleoloa i se taimi e lei mamao atu.

 

Na taua e le fafine na a’afia i Leoleo e fa’apea, o le vevesi na mafua mai ina ua ita loa to’alua i lona le tuuina atu o se tupe e fa’atau ai ni a latou fagupia ma ana uo. Ae na fa’ailoa i ai e le fafine i lona to’alua, e le o lava se latou tupe e fa’atau ai ni ana pia, toe lava o le tupe e fa’atau ai le meaai a le la fanau mo le faaiuga o le vaiaso.

 

Na teena e i laua e to’alua tu’uaiga a le malo fa’asaga ia tei laua, ma ua poloaina i laua ina ia saili ni fale e nonofo ai, e fa’atali ai taualumaga o a laua mataupu, ua fa’asa ona la toe nonofo i le fale o lo o nonofo ai a la ta’ito’alua ma fanau.