Tala otooto mai le Fa’amasinoga


[ata:SN]
ausage@samoanews.com

FAAMAONIA MOLIAGA O LE GAOI

 

O le ali’i e 23 tausaga le matua mai Iliili lea na tu’uaia i lona gaoia o se ola mai totonu o se faleoloa Asia, ua ia ta’utino i le Fa’amasinoga e fa’amaonia tu’uaiga fa’asaga ia te ia. I le tali ioe ai o Fetui Valaau i le moliaga mama o le gaoi atoa ai ma le moliaga mama o le sola ese ma Leoleo, sa ia ta’utino ai e fa’apea, i se taimi o le aso 21 Oketopa i Amerika Samoa, sa ia ulufale ai i totonu o se faleoloa Asia ma le fa’amoemoe e fa’atino ai le solitulafono o le gaoi.

 

A o i ai o ia i totonu o lea faleoloa, sa ia fa’atauina ai se fagupia valima se tasi, ae nana i totonu o lona ofu ni apa meaai ma le fa’amoemoe na te gaoia, ae aunoa ma se fa’atanaga mai le pule o le faleoloa. Na ta’utino fo’i le ua molia, na te lei totogiina se tupe mo le tau o apa meaai sa ia gaoia.

 

Ina ua taunu’u Leoleo ma taumafai e taofi o ia, sa ia alu i le atoa ma fai ai loa a latou tuliga ma Leoleo. Mulimuli ane, na maua o ia ma taofia ai loa i le toese. E 30 aso lea ua faasala ai e le Fa’amasinoga Fa’aitumalo ia Valaau i le toese i Tafuna, o se tasi lea o tuutuuga o lana nofovaavaaia e 24 masina e ao ona usita’i i ai.

 

Ua poloaina o ia ina ia aua nei toe alu i le faleoloa na tula’i mai ai le solitulafono, fa’asa ona ia toe tagofia le ‘ava malosi, atoa ai ma lona totogi o le salatupe e $100 i le Fa’amasinoga.

 

TOLUPO HODGES

 

O le vaiaso fou lea ua fa’atulaga e tu’uina atu ai se fa’aiuga a le Fa’amasinoga Maualuga fa’asaga ia Tolupo Hodges, ina ua fa’amalieina ali’i fa’amasino ua le usita’i le ua molia i tuutuuga o lana nofovaavaaia.

 

O le vaiaso na te’a nei na faia ai se iloiloga faapitoa a Hodges i luma o le Fa’amasinoga Maualuga, ona o se tagi ua faaulu e le Ofisa Faanofovaavaaia, i le le usitaia lea e le ua molia o tuutuuga o lana nofovaavaaia. O ni isi o ia tuutuuga e aofia ai le le toe alu atu e asi le Ofisa Faanofovaavaaia, atoa ai ma le le totogiina o lana salatupe.

 

Na taua e le Pule o le Ofisa Faanofovaavaaia i lana molimau tauto i luma o le Fa’amasinoga e fa’apea, o le tausaga e 2010 na faamaonia ai e le fa’amasinoga maualuga le moliaga o le umia faasolitulafono e Hodges o fualaau faasaina, ma faanofovaavaaia ai loa o ia mo le 10 tausaga i lalo o tuutuuga e ao ona usita’i i ai. O le tausaga e 2020 fa’atoa mae’a ai le nofovaavaaia a le ua molia.

 

O ni isi o ia tuutuuga o lana nofovaavaaia e aofia ai le alu e vaai le ofisa faanofovaavaaia, faasa ona ia toe tagofia le ‘ava malosi poo fualaau fa’asaina, atoa ai ma le faia o ni suega i lona tino e faamaonia ai poo ia fa’aaogaina fualaau fa’asaina ma le ava malosi.

 

Talu mai le tausaga e 2015 seia oo mai i le masina na te’a nei, e le i toe oo lava le ua molia e asi le Ofisa Faanofovaavaaia. Na faamalieina le fa’amasinoga i mau ua tuuina atu e le Ofisa Faanofovaavaaia, e tusa o le le usitaia e Hodges o tuutuuga o lana nofovaavaaia.

 

O lo o taofia pea Hodges i le toese i Tafuna e fa’atali ai le aso lea ua fa’atulaga e tu’uina atu ai se fa’aiuga a le fa’amasinoga e tusa ai o le mataupu lea ua faamaonia ai lona le usitaia o poloaiga o lana nofovaavaaia.

Comment Here