TU’UAIA SE ALI’I I LE FAIA O SAUAGA I LONA TO’ALUA

O le ali’i mai Vaitogi lea na taofia mai e Leoleo ona o tu’uaiga i lona faia lea o sauaga i lona to’alua, e aofia ai le taumafai e faia i ai ni uiga tau fa’amata’u, ua poloaina o ia e le Fa’amasinoga Fa’aitumalo e aua ne’i ona toe taumafai i se isi lava auala e toe faia ni gaioiga e fa’amata’u pe fa’afefe ai lona to’alua, a o fa’agasolo ai taualumaga o lana mataupu.

O le fa’alavelave lenei na tula’i mai le faaiuga o le vaiaso na te’a nei, ina ua logo e le Tina na a’afia le Ofisa o Leoleo i Tafuna mo se fesoasoani, i le mae’a ai lea ona tula’i mai o le vevesi i le va o ia ma lona to’alua.

Na taunu’u Leoleo i le vaega tonu na tula’i mai ai le fa’alavelave, peita’i na fiu e saili le ua molia ua le iloa poo fea ua sola i ai. Ae i ni nai itula mulimuli ane ai, na manatu ai le ua molia e alu e momoli aloaia o ia i aao o ali’i ma tama’ita’i Leoleo, ina ia fa’a faigofie ai le mataupu.

Na fa’ailoa e le Tina na a’afia i Leoleo le tele o se suiga i lo la aiga, talu lava ona a’afia lona to’alua i fualaau fa’asaina, ma o ni isi o taimi ua ia molimauina ai ni suiga e fou i lana vaaii le amio a lona to’alua.

O ni isi o tuutuuga ua tatala ai i tua le o lo o molia, o le fa’asa lea ona toe alu i lo latou aiga i Vaitogi, fa’asa ona taumafai e fa’afesootai lona to’alua i soo se auala, fa’asa fo’i ona ia toe faia i ai ni gaioiga e fa’amata’u pe fa’afefe ai o ia.

Na faailoa e le itu a le malo i le Fa’amasinoga, le fa’aauau pea o a latou suesuega e uiga i le mataupu na tula’i mai, ma e le o mautinoa i le taimi nei pe i ai ni moliaga fa’aopoopo latou te faila fa’asaga i le ua molia.

FALEPUIPUI LE ALI’I GAOI

E 30 aso lea ua faasala ai e le Fa’amasinoga Faaitumalo se ali’i talavou e 18 tausaga le matua, ina ua fa’amaonia e le Fa’amasinoga le moliaga mama o le gaoi na tu’uaia ai o ia e le malo. I le tali ioe ai o le ali’i o Ben Iosefa Tiapula i le moliaga e pei ona ta’usala ai o ia, na ia ta’utino ai e fa’apea, i se taimi o le masina o Oketopa na te’a nei, sa ia gaoia ai ni meatotino mai le fale o lana uo sa nofo ai.

Na taua e Tiapula e fa’apea, o ia sa nofo i le fale o lana uo mo se taimi umi. A o nofo ai i le fale o lana uo, sa ia ulufale ai i totonu o le potu o le Tina a lana uo ma gaoi mai ai ni meatotino e pei o se sipika, telefoni ma se ato, ona ia sola ese ai lea mai le aiga na a’afia. Na saili e Leoleo le ua molia ma toe maua ai meatotino na gaoia, ma ua mae’a ona toe fa’afo’i atu i le aiga na a’afia.

O se tasi o itu na faamamafa e le afioga i le ali’i Fa’amasino ia Fiti Sunia i le taimi na lau ai le fa’asalaga a Tiapula, o le leai lea o se isi o lona aiga e aofia ai ona matua na alu atu e lagolago o ia i taimi uma na faagasolo ai lana mataupu, ma ua foliga mai ai, e le o i ai se tulaga e fa’ataua ai e matua le ua molia i totonu o le aiga.

E 30 aso le umi lea ua faatonu e le Fa’amasinoga ia Tiapula e taofia ai o ia i le toese. Afai ae toe molia o ia i se isi solitulafono ma faamaonia e le Fa’amasinoga, o le a fa’aluaina le umi lea ua ia tuliina nei i se isi fa’asalaga i le lumana’i.