Tala otooto mai le Fa’amasinoga


[ata: SN]
ausage@samoanews.com

FA’AVAE MAMONA

 

O le ali’i lea o lo o tuli sana fa’asalaga fa’a falepuiupui i le toese i Tafuna, ina ua fa’amaonia e se vaega iloilo iuga tu’uaiga fa’asaga ia te ia i le fa’alavelave lea na maliu ai lona to’alua, ua ia talosaga i le fa’amasinoga maualuga ina ia fesoasoani atu i le tau tu’u fa’atasiga o lana talosaga e apili ai le faaiuga e pei ona ia nofosala ai.

 

Ua taoto atu nei i se fa’aiuga a le afioga i le Fa’amasino Sili ia Michael Kruse ma lona soatau ia Muasau Tasina Tofili le talosaga a le ua molia.

 

O le vaiaso na te’a nei na toe oo atu ai Mataupu Mamona ma lana loia i luma o le fa’amasinoga maualuga, ona o se talosaga a le ua molia e fa’ataga ai e le fa’amasinoga ona ia mauaina kopi o fa’amaumauga tusitusia uma o lana fa’amasinoga autu sa faia i le amataga o le tausaga nei, e aunoa ma se tupe na te totogiina i le fa’amasinoga.

 

Na taua e le loia a Mamona ia Douglas Fiaui e fa’apea, e taugata le tupe e totogi e le ua molia mo kopi o fa’amaumauga uma o lana fa’amasinoga autu sa faia. O le fa’afitauli o lo o i ai, e le o i ai sana galuega e maua ai se tupe, ona o loo taofia o ia i le toese mo le tuliina o lana fa’asalaga.

 

Na fa’ailoa e Fiaui i le fa’amasinoga aia tatau e agava’a ai le ua molia, atoa ai ma le avanoa e mafai ai e le Fa’amasinoga ona fa’aagafua ni tau e totogi mo ia fa’amaumauga.

 

Na fa’ailoa e Kruse ia Fiaui e fa’apea, o le mataupu a Mamona sa iloiloina e le vaega iloilo iuga, o i latou fo’i ia sa fa’afofoga toto’a i molimau uma o le mataupu, ma latou tuuina mai ai loa le fa’aiuga e  nofosala ai o ia.

 

E 30 tausaga lea o lo o tuliina nei e Mamona i le toese i Tafuna, ina ua ta’usala o ia i le moliaga o le faaoolima i le tulaga muamua. O lea moliaga na afua mai i le fa’alavelave lea na tu’uaia ai o ia, i lona faaoolima lea i lona to’alua i totonu o le potu, e ala i lona titina o lona ua a o matamata atu i ai lona atali’i e 9 tausaga i se pu sa i le ‘au o le faitoto’a o le potu.

 

VIALI LOLOGA

 

E 45 aso lea ua faasala ai e le fa’amasinoga faaitumalo le ali’i o Viali Lologa e taofia ai i le toese i Tafuna, o se tasi lea o tuutuuga o lana nofovaavaaia e 12 masina le umi, ina ua ta’usala o ia i le moliaga o le faaoolima i le tulaga tolu, atoa ai ma le fa’atupu vevesi i nofoaga faitele.

 

O se vevesi na tula’i mai i le va o aiga e lua, na mafua ai loa ona tula’i mai i le misa i le va o Lologa ma le ali’i na a’afia, ina ua ia fa’aaoga ona lima e ta tu’i ai foliga o le ali’i na a’afia ma manu’a ai o ia. Sa ia folafola foi i ai ni folafolaga e fa’amata’u ai le saogalemu o lea ali’i.

 

Na faailoa e le Fa’amasinoga ia Lologa e fa’apea, e le o le fa’aaogaina o le malosi e foia ai se fa’afitauli, ae tatau ona saili se fesoasoani mai le malo. O le tali o le tagata na te fa’aaoga lona malosi e foia ai ni fa’afitauli, o le taofia lea i le toese mo se taimi umi.

 

Ua fautuaina fo’i e le Fa’amasinoga ia Lologa ina ia tausi le filemu i le va o lona aiga ma le aiga o le ali’i na a’afia, pe afai ae magalo mai i tua i le toese.

 

Ua faasa ona ia toe tagofia le ‘ava malosi poo fualaau fa’asaina, o le a faia fo’i ni suega i lona tino ina ia faamaonia ai na te le o tagofia fualaau fa’asaina.

Comment Here