Tala otooto mai le Fa’amasinoga


[ata: SN]
ausage@samoanews.com

TU’UAIA SE ALI’I AVE TAXI I LE FA’AO’OLIMA

 

O le ali’i ave taxi e 46 tausaga le matua mai Pava’ia’i lea na tu’uaia i lona fa’ao’olima i se ali’i na oso i fafo ma lana ta’avale e aunoa ma se pasese na totogi, ua tu’uaia nei o ia e le malo i moliaga mama e tolu, lea e aofia ai le fa’atupu vevesi i nofoaga faitele, fa’ao’olima i le tulaga tolu atoa ai ma le faia o folafolaga tau fa’amata’u.

 

O le vaiaso nei na tula’i ai le susuga a Uilisone Fepulea’i ma tete’e i tu’uaiga a le malo, ina ua valaau lana ulua’i iloiloga i le vaiaso nei. I le mae’a ai ona fa’amauina o lana tali tete’e i le fa’amasinoga, ua toe tolopo ai loa e le fa’amasinoga lana mataupu e toe valaau i le masina fou o Tesema.

 

O le fa’alavelave na tula’i mai i Tafuna ina ua mae’a ona momoli e le ave taxi le ali’i na a’afia i se tasi o faleoloa, ma le fa’amoeoe e faatali atu le taxi i fafo ae alu lana pasese i totonu e fai le fa’atau.

 

Ae i le silia ai ma le itula o tu pea le taxi a le ua molia i fafo, na oso ai loa lona masalosalo ua sola lana pasese. Na alu le ua molia i totonu o le faleoloa e saili lana pasese ma iloa ai, ua sola o ia ae lei totogia sona pasese.

 

O le afiafi o le aso lava lea i le vaiaso na te’a nei na toe vaaia ai e le ave taxi lana pasese sa sola o inu ma ni isi o ali’i i taufatafa o se faleoloa i Tafuna. E lei toe fa’atali le ave taxi ae na afe i ai lana taxi ma fa’ao’olima loa i le ali’i na a’afia, ma vili ai loa e tagata sa i ai i le taimi lea Leoleo mo se fesoasoani.

 

O ni isi o tuutuuga ua tatala ai e le Fa’amasinoga ia Fepulea’i i tua mai le toese e fa’atali ai le aso e toe tula’i ai mo le isi ana iloiloga, o le fa’asa lea ona ia toe taumafai e fa’afeso’ota’i le ali’i na a’afia, fa’asa fo’i ona ia toe solia se tulafono a le malo.

 

JOE TOGITOGI

 

O le aso 13 o Tesema lea ua fa’atulaga e tuuina atu ai le fa’asalaga a le ali’i o Joe Togitogi, i le mae’a ai lea ona talia e le fa’amasinoga maualuga i le taeao ananafi o lana tali ioe e tusa ai o le moliaga na tu’uaia ai o ia e le malo.

 

O Togitogi na tu’uaia e le malo i le moliaga mamafa o le sola ese mai le toese ao tuli ai sona fa’asalaga, o le moliaga lava fo’i lea na tali ioe ai o ia i lalo o se maliliega na latou sainia ma le malo, ma ua talia fo’i e le fa’amasinoga maualuga.

 

I le tali ioe ai o Togitogi i le moliaga e pei ona ta’usala ai o ia, na ia ta’utino ai e fa’apea, i se taimi o le aso 16 Aperila o le tausaga na te’a nei, na ia sola ese ai mai le toese i Tafuna ao taofia ai o ia mo le tuliina o lana fa’asalaga e 5 tausaga, ina ua fa’amaonia e le fa’amasinoga maualuga le moliaga o le fa’aoolima na tuuaia ai o ia.

 

O le moliaga mamafa o le sola ese mai le toese, e mafai ona fa’asala ai se tasi i le falepuipui mo le umi e le silia i le 5 tausaga, pe faasala foi i le salatupe e le silia i le $5,000.

 

Ua talosaga le malo i le fa’amasinoga ina ia lava tausaga e 3 e fa’asala ai Togitogi i le falepuipui mo le solitulafono lea ua ta’usala ai o ia, o le sola ese lea mai totonu o le toese.

 

O lo o taofia pea Togitogi i le toese i Tafuna e fa’atali ai le aso lea ua fa’atulaga e tu’uina atu ai lana fa’asalaga e le fa’amasinoga.

Comment Here