Tala otooto mai le Fa’amasinoga

ausage@samoanews.com

PELETI VAIMAUGA

 

Ua tuuaia nei e le malo le ali’i o Peleti Vaimauga i le moliaga mamafa o le gaoi, e mafua mai i le fa’alavelave lea na ia gaoia ai ni meatotino a se aiga latou te tuaoi i le masina o Iulai o le tausaga nei.

 

E pei ona taua i fa’amaumauga a le fa’amasinoga e fa’apea, o meatotino a le aiga o lo o tuuaia na gaoia e Vaimauga e aofia ai ni mea faigaluega inisinia, o seevae faigaluega fou faapea ai ma se telefoni. E silia i le $100 le tau o meatotino o lo o tu’uaia e le malo ia Vaimauga sa ia gaoia.

 

O meatotino sa i luga o se ta’avale pikiapu sa paka i luma o le fale o le aiga. O le afiafi ao pisi le aiga na a’afia i le latou fa’alavelave, o lo o tuuaia ai le aga’i atu o Vaimauga ma aveese mai se ato sa i ai seevae ma le telefoni sa i tua o le pikiapu. Sa ia aveesea ai fo’i ma meafaigaluega e fa’atino ai galuega inisinia.

 

E 2 vaiaso talu ona taumafai le aiga e saili mea faigaluega na leiloloa, ae fa’afuase’i ona aga’i atu se ali’i inisinia ma fa’ailoa atu i ai, o loo i lona fale inisinia mea faigaluega na alu atu Vaimauga ma fa’atau atu ia te ia.

 

O ni isi o tuutuuga o lo o tatala ai Vaimauga i tua e aofia ai le fa’asa lea ona toe alu i le fale o le aiga na a’afia, fa’asa fo’i ona ia toe soliina se tulafono, a ia avea o ia ma tagatanu’u lelei e tausisi i tulafono a le malo i soo se taimi.

 

WILLIAM FINAUGA

 

Ua molia nei e le malo le ali’i o William Finauga i le moliaga mamafa o le ave ta’avale a o se’i lona laisene. O le solitulafono o le vaega D lea o solitulafono mamafa, lea e mafai ona fa’asala ai se tasi i le toese mo le umi e le sili atu i le 5 tausaga, pe fa’asala fo’i i le salatupe e le sili atu i le $5,000, poo le fa’asala fo’i i fa’asalaga uma ia e lua.

 

O le moliaga ua faia faasaga ia Finauga na alia’e mai i le fa’alavelave lea na taofia ai e Leoleo se taavale pikiapu i Iliili i le masina na te’a nei, ina ua maitauina le soona alu saoasaoa i vaega o le alatele e le tatau ai ona soona alu saoasaoa se ta’avale.

 

Na taofi e Leoleo le ta’avale ma iloa ai o Finauga le ave ta’avale. Ae ina ua fesiligia o ia i le mafuaaga o le soona alu saoasaoa o lana ta’avale, na taua ai e le ua molia lona natinati e piki mai lona afafine mai le aoga ua ma’i.

 

Na fesili leoleo i le laisene a le ua molia, peita’i sa pepelo i ai le ua molia o loo i le fale. Ao fa’agasolo pea suesuega, na iloa mulimuli ane ai, o lo o se’i le laisene a Finauga mo le 6 masina, e mafua mai i le fa’alavelave lea na ta’usala ai o ia e le fa’amasinoga faaitumalo i le moliaga o le ave ta’avale ‘ona.

 

O le masina fou o Oketopa lea ua tolopo i ai le mataupu a Finauga, ma ua poloaina e le fa’amasinoga le fa’asa lea ona ia toe fa’afoeina se ta’avale a o fa’agasolo ai taualumaga o lana mataupu.

 

Afai ae ta’usala e le fa’amasinoga ia Finauga i le moliaga e pei ona tu’uaia ai o ia, o lo o fa’atulaga mai e le tulafono le faamalosia lea o lona tuliina o le umi e 90 i le falepuipui.

Comment Here