Ads by Google Ads by Google

Tala otooto mai le Fa’amasinoga


[ata: archive]
ausage@samoanews.com

LEUPENA ITELE

 

Ua taoto atu nei i se fa’aiuga a le fa’amasinoga maualuga le maliliega aufa’atasi lea ua mae’a ona sainia e le malo ma le itu a le ali’i o Leupena Itele.

 

E 2 moliaga mamafa na ulua’i tu’uaia ai e le malo ia Itele, o le moliaga o le talepe fale i le tulaga muamua atoa ai ma le moliaga o le gaoi, ae i lalo o le maliliega aufa’atasi lea ua mae’a ona sainia e itu e lua, ua malie ai le ua molia e tali ioe i le moliaga o le gaoi.

 

I lona tali ioe ai i le moliaga o le gaoi, ua ia ta’utino ai e fa’apea, i se taimi o le po o le aso 16 Tesema 2016, sa ia ulufale fa’amalosi ai i totonu o se fale ma le fa’amoemoe e fa’atinoina ai le solitulafono o le gaoi, ma a o ia i ai i totonu o lea fale, sa ia gaoia ai se tinoitupe e tusa ma le $5,000.

 

O lo o taua i totonu o le maliliega le tumau pea o le tete’e o Itele na te le i gaoia se vaega tupe e tusa ma le $5,000 e pei ona tu’uaia ai o ia e le malo.

 

Na ta’utino atili le ua molia e fa’apea, i se taimi o le po e pei ona taua i fa’amaumauga a le fa’amasinoga, sa ia ulufale fa’amalosi ai i totonu o le fale a lana sponsor ma gaoia se vaega tupe e silia i le $100.

 

Afai ae talia e le fa’amasinoga le maliliega ua sainia e itu e lua, o le a talosaga loa le malo ina ia solofua le moliaga mamafa o lo o totoe ai i le pepa o tagi sa ia fa’aulu, le moliaga o le talepe fale i le tulaga lua.

 

O lo o taofia pea le ua molia i le toese i Tafuna e fa’atali ai le faaiuga o le masina o Iulai e toe tulai ai i luma o le fa’amasinoga.

 

O le moliaga mamafa o le gaoi, o lo o fa’atulaga i lalo o le tulafono o le vaega C lea o solitulafono mamafa, lea e mafai ai ona fa’asala se tasi i le toese mo le umi e le silia i le 7 tausaga, pe fa’asala fo’i i le salatupe e le silia i le $5,000, po o le fa’asala fo’i i fa’asalaga uma ia e lua.

 

FA’ASI’I AUPAAU

 

O le masina o Iulai lea ua fa’atulaga e lau ai le fa’asalaga a le ali’i o Fa’asi’i Aupaau i luma o le fa’amasinoga maualuga, ina ua mae’a ona ta’usala o ia e le fa’amasinoga maualuga i le moliaga mamafa o le gaoi.

 

Na ulua’i molia e le malo ia Aupaau i le moliaga pito sili ona mamafa o le Faomea i le tulaga muamua, ae i lalo o le maliliega lea ua latou sainia ma Aupaau ma ua talia fo’i e le fa’amasinoga, ua malie ai le malo e talosaga i le fa’amasinoga maulauga ina ia fa’amama le mamafa o le solitulafono latou te molia ai Aupaau.

 

I le tali ioe ai o Aupaau i le moliaga e pei ona toe teuteuina e le malo, sa ia ta’utino ai e fa’apea, i se taimi o le po o le aso 13 Tesema 2016 i Amerika Samoa, sa la o ai ma David Fo’a i se faleoloa i Malaeimi ma le fa’amoemoe e gaoi le masini tupe o lo o i totonu o le faleoloa o lo o i ai le tinoitupe e $260 i totonu.

 

Sa fa’aaoga e Fo’a se tama’i fana e fa’afefe ai le fa’atauoloa ae o ia na aveesea fa’amalosi le masini tupe ma o ese loa.

 

O se tasi o vaega o le maliliega a Aupaau ma le malo, o lona sauni lea e molimau ma le fa’amaoni mo le itu a le malo i le mataupu o lo o molia ai lana uo o Fo’a, e mafua mai i fa’alavelave o lo o tu’uaia ai Fo’a i lona osofaia o faleoloa ae ave faagaoi meatotino sa i totonu.

 

O lo o taofia pea Aupaau i le toese i Tafuna e fa’atali ai le aso lea ua fa’atulaga e lau ai lona fa’asalaga, ina ua le mafai ona ia totogi le tupe sa fa’atulaga e tatala ai o ia i tua mai le falepuipui.

 

O le moliaga o le gaoi, o lo o fa’atulaga mai i lalo o le tulafono o le vaega C lea o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, po o le fa’asala foi i le salatupe e le silia i le $5,000.

 

O le ali’i o Fo’a lea o lo o tu’uaia fa’atasi ma Aupaau i lenei mataupu, o lo o tu’uaia o ia e le malo i le tele o moliaga mamafa e aofia ai le talepe fale i le tulaga muamua ma le gaoi, e mafua mai i lona osofaia o faleoloa eseese e 9 i totonu o le atunu’u.

 

O lo o fa’aauau pea le mataupu a Fo’a i luma o le fa’amasinoga maualuga i le taimi nei, ma o lo o taofia pea o ia i le toese i Tafuna.

 

VICTOR UPUTAUA

 

Ua molia nei e le malo le ali’i o Victor Uputaua i le moliaga mamafa o le ave ta’avale a o se’i lona laisene, e mafua mai i le fa’alavelave lea na taofia ai e leoleo le ta’avale sa ia fa’afoeina i luga o le auala i Faga’alu, ina ua molimauina le ova o le saoasaoa mai maila fa’atulafonoina, ae maua ai o lo o se’i e le fa’amasinoga faaitumalo lona laisene mo le 6 masina, e mafua mai ina ua ta’usala o ia i le moliaga mama o le ave ta’avale ‘ona i le amataga o le tausaga nei.

 

Ina ua fesiligia e Leoleo le ua molia i le mafu’aaga o lona fa’afoeina o le ta’avale, ae na tali le ua molia, o ia na alu e piki mai fualaau a lona Tina mai le falema’i ina ua leai se isi e sau i le ta’avale e piki atu fualaau.

 

I le aso na lau ai le fa’asalaga a Uputaua ina ua fa’amaonia e le fa’amasinoga le moliaga o le ave ta’avale ‘ona fa’asaga ia te ia, sa faanofovaavaaia ai o ia mo le 6 masina i lalo o poloaiga e ao ona ia usita’i i ai.

 

O ni isi o ia poloaiga e aofia ai le fa’asa lea ona ia toe tagofia le ava malosi, fa’asa ona ia toe soli se tulafono, aemaise ai le se’i o lona laisene ave ta’avale mo le 6 masina, ua fa’asa ona ia toe fa’afoeina se ta’avale i luga o le alatele a le malo.