Ads by Google Ads by Google

Tala otooto mai le Fa’amasinoga

ausage@samoanews.com

LETALITONU ALOFAITULI

 

O le taeao nei lea ua toe tolopo mai i ai le mataupu a le ali’i o Letalitonu Alofaituli talu mai le aso Faraile o le vaiaso na te’a nei, ina ua le mafai e le itu a le malo ona tu’uina atu i luma o le fa’amasinoga le a’upega na fa’aaoga e le ua molia e fa’atino ai le solitulafono lea ua ta’usala ai o ia e le fa’amasinoga.

 

Ina ua mae’a ona tu’uina mai e le fa’amasinoga le fa’asalaga a Alofaituli, sa fesili ai loa le afioga i le ali’i fa’amasino sili ia Michael Kruse po o fea o i ai le fana sa fa’aaoga e fa’atino ai le solitulafono, ae na tali le itu a le malo, e le i ai se fana o i totonu o le potu o loo teu ai mau fa’amaonia a le Ofisa o Leoleo, o le taimi lea na vaaia ai le sui o le silasila a le ali’i fa’amasino sili, ma ia poloaina ai loa le mataupu a Alofaituli ina ia toe fofogaina i le taeao nei, atoa ai ma lona poloaina o le itu a le malo ina ia oo atu nei ua mafai ona latou tuuina atu le a’upega i luma o le fa’amasinoga.

 

“Afai e le maua mai le a’upega, ia poloaina la le Komesina e oo atu mai i luma o le fa’amasinoga e fa’ailoa mai le tulaga e fa’atatau i le a’upega”, o le saunoaga lea a Kruse.

 

E pei ona masani ai le fa’amasinoga maualuga i soo se taimi e mae’a ai ona tu’uina mai sana fa’asalaga i soo se tasi e ta’usala i ni solitulafono, e poloaina ai lava e le fa’aasinoga le tatau lea ona fa’atamaia mau fa’amaonia sa fa’aaoga i le taimi o le solitulafono, e aofia ai fualaau fa’asaina poo a’upega mata’utia fo’i, ina ia tusa ai ma ala o le tulafono.

 

O Alofaituli na ta’usala i le moliaga mama o lona umia fa’asolitulafono lea o se a’upega e lei lesitalaina, e mafua mai i le fa’alavelave lea na tula’i mai i le tausaga na te’a nei, lea na ia fa’alala ai se a’upega i ni ali’i sa nofonofo i se fale fa’atali pasi, ina ua leai se isi o i latou e tali atu poo ai na fa’aleagaina lana ta’avale.

 

E pei ona taua i fa’amaumauga a le fa’amasinoga e fa’apea, i se taimi o le aso 17 Setema o le tausaga na te’a nei i Pava’ia’i, na ia fa’alala ai se fana i ni ali’i talavou sa nofonofo i se fale fa’atali pasi, ma o lea gaioiga na matua lagona ai le mata’u ma le fefe i ali’i na a’afia.

 

Na fa’ailoa e Kruse i le aso na lau ai le fa’asalaga a le ua molia e fa’apea, e ui e leai se isi na manu’a i lenei solitulafono, peita’i e matua matuia lava le fa’alala o se fana i se isi tagata, tusa lava pe afai sa fa’atinoina i se auala e fa’afefe ai tagata, e aunoa ma se fa’amoemoe e fa’atupu ai se manu’a.

 

E 2 tausaga lea ua fa’anofovaavaaia ai e le fa’amasinoga maualuga le ali’i o Alofaituli, i lalo o poloaiga e ao ona ia usita’i i ai, ma o ni isi o ia poloaiga e aofia ai le fa’asa lea ona ia toe umia se a’upega, fa’asa ona ia toe soli se tulafono a le malo, a ia avea o ia o se tagatanu’u e tausisi ma usita’i i tulafono uma a le malo.

 

ALFRED SASAGI

 

E 12 masina lea ua fa’anofovaavaaia ai le ali’i o Alfred Sasagi e le fa’amasinoga fa’aitumalo, ina ua ta’usala o ia i le moliaga mama o le fa’aoolima i le tulaga tolu, i lalo o se maliliega na latou sainia ma le malo, lea fo’i ua talia e le fa’amasinoga.

 

Na ulua’i tu’uaia e le malo ia Sasagi i moliaga mama e 3, ae i lalo o le maliliega lea sa latou sainia ma le malo, ua ia tali ioe ai i le moliaga o le fa’aoolima i le tulaga tolu, ae solofua e le fa’amasinoga isi moliaga mama e 2 o loo totoe ai i le pepa o tagi sa fa’aulu, e aofia ai le moliaga o le tu fua i le fale poo le fanua o le isi tagata, atoa ai ma le moliaga o le fa’atupu vevesi i nofoaga faitele.

 

O moliaga e pei ona ta’usala ai Sasagi na afua mai i se fa’alavelave sa tula’i mai i Ottoville i le masina o Novema o le tausaga na te’a nei, lea na ia fa’ao’olima ai i se ali’i la te tuaoi, e mafua mai i se feeseeseaiga na tula’i mai i lo la va.

 

Na taua i fa’amaumauga a le fa’amasinoga le alu o le ua molia i le fale o le ali’i na a’afia ma ia fa’ao’olima i ai, e ala i lona tu’i o ona foliga, sosoo ai ma lona laulauvavale ma lafo upu masoa, lea na avea ma auala na save’u ai le nonofo filemu o tagata lautele sa i ai.

 

Na fa’atoese le ua molia e tusa ai o lana solitulafono sa faia, ma ia talosagaina ai le fa’amasinoga mo se isi avanoa mo ia, lea fo’i na talia e le fa’amasinoga.

 

O ni isi o tuutuuga o lana nofovaavaaia e aofia ai lona totogi o le salatupe e $200, fa’asa ona ia toe alu i le fale poo le fanua o le aiga na a’afia i lana solitulafono, aua ne’i ona toe solia se tulafono a le malo, a ia avea o ia o se tagata e usita’i i tulafono i taimi uma, ma ia auai i ni aoaoga e fesoasoani ai i le tulaga o le ita o loo a’afia ai o ia.