Tala otooto mai le Fa’amasinoga

ausage@samoanews.com

TONY LEATUALEVAO

 

O le ali’i faiaoga mai le Aoga Tulaga muamua a Pago Pago lea o lo o tu’uaia i lona sasaina lea o se tamaititi aoga, ua fa’atulaga e le fa’amasinoga maualuga le ulua’i iloiloga o lana mataupu e faia lea i le aso 8 Ianuari 2017, i le mae’a ai lea ona ia tula’i ma teena tu’uaiga fa’asaga ia te ia i le aso Faraile ua te’a..

 

O lo o tu’uaia e le malo le susuga a Tony Leatualeva i le moliaga mamafa e tasi o le faia o sauaga fa’asaga i fanau (child abuse), ma le moliaga mama o lona faia o gaioiga e lamatia ai le saogalemu o fanau laiti.

 

Na ulua’i tu’uaia e le malo ia Leatualevao i le moliaga mamafa o le fa’aoolima i le tulaga lua, faapea ai ma le moliaga mama o lona faia o gaioiga e ono lamatia ai le saogalemu o fanau laiti, ae i le mae’a ai o lana ulua’i iloiloga lea sa faia i luma o le afioga i le ali’i fa’amasino ia Fiti A. Sunia i le vaiaso amataga o le vaiaso ua te’a,, na fa’aleaogaina ai loa e le fa’amasinoga le moliaga mamafa o le fa’ao’olima i le tulaga muamua.

 

O tu’uaiga e pei ona faia fa’asaga i le ali’i faiaoga, na afua mai ina ua molimauina e le Tina o le tamaititi na a’afia ni unaoa i lona tino, ma ia faila ai loa lana tagi i le Ofisa o Leoleo. O lo o taua i fa’amaumauga a le fa’amasinoga le mae’a lea ona fa’ailoa e le ali’i faiaoga ua molia i le Tina o le tamaititi na a’afia le mafua’aga na ia sasaina ai lana tama, e mafua mai ina ua le usita’i i le fa’atonuga sa tu’uina atu i ai, ma sa foliga mai fo’i na ioe i ai le loto o le Tina.

 

Ae ina ua taunu’u atu i le fale ma vaaia e le Tina manu’a i le tino o lana tama, o iina na suia ai loa lona mafaufau ma ia faila ai loa lana tagi i le Ofisa o Leoleo, aemaise ai fo’i le fa’ailoa e lona to’alua o lona sauni e alu i le faleaoga e talanoa i le ali’i faiaoga e tusa ai o le mataupu na ia sasa ai lona atali’i.

 

O lo o tumau pea tuutuuga o lo o tatala ai Leatualevao i tua mai le toese i Tafuna, e fa’atalitali ai le aso lea ua fa’atulaga e toe valaau ai lana mataupu.

 

O le ali’i loia sili fautua ia Jerard Murphy o lo o tula’i mo le itu a le malo, ae o le tama’ita’i loia fautua ia Karen Shelly o lo o tula’i mo le ali’i faiaoga.

 

IOPU SIOLO

 

Ua talia e le fa’amasinoga maualuga le fautuaga a le Ofisa Faanofovaavaaia, ina ia fa’aauau pea tuutuuga o le nofovaavaaia a le ali’i o Iopu Siolo i luma o le fa’amasinoga maualuga, ona o lo o maitauina pea lona usitaia o poloaiga sa tu’uina atu ia te ia e usita’i i ai.

 

E pei ona taua i le ripoti a le Ofisa Nofovaavaaia, e le gata ua mae’a ona totogi le salatupe a Siolo e $2,000, ae ua mae’a fo’i ona ia totogiina le tupe lea na poloa’i o ia e le fa’amasinoga na te totogi mo manu’a o le ali’i sa ia fa’ao’olima i ai i le aofaiga e $1,000.

 

Na fautua le afioga i le ali’i fa’amasino sili ia Michael Kruse i le loia a Siolo ia Michael White ina ia fautua ia Siolo, ia fa’aauau pea ona usita’i i tuutuuga o loo totoe o lana nofovaavaaia, ma afai ae i ai se poloaiga na te le usitaia, e ono avea lea ma auala e taofia ai o ia i le falepuipui.

 

O Siolo, e to’afa i ai ali’i mai le au lakapi a le afioaga o Nu’uuli na ta’usala e le fa’amasinoga maualuga i le mataupu lea na latou fasi fa’amo’amo’a ai le ali’i Laufali mai Samoa lea sa fa’atautaia le ta’aloga i le o Nuuuli ma Avele i le 2011.

 

O ni isi o tuutuuga o lana nofovaavaaia e 5 tausaga, o lona tuliina lea o masina e 20 i le toese i Tafuna, totogi lana salatupe e $2,000 atoa ai ma le $1,000 e totogi mo le taui o vaega sa fa’aleagaina i lana gaioiga.

 

O tuutuuga o le nofovaavaaia a Siolo lea o loo totoe e tatau ona usita’i i ai, o le usita’i lea i tulafono a le malo, asiasi i le ofisa fa’anofovaavaaia i masina ta’itasi, ma aua ne’i ona toe solia lava se isi tulafono.

 

PATI JENNINGS

 

O le aso 23 Tesema lea ua fa’atulaga e tu’u atu ai se fa’aiuga a le fa’amasinoga fa’asaga i le ali’i o Pati Jennings, ina ua fa’amaonia e le fa’amasinoga tuuaiga o lona le usitaia lea o tuutuuga o lana nofovaavaaia sa tu’uina atu i le tausaga 2014, ina ua ta’usala o ia i le moliaga mamafa o le talepe fale i le tulaga lua.

 

Na valaau e le itu a le malo le Pulesili o le Ofisa Faanofovaavaaia ia Macolm Polu mo le tu’uina atu o se fa’amatalaga e uiga i le mataupu a Jennings.

 

Na taua e le susuga a Polu i lana molimau fa’atauto e fa’apea, ina ua lau le fa’asalaga a Jennings i le aso 7 Fepuari 2014, na fa’anofovaavaaia ai loa o ia e le fa’amasinoga mo le umi e 7 tausaga, i lalo o tuutuuga e ao ona ia usita’i i ai, ma o ni isi o ia tuutuuga e aofia ai le aua lea ne’i ona toe solia se tulafono a le malo.

 

I ni nai masina e le i mamao atu, na toe a’afia ai fo’i lenei ali’i talavou i le tulafono,  ina ua ta’usala o ia e le fa’amasinoga fa’aitumalo i le moliaga mama o le fa’atupu vevesi i nofoaga faitele, ma ua atagia mai ai le le usita’i o Jennings i tuutuuga o lana nofovaavaaia, o le aua lea ne’i ona toe solia se tulafono i totonu o le 7 tausaga o lana nofovaavaaia.

 

Na fa’amalieina le fa’amasinoga i le ripoti a le Ofisa Fa’anofovaavaaia, ma poloaina ai loa le aso 23 Tesema e avea ma aso e tu’u aloaia atu ai sa latou fa’aiuga e uiga i lenei mataupu.

Comment Here