JENNIFER TOFAEONO

Ua talia e le fa’amasinoga maualuga le fautuaga sa tu’uina atu e le Ofisa Fa’anofovaavaaia, ina ia fa’aauau pea tuutuuga o lo o tatala ai Jennifer Tofaeono i tua mai le toese i Tafuna, e pei o le fa’aauau pea lea ona ia galue i le galuega o lo o faigaluega ai i le taimi nei ma totogi le tupe ua poloaina o ia e le fa’amasinoga e toe totogi atu i le Falema’i o le LBJ i Faga’alu.

I le taimi na valaau ai le isi iloiloga o le nofovaavaaia a Tofaeono i le aso Lulu, na fa’ailoa ai e lana loia fautua ia Marcellus T. Uiagalelei i luma o ali’i fa’amasino, le mae’a lea ona totogi e Tofaeono o le $150 i le falema’i i Fagaalu i le taeao o le aso Lulu na te’a nei, o se tasi lea o le vaega o le tupe na poloaina o ia e le fa’amasinoga e toe totogi.

Mai le tupe e $51,900 na poloa’i e le fa’amasinoga maualuga ia Tofaeono na te toe totogi i le LBJ, e silia i le $20,000 le tupe e oo mai i le vaiaso nei ua mae’a ona ia toe totogiina i le falema’i, ma o lo o fa’aauau pea ona ia totogiina lea vaega tupe.

O Tofaeono na ta’usala e le fa’amasinoga maualuga i le moliaga o lona ave fa’agaoi lea o le silia i le $50,000 mai le falema’i i Fagaalu, a o avea ai o ia ma Pule i le vaega o Pisinisi a le falema’i.

O se tasi o tuutuuga o lana nofovaavaaia e 5 tausaga na tu’uina atu e le fa’amasinoga maualuga, o lona tuliina lea o masina e 20 i le toese i Tafuna, atoa ai ma lona toe totogiina o le tupe e silia i le $50,000 aga’i i le Falema’i a le atunu’u.

Na fa’ailoa e le loia a le malo ia Jerard Murphy i luma o le fa’amasinoga maualuga, tulaga lelei o fa’amaumauga a le Ofisa Fa’anofovaavaaia e fa’atatau i le toe totogiina atu e le ua molia o le vaega tupe sa poloaina o ia e toe totogi, atoa ai ma lona usitaia o isi uma tuutuuga o lana nofovaavaaia.

VILIAMU UPUTAUA

E 12 masina lea ua fa’anofovaavaaia ai e le Fa’amasinoga Fa’aitumalo le ali’i o Viliamu Uputaua, ina ua ta’usala o ia i le moliaga mama o le fa’ao’olima i le tulaga tolu. I lalo o se maliliega na sainia e Uputaua ma le malo, lea fo’i na talia e le afioga i le ali’i fa’amasino ia Fiti A. Sunia, ua tali ioe ai le ua molia i le moliaga o le fa’aoolima i le tulaga tolu, ae solofua le isi moliaga mama o le fa’aleaga meatotino i le tulaga tolu.

O se vevesi na tula’i mai i le va o Uputaua ma le ali’i na a’afia a o faia sa laua inugapia, na ia tu’iina ai le na a’afia toe fa’aleaga lana telefoni.

Na talia e le fa’amasinoga le fa’atoesega a le ali’i ua molia mo se isi avanoa e toe tu’uina atu ia te ia, peita’i na fa’ailoa i ai e Sunia e fa’apea, afai na te soliina se tuutuuga o lana nofovaavaaia, o le a taofia loa o ia i le toese mo se taimi umi.

O ni isi o tuutuuga o le nofovaavaaia a le ali’i ua molia e aofia ai le fa’asa lea ona ia toe tagofia le ‘ava malosi, fa’asa ona ia toe solia se tulafono a le malo, a ia auai i ni aoaoga fa’a faufautua e fesoasoani ai i a’afiaga o le ‘ava malosi atoa ai ma le ita o lo o a’afia ai o ia. Ua poloaina fo’i o ia na te totogiina le salatupe e $125 i le fa’amasinoga.