Ads by Google Ads by Google

Tala otooto mai le Fa’amasinoga

ausage@samoanews.com

TALIGALU AH SIU

 

Ua talia e le fa’amasinoga maualuga le talosaga ua tu’uina atu e le loia a le ali’i o Taligalu Ah Siu, mo se avanoa e faia ai se su’esu’ega fa’apitoa a le ua molia mai le Foma’i o le mafaufau o lo o galue i le falema’i o le LBJ, ina ia mafai ai ona iloilo le tulaga lelei o lo o i ai le mafaufau o lene ali’i, pe gafatia lona tula’i e tu’u atu sana tali e tusa ai o tu’uaiga fa’asaga ia te ia.

 

O le fa’aauau ai pea ona a’afia o Ah Siu i le tulafono talu mai le 4 tausaga talu ai, ua manatu ai lana loia fauatua ia Michael White, e i ai le manaoga tele o lo o a’afia ai le ua molia e tatau ona sailia, aemaise ai o le fa’aauau pea lea ona a’afia o ia i le fa’afitauli o le tagofia o le ‘ava malosi atoa ai ma le fualaau oona e pei o lona fa’aaoga o penisini o ta’avale e sogisogi ai (tulou).

 

O le vaiaso na te’a nei na toe tula’i ai fo’i Ah Siu i luma o le fa’amasinoga maualuga, ona o isi tu’uaiga i lona le usitaia o poloaiga o lana nofovaavaaia, ae o lea fo’i o lo o ia i le isi mataupu fou o lo o tu’uaia ai o ia i luma o le fa’amasinoga fa’aitumalo, i lona faia o gaioiga e save’u ai le nonofo filemu o tagata lautele.

 

Na taua e White e fa’apea, afai e maua se avanoa e faia ai se su’esu’ega fa’asaga i le tulaga malosi o le mafaufau o lenei ali’i, o le a faigofie ai loa ona saili tonu le taunuuga o le tele o mataupu o lo o a’afia ai o ia, aua e i ai lona talitonuga, afai e a’afia o ia i le gasegase o le mafaufau, e le o le toese la le nofoaga lelei mo ia, ae tatau ona taofia ma togafitia o ia i le falema’i o lo o taofia ma togafitia ai i latou e a’afia i le gasegase o le mafaufau.

 

Ua toe tolopo le mataupu a le ua molia ae ua taoto atu i le fa’atinoina o le galuega a le ali’i foma’i o le mafaufau o lo o galue i le atunu’u, susuga Dr. Ben Biutoko.

 

PULUMU FIFITA

 

O le taeao nei lea ua fa’atulaga e fofoga aloaia ai le fa’aiuga a le fa’amasinoga fa’asaga i le ali’i o Pulumu Fifita, lea ua ta’usala i le mataupu lea na ia ulufale fa’amalosi ai i le fale o se aiga i Leone i le amataga o le tausaga nei, ma ia aveesea ai ni meatotino mai totonu o le fale.

 

I lalo o se maliliega na sainia e le ua molia  ma le malo, lea fo’i na talia e le fa’amasinoga, na tali ioe ai o ia i le moliaga o le talepe fale i le tulaga lua, ae solofua e le fa’amasinoga maualuga isi moliaga sa totoe ai i le pepa o tagi sa fa’aulu e le malo.

 

O lo lo o taofia pea Fifita i le toese i Tafuna i le taimi nei e fa’atali ai le lauina o lana fa’asalaga.

 

ONOSA’I TOELUPE

 

E 12 masina lea ua nofovaavaaia ai le ali’i o Onosa’i Toelupe i luma o le fa’amasinoga fa’aitumalo, ina ua ta’usala o ia i le moliaga mama o le gaoi, e mafua mai i le fa’alavelave lea na ia ave fa’agaoi ai ni mea faigaluega a se ali’i la te masani sa ia fa’aaogaina.

 

E pei ona taua i fa’amaumauga a le fa’amasinoga, o le mae’a ai ona fa’aaoga e Toelupe o mea faigaluega a le ali’i na a’afia e fausia ai lona fale, na ia alu ai loa ma fa’atau atu i se tasi o ana uo, ae ina ua fesiligia e le ali’i na a’afia o ia, sa amata ai loa ona ia faia ni gaioiga e save’u ai lo la nonofo filemu, ona sa ova lona ‘ona i le taimi na fesiligia ai o ia e uiga i mea faigaluega.

 

Na fa’atoese le ua molia e tusa ai o lana solitulafono peita’i sa fautuaina o ia e le afioga i le ali’i fa’amasino ia Fiti A. Sunia ina ia saili sana galuega e galue tumau ai ma maua ai sona totogi, nai lo lona fa’atinoina o lea auala e saili ai ana tupe ae soli ai ma le tulafono.

 

O ni isi o tuutuuga o le nofovaavaaia a le ua molia e aofia ai lona totogiina o le salatupe e $125 i le fa’amasinoga, fa’asa ona ia toe tagofia le ‘ava malosi, aua ne’i ona toe solia se tulafono a le malo, a ia avea o ia ma tagatanu’u e usita’i i tulafono a le malo.

 

Ua fa’aaoga fo’i e le fa’amasinoga aso e 3 na taofia ai o ia i le toese e avea ma ana fa’asalaga i lenei mataupu.