TAVITA IOELU

E 30 aso lea ua toe tolopo i ai le iloiloina o le mataupu a Tavita Ioelu i luma o le fa’amasinoga maualuga, ae sei taumafai sui o le Ofisa Fa’anofovaavaaia fa’apea ai ma le Fa’amasinoga e saili ni fa’amaoniga o lana molimau ua tuuina atu i luma o le fa’amasinoga, e fa’atatau i le fiu lea e tau saili sana galuega i le tele o pisinisi ma kamupani i le atunu’u.

O se tasi o tuutuuga o le nofovaavaaia a le ali’i o Ioelu na tu’uina atu i ai e le fa’amasinoga i le fa’aiuga o le tausaga e 2015, ina ua ta’usala o i ai le moliaga o le talepe fale fa’atasi ai ma ni isi ali’i se to’a 2, o le totogi lea o lana salatupe e $1,000 i le fa’amasinoga, ma ia saili sana galuega tumau e galue ai ma maua sona totogi, i totonu o le ulua’i 6 masina o lana nofovaavaaia.

O lea ua aga’i atu i le 12 masina talu ona nofovaavaaia Ioelu, ae le o i ai lava sana galuega e galue tumau ai.

I lana iloiloga i luma o le fa’amasinoga i le vaiaso na te’a nei, na fesiligia ai o ia i le mafua’aga ua tuai ai ona maua sana galuega, ae na tali le ua molia, o lo o tau su’e pea lava sana galuega, ona ua fiu e ave ana tusi talosaga i ni isi o faleoloa ma pisinisi tua e aofia ai ma le kamupani i’a, e le o i ai lava se tali fiafia o maua mai ai.

Na fa’ailoa e le afioga i le Fa’amasino ia Elvis P. Patea i le ali’i ua molia, o le a toe tolopo lana iloiloga mo le isi 30 aso, ae sei sailiili lana moilmau pe fa’amaonia, afai e leai, e ono avea le le maua o sana galuega ma mafua’aga o le fa’aleaoga o lana nofovaavaaia, ona o lea ua te’a le taimi na poloaina o ia e saili ai sana galuega ao lea lava e le i maua.

Na taua atili e le ua molia e fa’apea, atonu o lana faila i le fa’amasinoga atoa ai ma le le mafai ona fai o sana kilia faigaluega mai le Ofisa o Leoleo, ona o lea e i ai lana solitulafono ua fa’amaonia, o se tasi lea o mafu’aaga o le tuai ona maua o sana galuega.

FA’AAUAU PEA SU’ESU’GA A LEOLEO

O lo o fa’aauau pea su’esu’ega a Leoleo i le fa’alavelave lea na manu’a ai se ali’i i le vaiaso na te’a nei i Tafuna. Na taua e le Sui Komesina o Leoleo i le Samoa News le fa’aauau pea o su’esu’ega e uiga i lenei mataupu.

E ui e le i mafai ona fa’amaonia mai le tulaga ua i ai le ali’i na a’afia, peita’i na saunoa Vaimaga Maiava e fa’apea, e tusa ai o ripoti sa tu’uina atu i lona Ofisa, e le o ni manu’a e ono a’afia ai le soifua manu’a na maua i le tino o le ali’i na a’afia, ui i lea, e le o avea lea tulaga ma itu e vaai mama ai le Ofisa o Leoleo i le su’esu’eina o lenei mataupu ina ia mautinoa e maua le sa ia fa’atinoina lenei solitulafono.

FA’ATUPULAIA TOE SOLITULAFONO LO O NOFOVAAVAAIA

O le toe a’afia ai o ni ali’i se to’a 4 i solitulafono eseese i le fa’aiuga o le vaiaso na te’a nei, ua atagia mai ai le fa’atupulaia pea lea o le fa’afitauli lenei i tagata ua mae’a ona ta’usala e le fa’amasinoga, o le toe a’afia i soligatulafono ae o lo o nofovaavaaia i latou i lalo o poloaiga mai le fa’amasinoga.

Mai le to’a 10 o i latou na taofia e Leoleo i le fa’aiuga o le vaiaso na te’a nei, ma tutula’i ai i luma o le fa’amasinoga fa’aitumalo i le taeao ananafi ona o tu’uaiga eseese, e to’a 4 i latou ua toe a’afia i isi solitulafono ae o lo o fa’anofovaavaaia i latou.

O le isi to’alua ua tu’uaia nei e le malo i moliaga mama o le fa’ao’olima i le tulaga tolu, ma le isi to’alua ua tu’uaia i le fa’atupu vevesi i totonu o aiga ma nofoaga faitele. E pei ona taua i fa’amaumauga a le fa’amasinoga, o mataupu uma e pei ona tu’uaia ai i latou nei e to’afa, o lo o taua ai le a’afia o le ‘ava malosi, e ui o le isi lea tuutuuga sa tu’uina atu e le fa’amasinoga fa’aitumalo e tatau ona latou usita’i i ai ao fa’anofovaavaaia i latou, o le aua lea ne’i o latou toe tagofia le ‘ava malosi, pe latou te toe solia tulafono a le malo.

O le ali’i o Malua Felise ua tu’uaia i le fa’ao’olima i le tulaga tolu, e mafua mai i le fa’alavelave lea na latou fufusu ai ma ni isi o ali’i sa latou inupia fa’atasi i luma o se faleoloa i Tafuna i le po o le aso Faraile na te’a nei, ma ia fa’ao’olima ai i se ali’i na taumafai e fa’ato’afilemu le vevesi, ae o le ali’i o Joel Mikaele o lo o tu’uaia i le fa’ao’olima i le tulaga tolu, e mafua mai i lona fa’ao’olima i se ali’i na ia lafo ni upu malolosi i lona tuafafine.

O isi ali’i e toalua o lo o tu’uaia i laua i le faia o gaioiga e save’u ai le nonofo filemu i totonu o aiga, atoa ai ma le faia o sauaga fa’asaga i fafine. O lo o tu’uaia i laua i le fa’atupu vevesi i totonu o aiga.

O le to’atele o i latou na taofia e Leoleo i le fa’aiuga o le vaiaso, ua toe tatalaina i latou i tua e aunoa ma ni tupe e totogi, se’i vagana ai se vaega to’aititi e aofia ai ali’i e to’alua o lo o tu’uaia i le faia o sauaga fa’asaga i la ta’ito’alua ua poloaina le totogi o le ta’i $500 ona fa’atoa mafai lea ona tatala i laua i tua.

O tuutuuga masani ua tu’uina atu ia i latou na tutula’i i luma o le fa’amasinoga i le taeao ananafi, e aofia ai le aua ne’i o latou toe tagofia le ‘ava malosi, aua ne’i o latou toe solia se tulafono, ma ia aua nei toe faia ni gaioiga e fa’afefe pe faamata’u ai ta’ito’alua ma fanau mo ali’i e to’alua o lo o tu’uaia i le faia o sau’aga i totonu o aiga.