Ads by Google Ads by Google

Tala otooto mai le Fa’amasinoga

ausage@samoanews.com

NOFOVAAVAAIA LE ALI’I FA’AOOLIMA I LONA TO’ALUA

 

O le ali’i lea ua ta’usala e le fa’amasinoga i moliaga o le faaoolima i le tulaga tolu atoa ai ma le tete’e a o taumafai Leoleo e pu’e fa’apagota o ia, e mafua mai i le fa’alavelave lea na ia fa’aoolima ai i lona to’alua, ua fa’anofovaavaaia nei o ia mo le 24 masina i lalo o tuutuuga e ao ona usita’i i ai.

 

O ni isi o ia tuutuuga e aofia ai lona tuliina o aso e 39 i le toese i Tafuna, fa’asa ona ia toe solia se tulafono pe toe tagofia le ‘ava malosi, a ia avea o ia ma tagatanu’u lelei e tausisi i tulafono a le malo i taimi uma, ma ia auai i aoaoga fa’a faufautua e fesoasoani ai i le tulaga o le ita atoa ai ma le tagofia o le ‘ava malosi.

 

O le fa’alavelave lenei na tula’i mai i le masina o Oketopa, ina ua vili e le fafine na a’afia Leoleo mo se fesoasoani, i le mae’a ai lea ona fasi fa’amo’amo’a o ia e lona to’alua a o ‘ona. Na taua atili fo’i e le fafine na a’afia i Leoleo le toe tagofia e lona to’alua o le ‘ava malosi ae o lo o nofovaavaaia o ia mo le 12 masina.

 

Na taunu’u Leoleo i le fale peita’i na sola ese le ua molia, ma fai ai loa a latou tuliga ma le ua molia, ma i’u ina maua ai o ia e leoleo ma pu’e fa’apagota ai loa o ia.

 

I luma o le fa’amasinoga i le aso Gafua na te’a nei, na fa’atoese ai le ua molia e tusa ai o lona toe soli o le tulafono, ma ia talosagaina ai loa se isi avanoa mo ia, ae na saunoa le afioga i le ali’i fa’amasino ia Fiti A Sunia e fa’apea, o le itu o lo o pito sili ona le fiafia i ai le fa’amasinoga, o le masina o Aokuso na te’a nei na ta’usala ai le ua molia i le moliaga o le fa’atupu vevesi i nofoaga faitele, ma fa’anofovaavaaia ai loa o ia mo le 12 masina, peita’i e na o le 2 masina talu ona nofovaavaaia o ia, ae toe molia o ia i le fasiga o lona to’alua.

 

O ni isi o tuutuuga o le nofovaavaaia a le ua molia e aofia ai lona tuliina o aso e 39 i le toese, ae o le a fa’aaoga i ai aso e 39 lea na taofia ai o ia a o fa’atalitali ai taualumaga o lana fa’amasinoga. Ua faasa ona ia toe tagofia le ‘ava malosi pe na te toe fa’afefeina lona to’alua ma fasi o ia, a ia avea o ia ma tagatanu’u e tausisi i tulafono a le malo, fa’apea ai ma lona totogiina lea o le salatupe e $100.

 

“Toe tasi lava le avanoa lea ua tu’u atu ia te oe, afai loa e te toe solia se isi tuutuuga a le fa’amasinoga, poo se isi fo’i tulafono a le malo, o le a le toe i ai se avanoa e tu’uina atu, ae o le a poloaina loa oe e tuli aso e 51 lea ua fa’amalumalu e le fa’amasinoga”, o le saunoaga lea a Fiti i le ali’i na molia, ma ia fa’atonuina ai loa le Leoleo o le toese ina ia fa’agaioi pepa ae tatala le ua molia i tua.

 

ANETELE’A FILO

 

O le ali’i lea na ia lafo upu masoa i se ave pasi ina ua le atoa atu lana sui, soso’o ai ma lona palauvale i tagata matutua o le pasese o le pasi na latou lafo atu tala ia te ia, ua faanofovaavaaia o ia e le fa’amasinoga mo le 12 masina, ina ua ta’usala o ia e le fa’amasinoga fa’aitumalo i le moliaga o le fa’atupu vevesi i nofoaga faitele.

 

O le ita tele o le ali’i o Anetele’a Filo i le le atoa atu o lana sui na avatu e le ave pasi, na ia faia ai ni uiga e save’u ai le nonofo filemu o tagata, ma vili ai loa e ni isi Leoleo mo se fesoasoani.

 

Sa maitauina e Leoleo le ova o le ‘ona o Filo i le taimi na latou fesiligia ai o ia e uiga i le mataupu na tula’i mai, ma taofia ai loa o ia i le toese i le aso lava lea, e fa’atali ai le taimi e tula’i ai i luma o le fa’amasinoga i le taeao na sosoo ai.

 

O ni isi o tuutuuga o le nofovaavaaia a Filo ua tuuina atu e le fa’amasinoga, e le gata ua fa’asa ona ia toe tagofia le ‘ava malosi, ae ua fautuaina fo’i o ia i lona faia o uiga le mafaufau i nofoaga faitele.

 

Ua poloaina fo’i o ia ina ia auai i ni aoaoga e fesoasoani ai i le tulaga o le ita atoa ai ma le aafiaga o le ‘ava malosi i lona olaga.