Ads by Google Ads by Google

Tala otooto mai le Fa’amasinoga

ausage@samoanews.com

FA’ATAUALOFA MEKI

 

O le ali’i mai Samoa lea na malaga mai i se pemita e 30 aso ma ia faia ai ni gaioiga e ono lepeti ai le nonofo filemu o tagata lautele, toe fa’aigoa e le fa’amasinoga o se ali’i turisi sa malaga asiasi mai i lona aiga, ua fa’atonu e le fa’amasinoga fa’aitumalo o ia ina ia toe fo’i i lona atunu’u na malaga mai ai, aua fo’i ne’i ona toe solia se tulafono a le malo pe afai e i ai se taimi e toe ulufale mai ai i Amerika Samoa.

 

O le ali’i o Fa’ataualofa Meki na ta’usala e le fa’amasinoga i le moliaga mama o le fa’atupu vevesi i nofoaga faitele, e mafua mai i le fa’alavelave lea na ia lu’iina ai se fa’atauoloa Asia i Nu’uuli, ina ua musu le fa’atauoloa e talia lana fa’atauga fagupia, ina ua iloa e le fa’atauoloa ua te’a le taimi fa’atulafono e fa’ataga ai ona toe fa’atau le ‘ava malosi i tagata lautele.

 

O nei gaioiga uma na tutupu ina ua fa’atoa atoa le 2 vaiaso talu ona taunuu mai Meki i terittori lea na malaga mai ai e asiasi ma tafao mai i ona aiga.

 

Na fa’ailoa e le afioga i le ali’i fa’amasino ia Fiti A. Sunia ia Meki e fa’apea, afai o ia o se tagata o lo o malaga asiasi mai i Amerika Samoa, e tatau ona ia fa’aaloalo ma usita’i i tulafono a le atunu’u o lo o malaga mai i ai, ae le o lona taumafai e soli ma le amanaia.

 

“Ua e laki e lei matuia se tulaga na oo i ai le fa’alavelave sa tula’i mai ona o le gaioiga sa e faia, se manu e mamafa se fa’asalaga e tu’uina atu e le fa’amasinoga ia te oe”, o le saunoaga lea a le ali’i fa’amasino, ma poloaina ai loa le fa’anofovaavaaia o Meki mo le 6 masina, i lalo o poloaiga e ao ona ia usita’i i ai.

 

O ni isi o ia poloaiga e aofia ai le aua ne’i ona toe soli se tulafono, aua ne’i ona toe tagofia le ‘ava malosi a o i ai i le Teritori, ma ia totogi lana salatupe e $100 i le fa’amasinoga, e fa’atali ai le aso e toe fo’i atu ai i lona aiga i Samoa.

 

SOLIA MOSEGI JR

 

O le aso Lua o le vaiaso nei, ua fa’amoemoe e amata aloaia ai le fa’amasinoga iloilo a le ali’i o Solia Mosegi Jr, po o “Joe Palagi” e pei ona iloa ai o ia e le to’atele i luma o le afioga i le ali’i fa’amasino sili lagolago ia Lyle L. Richmond.

 

O le vaiaso na te’a nei na fa’amaonia mai ai e se sui sinia o le Ofisa o Faamasinoga, le valaauina lea o tagata nu’u e silia i le to’a 100 e saili mai ai se vaega iloilo iuga se to’a 6, latou te iloiloina se fa’aiuga o le mataupu a Mosegi Jr, lea o lo o taofia pea i le toese i Tafuna i le taimi nei, ina ua le mafai ona ia totogi le tupe na fa’atulaga e le faamasinoga e tatala ai o ia i tua.

 

E lua mataupu o lo o tu’uaia Mosegi Jr, o le mataupu muamua o lo o tu’uaia ai o ia i moliaga mamafa e lua, o lona fesoasoani lea i le fa’atinoina o le solitulafono mamafa o le fa’ao’olima i le tulag lua, ma lona fesoasoani i le fa’atinoina o le moliaga o le fa’aleaga meatotino i le tulaga muamua, e mafua mai i lona a’afia ai i le fa’alavelave lea na tafana ai e ni isi le lala o le Ofisa o Leoleo i Leone i le masina o Novema 2014, lea fo’i o lo o tu’uaia fa’atasi ai ma isi ali’i e to’atolu e aofia ai Manu Lefatia, Tuliese Taliu ma Sinapati Tu’ufa’anatu, ae o le mataupu lona lua o lo o tu’uaia ai o ia i le moliaga mamafa o lona umia fa’asolitulafono o vaega o le laau fa’asaina o le aisa, faapea ai ma le moliaga mama o le tete’e atu lea i Leoleo a o taumafai e pu’e fa’apagota o ia.

 

O le fa’amasinoga autu a Mosegi Jr lea ua fa’amoemoe e amataina i le taeao a taeao, o le a iloiloina ai na o moliaga e fa’atatau i lona umia fa’asolitulafono o vaega o le pauta fa’asaina o le aisa, atoa ai ma le moliaga mama i lona tete’e atu lea i Leoleo a o taumafai e pu’e fa’apagota o ia.

 

TALAMONI SIMI

 

O le vaiaso na te’a nei na faila ai e le malo le moliaga mamafa o le ave ta’avale a o se’i le laisene fa’asaga ia Talamoni Simi, lea o lo o tu’uaia e le malo lona fa’afoeina o se ta’avale i luga o le alatele a le malo i Tafuna, a o sei e le fa’amasinoga fa’aitumalo lona laisene mo le 6 masina, e mafua mai i le moliaga o le ave ta’avale ‘ona lea na ta’usala ai o ia e le fa’amasinoga i le 4 masina talu ai.

 

O se tasi o poloaiga a le fa’amasinoga ina ua tu’uina atu le fa’asalaga a Simi i le 4 masina talu ai, o le fa’asa lea ona ia toe fa’afoeina se ta’avale i totonu o le 6 masina o lo o se’i ai lona laisene.

 

Afai ae fa’amaonia le moliaga o le ave ta’avale a o se’i le laisene, e ono mafai ona fa’asala Simi i le toese i Tafuna mo le umi e le silia i le 5 tausaga, pe fa’asala fo’i i le salatupe e le silia i le $5,000, ae fa’amalosia ai lona tuliina o aso e 90 i le falepuipui i Tafuna.