Tala otooto mai le Fa’amasinoga

ausage@samoanews.com

TOFU FALEPUIPUI VEVESI AMATA MAI I LE ‘FACEBOOK’

 

Na fa’ai’u i le toese i Tafuna se vevesi na tula’i mai i le va o se ulugali’i i le fa’aiuga o le vaiaso na te’a nei, ma mafua ai loa ona molia e le malo le Tama o le aiga i moliaga mama e lua o le fa’atupu vevesi i nofoaga faitele, atoa ai ma lona save’uina lea o le filemu i totonu o lona aiga.

 

O le vevesi na mafua mai ina ua fasi e le ua molia lona to’alua ma manu’a ai ona foliga, ma vili ai loa e le Tama o le fafine na a’afia le Ofisa o Leoleo mo se fesoasoani mo lona afafine, ma i’u ai loa su’esu’ega ina ua taofia e leoleo le ua molia, ma tula’i ai i luma o le fa’amasinoga fa’aitumalo i le taeao ananafi.

 

Na taua e le fafine na a’afia i Leoleo e fa’apea, o le vevesi i lo la va ma lona to’alua na mafua mai ina ua ia fesiligia lona to’alua e fa’atatau i tusitusiga o lo o ia faia i isi fafine ma tama’ita’i i luga o lana “Facebook”, ae na avea ma itu na ita ai le ua molia ia te ia ma ia fa’ao’olima ai ia te ia.

 

Na aga’i atu le ua molia i totonu o le la potu ma lona to’alua ma amata ai loa se tauga upu i lo la va, seia oo lava i lona fa’asaga atu ma fasi loa o ia, e pei ona taua i fa’amaumauga a le fa’amasinoga.

 

E le i mana’o le ua molia e fai sana fa’amatalaga i leoleo ina ua fesiligia o ia e uiga i lenei mataupu.

 

TU’UAIA SE ALI’I FAIA O UIGA MATAGA I SE TEINEITITI LAITITI

 

E $50,000 le vaega tupe lea ua fa’atulaga e le fa’amasinoga e totogi, ona fa’atoa mafai lea ona tatala mai tua o le toese i Tafuna se ali’i o lo o taofia ai, ona o tu’uaiga i lona faia lea o uiga mataga i se teineititi e laititi i lalo o le tulafono.

 

O le taeao ananafi na tula’i ai i luma o le fa’amasinoga fa’aitumalo le ali’i o Va’afuti Tevita mo le ulua’i taimi, ma ua toe tolopo lana mataupu e toe fofogaina i le fa’aiuga o le vaiaso nei, lea ua fa’amoemoe o le aso fo’i lea e tatau ona fa’atulaga ai lana ulua’i iloiloga i luma o le fa’amasinoga.

 

O moliaga ua tu’uaia ai e le malo ia Tevita e aofia ai lona fai’aiga i se teineititi e laititi i lalo o le tulafono (rape), faia o uiga fa’asotoma (sodomy), faia o amioga mataga fa’afeusuaiga (sexual assault), tagofia o itutinosa o se teineititi e laititi i lalo o le tulafono (sexual abuse 1st degree), atoa ai ma lona faia o ni gaioiga e ono lamatia ai le saogalemu o fanau e laiti i lalo o le tulafono.

 

O lo o tu’uaia e le malo ia le ua molia i le i ai lea o se la mafutaga ma se teineititi e i lalo o le 14 tausaga le matua, e aofia ai ma lona faia i ai o uiga mataga fa’afeusuaiga.

Comment Here