TALA MAI VAIFANUA

TOE AMATA LE TAUTUA A LE MV LADY NAOMI I LE VA O PAGO PAGO MA APIA

 

Ua toe amata aloaia nei le tautua a le va’a o le MV Lady Naomi i le va o Apia ma Pago Pago i le vaiaso na te’a nei, ina ua fa’amaonia e le Ofisa o le US Coast Guard loa tulaga lelei, i le mae’a ai lea o se taimi umi na taofia ai lana tautua, ona o le tau toe fa’aleleia o ni isi o vaega tele o lona tino e pei ona i ai i le Vaega Tosova’a a le malo i Satala mo le silia i le 3 vaiaso.

 

O se fa’amama avega mo le to’atele o tagata faimalaga i le va o motu e lua, aemaise ai le pisi o faigamalaga i fesuiaiga mo le aufaigaluega a le Ekalesia Metotisi, mo faifeau ma o latou aiga ua si’itia i a latou ekalesia fou e galulue ai.

 

Talu mai vaiaso e 4 na taofia ai le tautua a le va’a, sa na o uta na mafai ona la’u e le vaa o le Fotu o Samoa e aunoa ma ni pasese, ma atili ai ona pisi femalagaaiga a va’alele i le va o motu e lua.

 

“O lo’o fa’atulaga lava le va’a latou mo lea fo’i vaiaso i ana malaga massant, i aso e masani ai, peita’i, e fa’atautaia mai Samoa lea tulaga, ae ua toe talia lava pasese e totogia mo uta ma pasese i lea fo’i vaiaso mo le malaga a le Lady Naomi.” O se tala lea a le tama’ita’i o Julia mai le Ofisa Vaa a le Polynesia Shipping i Fagatogo.

 

Na taua e sui mai kamupani va’alele le pisi o femalagaaiga a va’alele i tagata femalagaa’i, fa’apea ai fonotaga mo ni isi o Ekalesia e pei o le Metotisi ma le Assembly of God sa usuia i Samoa.

 

SI’ITAGA FOU MO TOTOGI O MATAUPU I LE KOLISI TU’UFA’ATASI

 

O le itula e 4:00 i le afiafi o le aso 7 Aokuso i le potu fono a le Kolisi Tuufaatasi i Malaeimi, o le a fa’ataunu’uina ai se feiloaiga i le va o matua ma sui o le pulega o le Kolisi, mo le fa’alauiloaina lea o si’itaga fou o le a i ai totogi o mataupu mo fanau aoga i lenei kuata ma le aga’i atu i le lumana’i.

 

O ni isi o ia totogi fou e aofia ai le $25 i le mataupu e tasi, ae mo mataupu ua oo atu le maualuluga i le 300/400, ua fa’atulaga i le ta’i $175.

 

O le a talanoaina ai fo’i i lenei fonotaga totogi fou mo le fa’aaogaina o potu aoga mo suesuega faasaienisi, fa’apitoa mo fanau aoga o lo o saili a latou fa’ailoga. Ua fautuaina le mamalu o matua ua ina ia auai i lenei fonotaga taua, ina ia mafai ai ona latou silafia le tulaga tonu o le a i ai suiga o totogi i tautua a le Kolisi.

Comment Here