Tala I Vaifanua


[ata: SN]

$70,000 TUPE MAMA SAILIGA A LE HOPE HOUSE

 

O se tala fiafia ma le agaga fa'afetai na fa'auia mai e le Taitaifono ma le Komiti Fa'afoe a le Hope House i Fatuoaiga, ae maise o le afioga Epikopo Peter Brown, o le fa'auluuluga o le Puleaga Samoa Pago Pago, ona o le foa'i a le mamalu a le atunu'u i mea uma sa fa'atino e fa'ailoga ai le 30 tausaga o le Hope House.

 

"O le aofaiga o le seleni sa tu'ufa'atasia e silia ma le $90,000 peita'i, ina ua mae'a totogia tupe uma ma pili o mea sa fa'aalu mo le fa'amoemoe i le vaiaso atoa na fa'ailoga ai le 30 Tausaga o le Hope House, ona maua lea o le tupe mama e $70,000+. Fa'afetai atu ai i le foa'i ma le agalelei o tagata uma ae maise o Fa'alapotopotoga, Ekalesia ma Pisinisi mo le fa'amoemoe,” o se saunoaga lea a se tasi o sui o le Komiti Fa'afoe o le Hope House, Larry Sanitoa.

 

O le tele o lenei seleni, sa amata aoina lava i le taimi a'o loma le fa'amoemoe, sa foa'i ai so'o se tasi, pisinisi, fa'alapotopotoga ma ekalesia. O i latou fo'i sa vala'aulia ina ia fa'afiafia, o le isi lea fo'i ala sa foa'i atu ai isi, ae o le taimi fo'i o Ta'amilosaga Tapolo mo le fa'amoemoe o le Hope House.

 

TU’UMALO GALUMALEMANA SATELE - TRIPLER MEDICAL CENTER

 

Ua tu'ua le Malo e se tasi o tama iloga o le atunu'u, Galumalemana William G. Satele, e afua i lana tautua e ala i pisinisi ma fa'ato'aga, lana tautua i le Malo tele ma Amerika Samoa e ala i lona avea ma Fitafita a le USAir Force ma i ai lona taimi na tau ai i le Taua i Vietnam, ae maise o se tasi o sui mamalu o le Fono Faitulafono i ona nofoa'iga e tolu i le Maota o Sui na tula'i ai o le Faipule mo le Itumalo o Tualatai. E tele Komiti Fa'afoe a le Maota o Sui sa tofia e galue ai.

 

Ua lauiloa o ia i lona fa'atula'ia o le Faleopisinisi o le Samoa Sports i Fagatogo, atoa ai ma le tele o lana fa'ato'aga o Moa e foaina fuamoa mo le fofoga taumafa o le atunu'u.

 

I ona toe taimi sa i ai pea le tina o le aiga, Nancy Satele ma se tasi o le fanau i ona autafa. Na tu'umalo o ia i le tusa o le itula e 6:00 i le afiafi aso Faraile 13 Oketopa, 2017 i Hawaii. Ua atoa le 74 tausaga o le soifua.

 

Ao talavou Galumalemana, e naunau i ta'aloga, ua iloga lea i lona maota e mautu ai le malae tenisi. O lana pisinisi fo'i e fa'apitoa mo oloa tau ta'aloga e ala i la'ei ma mea ta'alo o so'o se ta'aloga ae maise ai le tenisi, volleyball, basketball, ma le fagota. O mea e fiafia tele i ai o ia.

 

Sa avea o ia ma totino o le Kalapu o le Liona i Pago Pago, ma se tasi sa fa'amautu i ai le Asosi Tenisi a Amerika Samoa mai lona amataga, ae o le tama tuai fo'i o le Asosi Tapolo a Amerika Samoa. O nei mea e fa'aaogaina i nei ta'aloga, e afua ai ona ia fa'atula'ia lana pisinisi o le Faleoloa o so'o se Ta'aloga.

 

O se faipisinisi ma sa avea o ia ma Taitaifono a le Chamber of Comerce, Komiti Fa'afoe a le Au Faipisinisi i Amerika Samoa. O ia o se tasi o ta'ita'i na lalamua i le aumaiga o le Hawaiian Air ma fa'atula'ia le ANZ Amerika Samoa Bank i le atunu'u.

 

I lana pisinisi faufale, sa ia fa'atula'ia ai nisi o atugafale e iloga i le atunu'u e aofia ai le Fale o fa'atautaia ai le Ofisa o le Lesitala i le taulaga, le Fale Fa'amasino i Fagatogo, ma le Ofisa o Feso'otaiga fo'i i le taulaga.

 

E agaga o ia i lona aiga, e pele na'ua ia te ia lona tina, Salamasina Satele, le sa avea ma sa'o tama'ita'i o lona aiga i Vailoatai. O le fua o lona naunau i lona aiga, ona sa toe taliu mai i le tausaga 1966 ma amata ona toe galuea'ina lana fa'ato'aga fa'i tele i Vailoa ma Taputimu, ma o lana faleoloa o Oloa Tau Ta'aloga i Fagatogo, o le faleoloa muamua lea o lena ituaiga na fa'atuina i le vaitausaga 1960,ma o lo'o tutula'i ma fa'atautaia pea.

 

E ui i lona faivaalofilima i lona aiga, ae sa tofia o ia e Kovana Coleman e fa'auluulu i ai  galuega a le Tax Office, Budget Office, ali'i Ofisa o le Historic Preservation ma se tasi fo'i na avea ma so'oupu i le Fono Faitulafono i le va ma le Faigamalo. Peita'i sa o'o lava ina avea ma Fa'atonu o Paka ma Malae Ta'alo.

 

I lenei faigamalo, sa tofia ai e Kovana Lolo Moliga i le Komiti Fa'afoe o le Shipyard Services, peita'i sa ia toe fa'amavae aloa'ia mai lea tofiga ae le'i mae'a lona taimi atofa.

 

O le amataga o lona soifua a'oa'oina sa amata lava mai le St Theresa's i Leone, soso'o ma le Marist Brothers i Atuu a'o le'i malaga i Colorado ma fa'aauau ai ana a'oa'oga i a'oga maualuluga. Ina ua mae'a ona ulufale ai lea i le US Airforce a le Malo tele ma tautua ai mo le fa tausaga.

 

O lo'o soifua pea lenei tama i lona faletua o Nancy Satele ma le fanau e to'avalu ma fanau a lana fanau e to'a 12. O le a toe fa'asalalauina fa'alaua'itele se polokalama o ona toe sauniga mo le silafia a le pa'ia o aiga ma le mamalu o le atunu'u.

 

AMATA TAUTUA TOA TAXI STAND - OKETOPA 27

 

Ona ua talia ma le atoatoa e le Komiti Fa'afoe a le PNRS le talosaga a le TOA Taxi Stand e fa'atautaia ai le latou tautua mai le Eleele sa toina mo Samoa Tuto'atasi i Tafuna, o lea ua aloa'ia ai le aso 27 Oketopa, 2017 e amata ai ona fa'aaoga e i latou lea eleele.

 

Ua fa'ailoa mai e le pulega a le TOA Taxi Stand, o le aso lea e leai se sauniga fa'apitoa e fa'atautaia ai, ua na'o na amatalia ai o le latou galuega. Peita'i o le agaga o le fa'afetai ua latou fa'auia mai mo le Komiti Fa'afoe a le PNRS ma le Malo o Amerika Samoa ona o le talosaga ua talia fa'afatueleele.

 

O lo ua fa'afetaia fo'i e i latou ma le sao o le Konesula o Samoa i Amerika Samoa, Auseugaefa Va'asatia Poloma Komiti, ona o le fesoasoani sa ia gapatia ai ina ua fa'auia mai le mataupu e le afioga le Palemia o Samoa, Tuilaepa Malielegaoi, na te va'aia toto'a le matou talosaga ma pasia lelei ai.

 

Ua mae'a taoto i le PNRS le tusi a le Palemia, fa'apea ma le fa'atagaga a le afioga ia Auseugaefa ina ia fa'aaogaina ai lea eleele ma le fale o tu ai, mo le TOA Taxi Stand.

Comment Here