Ads by Google Ads by Google

Tala I Vaifanua


[ata: SN]

300 TAGATA FAIGALUEGA MATAGALUEGA O AOGA E LE'I TOTOGIA

 

Ua fa'ailoa mai e se tasi o sui lautogia o le Matagaluega o A'oga pe tusa o le 300 tagata faigaluega a le matagaluega lea ua le maua ni siaki totogi i lenei fo'i lua vaiaso ua mae'a faigaluega ai, ona o tulaga fa'aletonu o le seleni fa'asoa.

 

"Na ta iloaina lava i le fa'aiuga o le vaiaso e le o maua lata siaki i le aso, aua na fiu lava e fa'aulu le card i le masini, ae sau lava e leai se tupe ua teuina i ai. O matou lea e fa'auia le siaki aga'i i le teugatupe i faletupe, e maua lava i le fa'aiuga o le vaiaso a'o lumana'i le aso Gafua lea e maua ai siaki pepa mo isi sui uma o le aufaigaluega,” o se tala lea a le tama'ita'i faigaluega lea sa ia fa'ailoa maia lenei omiga.

 

"O le faigata lava, ona e le mafai ai ona fa'aleleia ota maka i le faletupe aua o lo'o totogia fo'i matou nogatupe sa fa'atau ai meatotino, a misia fo'i ua tauau la ina fa'aletonu ai maka i le faletupe ma le toe mafaia ai se isi nogatupe i le lumana'i aua le atina'e o aiga."

 

Ua fa'ailoa fo'i se fa'aletonu tau le vaega a le ASHSAA, lea e fa'afaigaluega ai tagata e ave ma fa'atonu ma faia'oga mo ta'aloga o le Soka, Volleyball ma Basketball a a'oga maualuluga. O se taimi umi ua le maua ai se mea'ai a lenei sui faigaluega i tulaga o Faiaoga ma Fa'atonu mo 'au Soka, ae o lea fo'i o le a toe amatalia le isi ta'amilosaga mo le Soka a tama'ita'i, soso'o ma soka a Ali'i o a'oga maualuluga lava.

 

"O le mea e fia iloa, pe i ai ea se totogi, pe leai, a'o ai fo'i e aumai ai, aua o lea fo'i e feoa'i ma tusi pasi lelei mai le FIFA ma le Asosi Soka a Amerika Samoa na ala ai ona maua lea avanoa e faigaluega ai mo ta'aloga a le fanau aoga maualuluga,” o se tala lea a sui e to'alua na sulufa'i mai i le Samoa News.

 

Ua mae'a talanoa mai le sui iloga o le Ofisa o le ASHSAA ma fa'ailoa mai o le a maua totogi uma o le vaega e 300 lea e le'i maua i le aso ananafi latou siaki, o le tala autu mai lea a le ali'i Teutupe a le Malo, Ueligitone Tonumaipe'a.

 

"O le taimi nei ua fa'ailoa mai, ua toe saunia uma siaki totogi mo se aso o le vaiaso nei, faatasi ai ma totogi o Faia'oga po'o fa'atonu o ta'aloga eseese o lo'o fa'atautaia mo fanau a'oga maualuluga.”

 

TAUTUA ASOSI TA"AVALE LA'U PASESE "TOA TAXIS STAND"

 

Ua fa'alauiloa mai e le Sosaiete a Aveta'avale Laiti a le 'Toa Taxi Stand' o le a latou tatalaina le latou nofoaga fou e tautua ai le atunu'u i le as 27 Oketopa.

 

O le nofoaga fou lenei, o le fasi fanua lea ua toina e le malo o Amerika Samoa mo le Malo Tuto'atasi o Samoa i Tafuna.

 

I le tatou tala na fa'alauiloa atu muamua ai lenei talosaga sa fa'auia i le  Komiti Fa'afoe a le PNRS mo le pasiga a lea vaega o le Malo, ona fa'aaoga lea eleele mo le latou tautua lautele.

 

"Ona o ala lava o le tulafono, e ao ona fa'amalie atoa vala o le tulafono e a'afia ai pisinisi fa'atautaia i eleele o Amerika Samoa ma e tatau fo'i ona le fa'atu'iese i ai se tasi o alaala tulata i lea nofoaga, po'o pisinisi ma tautua lautele o lo'o fa'atautaia mai i lea vaega patino o le atunu'u e tutula'i ai lea pisinisi tau fa'atu,”o se saunoaga lea a le susuga Tuitama'i Emanuelu Ulberg, le peresetene o le Toa Taxis Stand lea o le a fa'atautaia mai lea eleele o Samoa.

 

I le taimi na fa'aulu ai le latou talosaga i le Komiti Fa'afoe a le PNRS, sa latou fa'aofi atu ai tusi mai le Malo o Samoa e fa'ataga ai le ali'i Konesula Auseugaefa Va'asatia Poloma Komiti, e na te filifilia ai se kamupani po'o se tasi e fa'aaogaina lea eleele mo ni fefaataua'iga po'o se auaunaga mo le mamalu o tagatanu'u o Amerika Samoa, ae le'i finagalo le Malo o Samoa e fa'atula'ia ai se auaunaga.

 

SUIA LE PULEGA A'OGA MARIST ST. FRANCIS LEPUA & MONTESSORI

 

Ua fa'ailoa mai e Moseniolo Viane Etuale le suiga fou o lo ua fa'atautaia le A'oga ua tu'ufa'atasia ai le Marist Brothers ma le St Francis i Lepua.

 

"O le taimi nei ua lafo atu i le itu i sasa'e atoa o le Pule'aga Samoa Pago Pago e amata mai i Faga'alu se'ia o'o i Alao, e latou te fa'atautaia le fa'agaoioiga atoa o lea a'oga, fa'atasi ai ma le Montessori, ma ua fa'ailoa ane lea fa'ai'uga a Epikopo Peter Brown ia Moseniolo Etuale e ao ina fa'atautaia ai a'oga i lenei tausaga a'oga ma soloa'i atu i tausaga o lumana'i."

 

O lo ua mae'a tofia fo'i ni sui loto tetele ma le galulue malosi e to'a valu ina ia faia ma latou matafaioi lenei vala'au, ma ua va'aia fo'i suiga tetele talu ona tula'i mai lea suiga fou i lau va'aiga lautele i faleaoga ua atofaina.

 

"O le tau aofai o le suiga ua va'aia nei i nei falea'oga, e silia ma le $10,000 e fa'afetaia ai fo'i le vasega o ta'ita'i totoa na totofi ma ua mae'a fa'atino le latou galuega matagofie,” se tala mai lea a Moseniolo Viane Etuale.

 

E lima a'oga ua aofia i le Pule'aga Samoa Pago Pago e aofia ai Fa'asao Malisi High, St Theresa Elementary, Marist St Francis i Lepua, Fatuoaiga Montessori ma le Mary the Mother Montessori i Lepua fo'i.

 

O lo ua avea nei le ali'i Moseniolo ma Pule A'oga i le Marist St. Francis ae o Akenese Iosefo ua avea ma Pulea'oga i le Mary The Mother Montessori i Lepua.

 

O a'oga nei a le Marist Brothers ma le St Francis School na amata fa'atuina mai po'o le vaitausaga 1950 ma ua iloga le to'atele o tagata matutua i le taimi nei sa latou fa'ailoa o iina sa amatalia ai ona a'o'oga, ma e pele fo'i ia i latou a'oga nei.