Tala I Vaifanua


Audrey English i lana ulua'i taumafaiga e fa'aalia lana taleni pese e ala i le pu'eina o ana CD pese mo fa'asalalauga. O le taimi fo'i lea ua ia tapu'ea ai lana ulua'i kaseti pese lea ua fa'aaogaina nei e le ata tifaga "Fortitude 1" le Autumn. [ata: foa'i]

ALO O AMERIKA SAMOA I MUSIKA FA’AAOGA ATA TIFAGA

 

O le tama'ita'i o Audrey English, o le alo o Ane Ah Foon ma le ali'i Pailate o John English, ua o'o nei ana taumafaiga i le musika e fa'aaogaina ana pese i ata tifaga, ma ua tele fo'i ona CD pese ua mae'a tapu'eina ma fa'atau i maketi i fafo ae maise i le teritori.

 

O ia o le ulumatua o le fanau a Ane Ah Foon, sa tusitala i le Samoa News, ma fa'aipoipo ia John English i le vaitausaga 1990.

 

Na soifua a'e o ia ma sa masi'i lona aiga ona o galuega a le tama, ma e tele fo'i se vaitau o lona soifua talavou sa ola a'e ai i Guam, lea sa fa'amautu ai lona aiga aua sa Pailate si ona tama i le Kamupani Va'alele a le Continental Airlines.

 

Na soifua fo'i i latou i sina vaitau i Hawaii ona o galuega lava a John English.

 

O lana pese muamua sa pu'ea e Audrey i lona potu moe ma na fa'aigoaina o le "Autumn" ma ua fa'aaogaina nei e le Kamupani Televise a le Dubai One i le latou polokalama o le "Fortitude 1" ma ua fa'asalalauina fa'ala'uaitele fo'i i le Iunaite Setete pe afai e te su'ea i le YouTube.

 

O le taimi nei, ua fa'afeso'ota'ia o ia e le "American Idol" ma le "The Voice" peita'i, o lo'o pisi Audrey e talanoa ma le tele o le au faipisinisi Pese. E le'i faia e Audrey sana fa'ai'uga, pe mata e tauva i nei so'otaga ua o'o atu.

 

I le taimi nei o lo'o tusia ma pu'e pese a Audrey mo nisi o Fapisinisi Pese i New York ma Los Angeles, ua i ai fo'i ma isi ana pese ua tapena mo ana feso'ota'iga ma nisi iloga i le Musika ma Pese mai Lonetona ma Paris, Falani.

 

Ua fa'ailoa mai e le tina, Ane, "Ou te mautinoa na tu'uina fa'apitoa e le Atua lea taleni pese mo Audrey, ua ia tatalaina fo'i faitoto'a mo ia i avanoa ua ia filifilia e na te gafatia ona fa'atautaia ma ola ai. O le fa'afetai lena e si'itia pea i le Atua, mo lana foa'i taua i le afafine."

 

Ua le gata i Audrey le fa'atonu a le tina Samoa i lana fanau teine e to'atolu: "Ia outou manatua le fa'amuamua e ave i le Atua, aua e le mafai ona e aga'i i luma ma maua ou mana'oga ma taleni pe afai e te le toe fa'afo'i le fa'afetai i le Atua i mea uma. O le olaga lena sa ola a'e ai lo outou tina, ma e fa'aauau pea se'ia o'o ina outou matutua ma fai fo'i tou aiga."

 

E le gata i lea, sa fa'atepa pea e Ane nai ona alo tama'ita'i i le olaga sa ola a'e ai, na'o le kitara e ta e si ona tama faifa'ato'aga i Leulumoegauta, e nonofo uma ai, e leai se eletise ma se paipa o le suavai e o'o i ai, ae fa'atali le timu i kalona ma tane vai. O le kitara lea e ta e lona tama o Sonny Ah Foon ae pepese uma i ai i latou ma si o latou tina Rona Apulu Ah Foon.

 

"O pese e le mafai ona galo, Le Manutagi e,...Manu o le vaveao, o na pese e le taitai ona galo upu, ae o le fiafia latou e usu. Fa'afetai i le Atua ona o le fa'asoa o lenei taleni i le fanau. O taimi fo'i na o'o atu ai tamaiti e asiasi i nai o'u matua, ua te'i si toeaina i le fesili i ai o teneiti e fia fa'alogo i Le Manutagi e."

 

"O lenei teine pese o Audrey, e fiafia tele i le Palusami ma le talo, ae maise le Koko Samoa ma ua matua maua lelei fo'i e ia le fati ma upu o le "Le Manutagi e." O sana tala mai, "O le pese lea, ua ou taumafai ia maua lelei, ina ne'i galo ia te a'u, le olaga sa soifua a'e ai si ou tina, ma ou te fiafia tele e fa'ailoa o a'u o le teine Samoa moni lava!"

 

O lea pese, ua mafai ona ia fa'alauiloaina, "O se pese aualofa ma e fa'ailoa atu ai lo'u agaga alofa tele i o'u matua matutua o Rona ma Sonny Ah Foon o Samoa ma Tafuna. "Po'o fea lava matou te aumau ai ona o le galuega a le tama o le aiga, ae o matou agaga uma lava e o'o ia John, o Samoa lava.”

 

Ua alaala nei i latou i Las Vegas Nevada ma o lo'o fa'aauau fo'i a'oga a le tama'ita'i pese. O taimi uma lava e malaga ai Audrey ina ia fetala'i ma tauamfai ana konekarate mo ana pese, e malaga fo'i lona tina e aiaiuli i si ana tama.

 

TAUSIMA’I O LE KUATA - GRACE HOME CARE

 

O le Tama'ita'i Tausima'i o le Grace Home Care ua ia mauaina le fa'ailoga fa'apitoa e taualoa ai lana auaunaga i lenei kuata Iulai - Setema 2017, ua maua lea e  Alamoana Maeva.

 

O ia o se tama'ita'i galue malosi, e le fa'atemeteme pe fa'atamala i ona tiute tau'ave i le tausiga o gasegase ua vala'auina o ia e tausia lelei. Ua matauina lona mata'alia i ona tiute fa'atino ma isi galuega fa'amaumau mo le tausiga sa'o ma le lelei atoatoa o gasegase ua atofa o ia e tausia.

 

O lenei fa'aea a le Grace Home Care e fili fa'apitoa i ai tama'ita'i ma ali'i tausima'i uma ua mae'a a'otauina e i latou mo nei faiva.

 

O Alamoana na soifua a'e i Safotu, Savaii ma ua fa'aipoipo atu i le ali'i o Jay Leonard Maeva ma e to'afa o la'ua alo.

 

"O le isi vaega tele o le galuega e ao ina lava le a'oa'oga, ia malamalama toto'a i le fa'atinoga o tiute ma ia faia galuega uma ma le fiafia, o se vaifofo sili fo'i lea e te avatua i le gasegase, ia fiafia tusa lava po'o a tiga o feagai ma i latou,” o se fa'amatalaga atoatoa lea a Alamoana Maeva.

Comment Here