Ads by Google Ads by Google

Tala I Vaifanua


Pule a'oga ECE Tafuna Fonofili Mua'ava ma se tasi o Matua lea ua fa'ailoa mai le a'ao foa'i ma le tapenaga a le PTA ma lea aoga ina ia lava sapalai o mea'ai mo le fanau a'o loma ni fa'aiteite o mea e ono tutupu fa'afuase'i i le tatou atunu'u. [ata: Leua Aiono Frost]

ECE TAFUNA - SAUNIA FA'ALAVELAVE FA'AFUASE'I TAUSIGA FANAU

 

O le aso Faraile ua te’a sa fa’atasi ai matua ma fanau a le ECE i Tafuna e amatalia le Sapalai o Mea'ai Fa'aagaaga mo le Tausiga o le fanau pe a o'o ina lutia le tatou atunu'u i ni fa'alavelave ma mana'omia ai ona tausia fanau i le ECE mo le lua vaiaso.

 

"Talu mai ona fa'amalosia mai e le Ofisa Ulu o le ECE ma le Matagaluega o A'oga le tapena ma le fa'atulaga o le se polokalama e tali atu i fa'aiteite o fa'alavelave fa'afuase'i i le atunu'u, ua faia le matou fonotaga ma matua, ma ua agaga i latou ina ia amata fa'aputu mai oloa tau mea'ai mo le tausiga o le fanau i na ituaiga o taimi fa'aletonu o le soifuaga,” o se tala lea a le tama'ita'i Pule Fonofili Mua'ava.

 

"Ua mae'a fa'ailoa mai ia i matou, e ao ina tapena le matou falea'oga aua afai ae tutupu fa'afuase'i se fa'alavelave, ua maea nofouta tagata uma i le mea e ao ina fai. Ua fa'ailoa fo'i i matua, a tutupu mea fa'apena, ona nonofo mau lea o i latou i le malu o latou fale, aua ne'i popole pe atuatuvale mai i le tausiga o le fanau i falea'oga e pei ona fa'ailoa ma fa'atonu ai i matou uma” o e toe faaopoopo mai lea a Fonofili.

 

O lea sa matua mafuli i latou e amatalia mai i le fa'amalositino - Zumba ma sisiva fa'atasi uma i ai Faia'oga, Pulega, le Fanau A'oga ma Matua. O le latou fonotaga a le PTA sa fa'amalamalama toto'a ai matua i le fuafuaga fa'ataoto a le Matagaluega o A'oga lea ua aofia ai ma le ECE, ina ia mautinoa le saogalemu o fanau a'oga i taimi o fa'alavelave fa'afuase'i e ono a'afia ai le teritori, ma mea uma e oso tatau i ai le matua e faia, o faia'oga ma pulega o a'oga e fa'atino, ia mautinoa ua saogalemu fanauiti.

 

O lenei le fe'au taua ua talaina nei i le vasega o a'oga ta'itasi i totonu o le teritori, ma ua nofouta i latou uma i le fuafuaga fa'ataoto a le Matagaluega o A'oga, lea fo'i ua so'o fa'atasi ai ma isi matagaluega uma o le Malo, ina ia o'o mai aso fa'aletonu, a'o sagatonu mafaufau o ta'ita'i uma i mea e tatau ona faia.

 

I le ECE i Tafuna e 272 fanau o aoaoina ai aua e valu latou potu a'oga ae ta'i 34 fanau a'oga i le potu e tasi ae 16 faia'oga ma le puleaoga i totonu o lea lotoa i aso ta'itasi.

 

ALIA TELE - MAE'A PASIA LE ATA AE TOE INA FAUSIA LOA

 

O le fausaga o le Alia Tele na mana'omia e Kovana Lolo Moliga, ua leva ona mae'a umia e le Matagaluega o Fefa'ataua'iga, aua o le fausaga na tu'ufa'atasia mai e le Kamupani mai Seattle Washington State, lea na manumalo i lea tauofoga.

 

O le kamupani a le A&E Design sa latou fa'atulagaina le fausaga o le Alia Tele ma e agava'a ona fagota mo le tolu i le fitu aso, e mafai fo'i ona teuina le 5,000 i le 6,000 pauna o le I'a, ae mautinoa fo'i le maualuga o le saogalemu o e faifaiva e to'atolu pe to'alima.

 

O le isi itu sili ona taua, o le tele lea o le avanoa e faia ai gaoioiga a le au faifaiva, ma ua fa'aea malulu fo'i potu i luga o lea alia mo le aufaifaiva e fa'aaogaina a'o i le vasa.

 

O lenei va'a sa fa'atupe lea e le Initeria i le vaega tupe mo Galuega Fa'atekonolosi e taua i le atina'e o teritori ma setete o le Malo tele. Ona sa avea le susuga Nikolao Pula ma fofoga fa'apitoa i le fonotaga a le Economic Development Seminar a le tatou Malo, o lea sa tatau ai fo'i ona fa'aalia lea galuega ma lona tulaga ua i ai nei, aua o le vaega tupe sa toina mai le Initeria lea sa fa'atupe ai.

 

Na saunoa Pula ma ia fa'afetaia le tulaga ua i ai nei lea galuega, ua silia ma le lua tausaga talu ona tu'uina mai le vaega tupe mo le fa'agaoioiga o le Alia Tele mo fagotaga, ina ia fa'aosofia le naunau o le au faifaiva i lo latou matupalapala.

 

Ua mae'a fa'alauiloa le fausaga atoa ma le tino mai o le Alia Tele ua mae'a ona fausia. O lo ua fa'ailoa mai e tatau ona amata ona fausia lea galuega a'o le'i mae'a le tausaga nei ae fa'ato'a mae'a fausia i le tausaga fou. Ua fa'aulu fo'i ni tauofoga mo lea galuega i e ua agava'a mo lea ituaiga o galuega.

 

Ua fa'ailoa e le susuga Moefa'auo Bill Emmsley, lea o lo'o Pule i le Nofoaga Toso Va'a a le malo, "O lo ua manatu i matou ina ia fa'aulu se matou ofo e avea ai i matou ma se tasi o Kamupani Fau Va'a e tauva mo lea galuega. Ua mana'omia fo'i ona fa'aleleia nisi o tulaga uma o le matou itu o le tautua, e tatau ai fo'i ona lava se tupe fa'asoa e fa'atino ai ni galuega toe fa'aleleia mo le Nofoaga Toso Va'a."

 

O le taimi nei e tolu i latou ua atagia mai e fa'aulu latou ofo, Tool Shop, Nofoaga Toso Va'a ma le Kamupani Korea lea ua leva ona faia ona faleinisinia i le atunu'u. O le susuga Anthony Langkilde lea sa fai ma sui o le Matagaluega o Fefa'ataua'iga na te fa'amatalaina lea folasaga e tusa ole Alia Tele ma lona tulaga ua i ai nei, aua o ia lea o lo'o faigaluega mo lea poloketi a le DOC.