SEMINA MO ATINA’E TAMAOAIGA O AMERIKA SAMOA

Na fa'atautaia le semina e fa'ailo ai o taumafaiga a le Matagaluega o Fefa'ataua'iga ia fa'aauau pea ona tima'i ma fa'amalosia tagata faipisinisi ma faifa'ato'aga ma le 'au faifaiva ina ia sologa lelei le lumana'i o le tamaoaiga o le atunu'u.

Sa fa'atautaia lea semina i le taeao ananafi i le Gov. Rex Lee Auditorium i Utulei ma na ta'ita'ia e le Fa'atonu o le Matagaluega o Fefaataua'iga Fuiavailili Keniseli Lafaele. Sa i ai folasaga fa'apitoa ina ia fa'aosofia le naunau e fa'atula'ia pisinisi, galueaina ni fa'ato'aga o so'o se ituaiga, po'o le fa'amalosia fo'i le au faifaiva e fagota.

O sui iloga e aofia ai Nikolao Pula, le Fa'atonu o le Ofisa o le Insular Affairs lea fo'i e  fa'auluulu i ai atina'e e fa'aa'e le tamaoaiga o teritori o Amerika.

Sa saunoa foi Pula i galuega eseese o lo ua mae'a fa'atupe, pe o galuega fo'i o le mana'omia ona fa'atupe mo le isi la'asaga fou ua amata ona aga atu i ai, ia fa'alautele ai le latou tautua.

"E moni lelei, o so'o se galuega lelei ona afuafua e mafai vave ona tino mai, pe afai e amata loa i mea lava ua maua. Ona soso'o mai lea ma le fa'alautele teisi pe a o'o ina gafatia e le tulaga o le sapalai ua mafai ona maua mai le siomaga, ma fa'asolo atu ai ina ua mae'a maua le fa'atupega e e fa'alautele atili ai le tautua,” o se saunoaga lea a Sosene Le'a, o se tasi o lo'o ia fuafuaina lana fa'ato'aga o le Tilapia i le atunuu.

Ua silia i le 20 tausaga le tautua Pula i le OIA peita'i o lea ua fa'ato'a tu'uina ia te ia le avanoa e mafai ai ona ia auiliilia le tulaga o fesoasoani tau tupe e toina mai i teritori atumotu o le Iunaite Setete ina ia atina'e lo latou tamaoaiga e mafai ai ona tagolima i latou e fagaina o latou tagatanu'u i taimi uma pe i ai ni lape o fefa'ataua'iga o oloa mai fafo.

O lea ua lu'ia fa'atasi le Malo o Amerika Samoa fa'apea fo'i ma Pula, ina ia faia sailiga o ala e mafai ai ona agava'a tagata faifa'ato'aga mo le tausiga o le aiga i alagatupe e fesaosoani e fa'atetele ai latou fa'ato'aga ma fa'afualoa ai le tausiga o le aotelega o le aiga.

"A mae'a amatalia lau fa'ato'aga, ona e taga'i loa lea i ala e fa'alautele atili ai lau fa'ato'aga, ia maua mai ai fo'i ma le vaega tupe e fa'aleleia atili ai le tamaoaiga tausi o lou aiga, ma o iina fo'i e mafai ai ona fesoasoani ai loa le sailiga lea ua fa'amaite nei,” o se tima'i lea a Pula.

"O a lava eleele o avanoa i o outou tuafale ma vaimaota, fa'aaoga e toto ai fa'ato'aga fuala'au 'aina ma la'au e a'ina, aua e tua i ai i tatou i taimi fa'aletonu o fefa'ataua'iga, toe tausia lelei ai le soifua maloloina i tatou mea'ai sa masani mai ai."

O le folasaga muamua lava o le Ulu ma ona aoga e gaosia ai Falaoamata, ina ia le muta i le vaitau o fuataulu le fa'aaogaina o le ulu, ae ia fa'asoloatoa. Na tapena lea folasaga a le susuga Dr Failautausi Avegalio ma sa ia fa'alauiloa o ia fo'i o lo'o fa'atupe e le Iunivesite o Hawaii ana suesuega ma sailiiliga o mea e lelei atili ai le gaosiga o le 'Falaoamata mai le Ulu' lea ua i ai nei i lona tulaga ua mana'omia ona fa'alautele atili mo le fa'aleleia o le maketi i fafo, fa'atasi ai ma le totoina ia lava le sapalai o le ulu mo le fa'aauau o le auaunaga.

Sa ia taua faapea ua mae'a le tele o galuega amata, ua amata fo'i ona vave le lauiloa o le aoga ma le lelei o lea falaoamata, ae o le fa'aauau ma le fa'alautele o le vaega sili ona taua i le fefa'ataua'iga lea, ua mana'omia atili ai le fa'atupega i masini e fa'aaoga, fa'amili o le ulu i tatou atumotu o le Pasefika, ae fa'aliliu falaoa mata mai i Amerika Samoa ma fa'atau ai o se oloa gaosi mai Amerika.

KEKE KOKO SAMOA & LAEI SAMOA MAMANU ELEI

Sa saunoa le faletua o Tina Reid e molimau i lana pisinisi na amata atu lava i le umukuka o lona fale, ae ua amata ona ia fa'alauteleina pe afai o le a maua fo'i se avanoa mo se fa'atupega tele e pei ona feso'ota'i ai ma fesoasoani a le Matagaluega o Fefa'ataua'iga.

Ona o le manogi sa'o lava o le Koko Samoa e sasala atu i lea keke,[brownie] ua ese ai le alumia i tagata femalaga'i, ua avea ma fa'aoso i aiga i fafo ma fanau.

Na amata sa ia faia mo na'o si ona aiga ma le ekalseia, ona soso'o lea ma le taumafai e faia mo nisi e oka mai ma ua faia ai loa le laisene, ia usita'ia tulafono.

Ua manumalo fo'i i le $5,000 tupe fesoasoani mai a le BOH, ua maua ai lana ogaumu tele ua mafai ona maua le 32 kuki i le 30 minute, ae le'i fa'aopoopo lava se isi tagata faigaluega. Ua le toe fa'aaogaina pepa e tele kuki e fa'aofi ai, ae ua fa'aitiitia ina ia fa'afaigofie ona lafo i le meli oka e maua mai i le Facebook lea ua i ai lana pisinisi e feso'ota'i ai ma fafo mo nisi e fia taumafa i lana Keke Koko Samoa.

Ua fa'apena fo'i i lavalava mo tama'ita'i. Ua ia fa'aaogaina lona iloa o nisi o faleoloa tetele i Los Angeles ma Honolulu e fa'auia i ai ana oloa o ofu tama'ita'i elei ma suia i ie meme'i o lo'o matele ina fiafia i ai le to'atele. Ua oka mai fo'i i luga o lana upega tafa'ilagi po'o le Facebook.

DRUG FREE - KOALISI A LE MA’OPUTASI

Ua fa'alauiloa galuega o lo'o fa'atino pea e le Koalisi a le Ma'oputasi e fa'aaogaina ai Aumaga po'o le malosi o le nu'u mai afio'aga uma o le Fagaloa, mai Aua e o’o i Faga'alu.

"O lo ua leoleoina malu le Vavao i afio'aga i aso ta'itasi, aua o le aoga tonu lava lea o le malosi o le nu'u ma afio'aga o le Fagaloa, ia mautinoa o saogalemu le talafatai o le Fagaloa po'o le Ma'oputasi, ma ua sao ma uli le moliga o talosaga i le Atua i afiafi ta'itasi i afio'aga uma,” o se fa'amatalaga lea a le Fa'atonu o le Koalisi a le Ma'oputasi Fofoga

I le taimi  leoleoga, e latou te tutu fa'atasi ma leo afio'aga, ae a mae'a fo'i tiute i le afiafi, ona faia lea o le latou sauniga lotu ma ta'ape ai i aiga e sauni mai mo le leoleoga i le itula e 9:30pm mo le fa'asa a fanau a'oga ona toe feoa'i, ae ua o'o i taimi o malologa.

O i latou fo'i nei sa latou tapenaina le 3,000 lipine mumu mo le fa'ailo o lou sapaia o taumafaiga a le Malo o Amerika Samoa ma Koalisi a le Ma'oputasi ma le Sa'ole fo'i ina ia le toe tagofia nei mea o fuala'au fa'asaina, ma le ulaula tapa'a.

Ua tofu toniga fo'i le Koalisi a le Ma'oputasi i le lanumumu ma ua leoleoina fo'i le Sa i afio'aga uma, i a latou toniga uma lava ua maea tapena e le Komiti fa'afoe o le Koalisi.