FAIA’OGA O LE TAUSAGA 2017-2018 - ROSELEE SHOULDERS

Ua mae'a le iloiloga ma sailiiliga a le Teacher Quality a le Matagaluega o Aoga ma ua fa'aeaina nei le tama'ita'i faia'oga a le A'oga Mauluga a le VocTech High i le pale o le avea ma Faia'oga o le Tausaga 2017-2018, Rosalee Shoulders.

I lona soifua galue ai o le faia'oga, o lo'o ia aoaoina le History, American Government, ma le American History mo lea a'oga maualuga, ma o se fiafiaga ia te ia le a'oa'oina o fanau o lo'o autova'a atu i le a'oga maualuga o Matata Eseese.

Ua atoa nei le 9 o tausaga o lo'o avea pea ma tagata faigaluega a le Malo o Amerika Samoa ma o lo'o fa'aauau ona sailiili lona fa'ailoga Doctorate i le Mataupu Tau Faia'oga Ed. D. i le Iunivesite o Grand Canyon.

I le tausaga 2010 - 2014 sa faia'oga mai ai o ia i a'oga tulaga muamua ma sa galue ai i le Tafuna Elementary School mai le Level 1, Level 4 ma le Level 6, peita'i na amata mai ona avea ma faia'oga i Pavaiai Elementary ma sa faiaoga i le Level 2 ae o le tausaga a'oga 2009 na si'itia ai ma faia'oga i Manu'atele i le a'oga a le Faleasao Elementary ma sa avea ma faia'oga o le Level 3.

O le a maua se avanoa e fa'alauiloa ai ana tapenaga mo lenei tauiviga sa feagai ma ia, peita'i o le tama'ita'i sa la'ua tauva o se sui o faia'oga uma mai A'oga Tulaga Muamua uma, o le tama'ita'i faia'oga mai Matafao Level K5.

O le tausaga ua te'a sa manumalo ai le tama'ita'i o Donna Love Ili mai le aoga maualuga fo'i a le VocTech High, peita'i o lea fo'i ua toe pale mai lenei tama'ita'i faia'oga mai lea lava a'oga i lea tofi.

FA’AMANATU 8 TAUSAGA GALULOLO I AMERIKA SAMOA

O le aso To'ona'i na te'a sa le utuva lava le fa'amanatuina o le lutia ai o le atunu'u atoa i le Galulolo tele o le tausaga 2009, ma sa fa'amau fa'ailogaina i le lolofi atu o tagata i le Healing Garden i Leone mo le latou sauniga fa'apea fo'i ma nisi sa auai atu i le lotu fa'amanatu i le Paka Liona sa tapena i ai le Rotary Club of Pago Pago ma le Hawaiian Air.

Sa tutula'i ai Rev. Iasepi Ulu mai le Ekalesia Fa'apotopotoga Kerisiano i Fagatogo,  mo le sauniga, ma na auai le to'atele o i latou o aiga ma sui o le Kamupani Vaalele a le Hawaiian Air ma totino fo'i o le Kalapu a le Rotary Pago Pago.

Na tapena teu fugala'au matagofie mo lea sauniga ma o le tama'ita'i o Sandra King Young sa ia saunia fa'apitoa le teu Oketi mo le ma'a fa'amanatu lea ua tusia uma ai suafa o i latou na maumau le ola ona o lea fa'alavelave fa'anatura ia Setema 29, 2009.

Sa auai le faletua o le Kovana Sili, Cynthia Malala Moliga ma le susuga fo'i le fa'atonu o le Matagaluega mo Alamanuia  & Tautua mo Tagata Lautele DHSS ma sa faia lona sao i sana tautalaga fa'apitoa mo lea aso, e faia ai o ia ma sui o le Malo i lea aso iloga.

O le susuga fo'i le Peresetene o le Rotary Club of Pago Pago, John Raynar sa ia tula'i e fa'afeiloa'i i latou uma na auai i lea sauniga ae o le susuga Tofa Sualauvi Si'a sa avea ma fofoga o le polokalama fa'asolo mo lea lava fa'atasiga.

Na tu'uina fo'i le avanoa i le fa'atina o le atunu'u mo sana tanoga e fa'anofo filemu ai fo'i agaga o'otia ma le tulaga pagatia o aiga ona o le to'atele o e pele sa amia le soifua ona o lenei fa'alavelave matuia.

"Ia tatou maua le filemu o le Atua, aua e tele mea tatou te tapena i ai, ae le maua le saogalemu pe afai tatou te le o i le Atua o le filemu moni lava! Ia tofusia i tatou i lona alofa tunoa, ma ia saga maua e i tatou ana fa'amanuiaga i aso ta'itasi,” o se tasi lea o vaega o lana tuleiga.

O lenei tausaga fo'i ua pa'aga ai le Hawaiian Air ma le Rotary Club mo lea fa'amoemoe, ma sa maua fo'i le avanoa o le tama'ita'i o Marianna Timu Faiai mo lana saunoaga fa'afetaia i latou na pa'au mai, ae toe fa'aopoopo fo'i le fa'amanafana i le to'atele o aiga o lo'o o'otia ona o le misialofa i a latou pelega na maliliu i lenei galulolo tele 2009.

Na tu'u avanoa fo'i i le mamalu sa aofia mo so'o se tasi e fia saunoa e tusa o lea aso iloga, ma ina ua mae'a lea sa toe si'itia le tatalo fa'ai'u ma laulauina loa le tali malo e ala i taumafa sa latou saunia lelei ma mae'a ai lea sauniga.

Ua fa'ailoa fo'i le sapaia o lea sauniga e le vaega o Paka ma Malae Ta'alo a le tatou Malo fa'atasi ai ma le Hawaiian Air ma le Rotary Club of Pago Pago.