Tala I Vaifanua

TU’UFA’ATASIGA FESOASOANI MO I LATOU MAFATIA I AFA

 

Ua fa'alauiloa taumafaiga e sailia tupe mo ni fesoasoani mo i latou uma sa afatia i setete ma teritori o le Iunaite Setete o Amerika.

 

Ua tofia sui mo lea fa'amoemoe ina ia sailia i ala e fa'afaigofie ai ona tu'ufa'atasia le fesoasoani ma toe fa'auia atu ia aoga ia i latou ua i ai le mana'omia i lenei vaitau fita.

 

E ese mai le auina atu i na setete ma teritori, ae ua fa'atulaga fo'i ala o sailiga ina ia tofu sao uma i ai tagata uma, e aofia fa'atasi ai ma pisinisi ma fa'alapotopotoga uma, ekalesia ma le Malo.

 

O lea lava fo'i sailiga e tasi, ua fa'ailoa mai, o le a avea ma ala e fa'atupe ai fo'i e Amerika Samoa se vaega tupe fa'aagaaga mo fa'alavelave fa'apea e ono afaina ai le atunu'u i le lumana'i.

 

Totino o lea Komiti mo Sailiga Fesoasoani: Fa'atonu o le Homeland Security Samana Semo Veavea, Director of Public Information KVZK-TV Tuimavave Laupola Tauapai, Taitaifono o le Komiti Fa'afoe o le Koluse Mumu Vaito'a Hans Langkilde, ma o ia lea sa mafai ona o'o ane e fa'alauiloa lenei fa'amoemoe i luga o le KVZK ma le siufofoga Samoa Sunrise.

 

O le a faia tusi e talosaga ai foa'i mai fa'alapotopotoga, Ekalesia, afio'aga fa'apea Matagaluega uma o le Malo ma fa'alapotopotoga tumaoti atoa ai ma pisinisi.

 

O le a fa'aaogaina fo'i feso'ota'iga tau telefoni e faia mai ai foa'i ma e to'esea mai i le tupe o aofia i lau telefoni lea meaalofa, e fa'aaogaina uma ai telefoni Blyuesky ma le ASTCA fo'i. Ua fa'atulaga le aso 18 Oketopa se'ia o'o i le aso 28 Oketopa e fa'atautaia ai le aotelega o nei foa'i.

 

O le Sailiga tupe tele ua fuafuaina o le Radiothon ma le Telethon ia Oketopa 28 mai le 6:00 i le taeao se'ia o'o i le 4:00 i le afiafi. A maea loa i le afiafi ona soloa'i lea o le fa'amoemoe i le Fale Laumei i Utulei le Telethon ma e faia ai ma fa'afiafiaga ma ofo atili ai fo'i isi foa'i ae o le a fa'alauiloa i le televise KVZK-TV.

 

TA’ITA’IFONO MA LE PULE SILI O LE ASTCA

 

Ua fa'ailoa mai  e le malo ua tofia le afioga Faiivae Alexander Godinet ma Taitaifono o le Komiti Fa'afoe o le Ofisa o Feso’otaiga (ASTCA). O ia lea ua suia Puleleiite Tufele Li'amatua Jr i lea sa ia tau'avea maia ma toe avea fo'i ma Pule Sili o le ASTCA.

 

O se tusi fa'alauiloa mai a Kovana Lolo Moliga i Matagaluega a le malo, o lo’o taua ai le fa’amavae mai le tofi ta’ita’ifono, ae ua tofia o ia e avea ma pulesili o le ASTCA.

 

Ua tofia fo'i e le kovana Kenneth Tupua e avea ma Sui Fa'atonu o le Paka ma Malae Ta'alo se'ia toe sailia se isi Fa'atonu mo lea matagaluega i se taimi o i luma.

 

O lea tofiga ua faia e le Kovana ina ua mae'a fa'ao'o ane le tusi fa'amavae a le susuga le Fa'atonu sa tula'i i lea matagaluega, Pili Gaoteote.

 

O tasi o tofiga a le kovana, mo Siafaga Pearson, ua avea nei ma so'oupu mai le Ofisa o le Kovana mo le Manu'atele. O ia lea o le a avea ma se tasi e siakia le tele o galuega i Manu’a ma o le a faia fo'i o ia ma sui e asiasia ma va'aia toto'a galuega o lo'o fa'atautaia i Ta'u, Ofu ma Olosega i le taimi nei.

 

FA'AFOUINA LAISENI PISINISI 2018 MA ASIASIGA I PISINISI

 

E fa’amanatu atu e le Matagaluega o Atin’ae ma Fefa'ataua’iga i le 'au fai pisinisi, e fa'amutaina le aoga o laisene pisinisi o le tausaga 2017 ia Tesema 31, ma o Oketopa 1, 2017 e amataina ai le fa'afouina o laisene pisinisi uma i le Teritori.

 

O pisinisi e le'i fa'afouina laisene pisinisi ia Ianuari 30, 2018, o le a taofia le fa'afoeina o ia pisinisi e tusa ai ma le tulafono a le malo o Amerika Samoa.  E iai sala tupe e totogia i le Matagaluega o Tupe a le malo pe a tuai ona fa’afouina laisene pisinisi.

 

Ua le gata i lea, o le a fa'atautaia asiasiga masani ma asiasiga le fuafuaina a le Matagaluega o Atin’ae ma Fefa'ataua’iga i pisinisi uma o le Teritori. E fa’atalosagaina ai pisinisi uma ‘ia fa'apipi'i laisene pisinisi 2018 i totonu o le pisinisi i se tulaga e fa'afaigofie ona va’aia. Afai e le'i tau'a'aoina atu lau laisene pisinisi ‘ae ua uma ona fa'afouina ma totogia, ia umia ma fa’aalia le risiti e fa'amaonia ai ua uma ona totogi lau laisene pisinisi.

 

Mo le 'au fai pisinisi i Manu'a, o lo’o iai le aufaigaluega e galulue mo le fa'atinoina ‘au’aunaga a lenei Matagaluega i le Manu'atele. Fa’afeso’ota’i Fa'aaloalogaalii Leama-Lemai i le Ofisa a le Malo i Ofu i le 655-3478 ma Salataima Filoialii-Young i le Ofisa a le Malo i Ta'u i le 677-5749.  Mo nisi fa'amalamalamaga fa'afeso'ota'i  Matagaluega i le 633-5155.

 

OFISA AUTU ‘FUSIA LE SAOGALEMU AMERIKA SAMOA’

 

O Seteme 22 na fa’atuina ai e le Matagaluega o le Puipuiga o le Saogalemu Faalotoifale le Ofisa Autu e Fusia le Saogalemu o Amerika Samoa" ma e fa'avaeina lea i le so'otaga o matagaluega e 6 o le malo i le taimi nei.

 

O nei matagaluega e galulue so'ofa'atasi i le "saogalemu o tagata ma meatotino uma o Amerika Samoa" ae o le fa'amalosiga atili fo'i lea o le matafaioi tau'avea a nei matagaluega uma o le a fusia i lenei fa'amoemoe e tasi.

 

O matagaluega nei: Mataglauega o le Puipuiga o le Saogalemu Lautele, Matagaluega o le Puipuiga o le Saogalemu Lautele, Matagaluega o Mataupu Tau le Tulafono, Femalaga'iga & Ofisa Loia Sili; Ofisa o Tiute, Matagaluega o le Gataifale & Vaomatua ma le Matagaluega o le Pulega Uafu ma Malae Va'alele.

 

O le taumafaiga lenei, ina ia le utia pe milosia fa'atasi le mamalu o le atunu'u i soligatulafono tau le fefa'ataua'iga ma le fela'ua'iga o fuala'au ma vaila'au fa'asaina faaletulafono e pei ona fa'amalosia nei ona sailia patino e le Ofisa o Leoleo.

 

E na o Amerika Samoa e le o i ai sona Ofisa fa'apea, ma ua talafeagai fo'i ona fa'ata'ita'ia le teritori i lenei tautua fusia fa'atasi, ia mautinoa le saogalemu o tatou tagata i ala o solitulafono nei, ua faigata ua o'o mai i totonu o a'oga maualuluga ala o latou fa'atauga.

 

O lenei Ofisa Fusia Fa'atasi o le a avea fo'i ma sootaga o tautua fa'alotoifale e puipuia malu le saogalemu o tagata ma malo tele. O le latou matata o le mautinoa tonu lea ua fefa'asoaa'i mai le tele o fa'amaumauga ma tomai e moomia e o tatou tagata galulue e tausia le filemu, le va lelei ma le saogalemu o tagata uma.

 

E le gata i lea, ae o le a avea fo'i le Ofisa e galulue so'oso'o tau'au ma auaunaga fa'apa'aga ma le feterale e pei o le US Coast Guard, US Dept Homeland Security ma le Federal Bureau of Investigations, ae maise isi Ofisa e Fusia le Saogalemu i Amerika.

Comment Here