Tala I Vaifanua

98 AU FA’AU’U ARGOSY UNIVERSITY - SETEMA 29

 

E fa'ataunuuina lava le Fa'au'uga o le Vasega Fa'au'u a le Argosy University lea sa fa'atulaga mo le aso Faraile 29 Setema, 2017 ma e faia lea i le Gov. Lee Auditorium i Utulei. Ua toe suia le fuafuaga sa mua'i fa'ataoto i le amataga o le tausaga a'oga, ona ua le to'ai taunu'u mai le tele o totoga o totoe mo le Ofisa Autu o le Argosy University, lea ua ala ai ona toe suia mai le nofoaga e fa'ataunu'u ai le fa'au'uga o lenei tausaga.

 

"O le fa'amoemoe lava sa loma, ia tatala le fale fou mo le Iunivesite ia Setema 27, ona faia ai loa lea o le fa'au'uga lenei ia Setma 29, peita'i ua le talafeagai, ona o le tulaga o le la'uina mai o totoga o totoe mo le fale ma le anofale o le falefou lea i Tafuna,” o se tala lea a le fa'atonu o le Argosy University i Amerika Samoa, Fanuatele Dr. Toafa Vaiaga'e.

 

E to'a 98 i latou o le a talia o latou fa'ailoga e amata mai i Associates Degrees, Bachelor Degrees, Masters Degrees ma le to'atolu e taua'aoina fa'ailoga "Doctrate in Education."

 

O le auau o lenei Fa'au'uga ua fa'aupuina, "Aua Le Fa'atalatu'u A'o Taumafai e Saili Measili - [Never Procrastinate when Striving to Attain The Best!].”

 

O lo ua faatulaga o le afioga le Kovana Sili Lolo Matalasi Moliga o le a tula'i mo lana saunoaga i le fa’auuga. O le fofoga fa'apitoa mo le vasega fa'au'u ua filifilia ai i latou le tama'ita'i Peresetene o le Kolisi Tu'ufa'atasi a Amerika Samoa, Dr Rosevonne Lorraine Luava'asi'itia Makaiwi Pato.

 

O lo'o aofia i lea to'atele o le 'au fa'au'u o nisi ua mae'a a'oa'oga i le Iunivesite o Chaminade, Devry ma Walden University e to'afa o le a talia fa'atasi ai i lea laina o le 'au fa'au'u a le Argosy.

 

O nai toe tima'iga mo le vasega fa'au'u, lea ua fa'ailoa mai e faia le latou pu'ega ata i le Pago Plaza i le aso To'ona'i nei, ma ua mafai fo'i ona molimauina e nisi o aiga, pe afai e fia maua se avanoa e pu'ea ai ata o fanau.

 

TALAVAI FALEMA’I FA’ALEITUMALO

 

Ua fa'ailoa mai e le Ofisa o le Medicaid a Amerika Samoa, o pili uma sa totogi mo talavai i Falema'i Fa'aitumalo ua fa'agafua uma nei. O falema'i fa'aitumalo e aofia ai Tafuna Health Center, Amouli Health Center, Leone Health Center, Ta'u & Ofu Health Centers i le Manu'atele.

 

O lona uiga, o tagata uma lava o lo'o alaala i Amerika Samoa, ua mafai ona va'aia foma'i mo so'o se talavai, e afua mai talavai mo nifo, va'aia foma'i e siaki i so'o se gasegase, fa'apea ma talavai a tamaiti, ua faia fua uma lava. Peita'i afai ae fa'ailoa mai e ao ina tala ni au vai mo togafitiga, e totogi la au vaila'au ma fuala'au fa'atulagaina e fomai e fa'afo'ia ai lou gasegase.

 

Ua mafaia lenei suiga lelei ona ua mafai ona galulue vavalalata le CMS ma le faigamalo a Amerika Samoa ina ia fa'atulaga se ala e mafai ai ona totogia talavai e faia mai falema'i fa'aitumalo i le atunu'u e le Medicaid. E ui ina umi ma fita le ala sa saili ai, ae fa'afetai i le tapua'iga a le Atunuu, o lea ua a'e malo lea fo'i talosaga ma fa'aauala ai lea fesoasoani taua mo le tausiga o le soifua maloloina lelei o le lautele o le atunu'u.

 

O le fa'anaunauga maualuga o le Medicaid, e tatau ai ona latou fesoasoani e una'ia tagata lautele ina ia faia talavai e siakia ai latou soifua maloloina, ina ia vave iloa o lo'o gasegase ma fa'auia ai togafitiga a'o le'i afaina tele tagata.

 

O le ala lea e fa'atulaga ai e le Medicaid le fesoasoani e una'i malosi tagata e faia siakiga i so'o se gasegase, ma ua agava'a ai fo'i i latou i talavai e totogi ae toe fa'afo'i mai e i latou le tinoitupe sa totogia o nei talavai.

 

"Peita'i, e ao ina silafia e le atunu'u, o lo'o i ai le sao o le Malo e ao ina faia, fa'ato'a maua ai lenei fesoasoani. E tatau ona totogia e le Malo le tinoitupe e tutusa lelei ma le aofai o lo'o totogia mai e le Medicaid, ona toe fa'auia mai lea o totogi o talavai a le mamalu lautele o le atunu'u,” o se fa'amatalaga lea a le Ofisa O le Medicaid a Amerika Samoa.

 

"O le ave'esea la o le totogi mo le talavai sa masani ona fa'ae'e i le tagata e fia va'aia le foma'i, ua fa'anaunau atili le Medicaid ma le Matagaluega o le Soifua Maloloina o le atunu'u, o le a to'atele i latou uma e gasolo e faia siakiga o latou tino ma oloa, ina ia fa'amausali atili lea fo'i mau, e ao ina mautinoa ua puipuia nai lo le tau togafitia mulimuli ane,” o le toe tima'i lea a le Medicaid Office, i le mamalu o le atunu'u.

 

Manatua o lo'o siaki fo'i Kanesa o so'o se ituaiga i itula ua manava ai galuega, o gasegase lautele ua masani ai i tatou, ae maise o itula masani o talavai e mafai ona siakia ai po'o ua e ma'i suka ma le toto maualuga, o gasegase e matele maua ai le to'atele ae le manana'o e vave iloa patino. Lea ua fa'agafua lava le totogi ina ia una'ia ai oe lena e faia vave talavai, mafai ona fa'afo'ia i togaifitiga, ma e toe malosi ma fa'aumiumi ai le soifua.

 

O lo ua i ai fo'i ali'i foma'i mai le Uniformed Services University mo le tolu vaiaso, lea ua toe lua vaiaso, e mafai ona va'aia ma siakia leleia lou soifua maloloina, ma o se fesoasoani tele fo'i i tatou foma'i o lo ua tatou masani ai, ina ia fa'avave atili siakiga.

 

O foma'i nei e fa'atulaga mai lava so'o se Tausima'i Pasi ua toetoe a maua latou fa'ailoga Foma'i, lea e agava'a e siakia gasegase nei i le Primary Care Unit i falema'i fa'aitumalo uma.

Comment Here