Tala I Vaifanua

FALEAOGA FOU & FALE TA’AALO RAINMAKER ELEMENTARY

 

I le Rainmaker Elementary i Aua ua tatala ai nei le 2 falea'oga ma le fale ta'alo e pipi'i atu i le potu Fa'apitoa o le Level K5, na umusa i le vaiaso ua te’a.

 

O le tau aofai o galuega uma nei, sa fausia ma inisia e le Nana's Construction mai Pago Pago, e $2.5 miliona, ma fa’atupeina e le Ofisa o le Initeria a le malo tele i lalo o le polokalama o galuega tetele (CIP)

 

O le faleaoga e faofale i ai le umukuka ma le fale'ai i le fogafale muamua ae fa potua'oga i le pito i luga, o lona tau e 947,000. Falea'oga e soso'o ai e lua potua'oga i luga ma lalo fo'i e 2 isi potua'oga $617,000, ma o lea tau e aofia ai ma le tele o galuega e fa'auia ese ai alavai, fausia le fausaga ia malu ma mautu atoa ai ma le pa atoa i lea itu o le Laumua.

 

O le faleta'alo o lona tau e $480,000 ma le isi fale o lo'o soso'o ane ai ua avea ma potu a'oga o le Level K5 ma le latou Ofisa e $349,000.  Sa suaina le eleele o le galuega ia Novema 4, 2014.

 

I le saunoaga a Kovana Lolo Moliga, sa ia fa'ailoa ai, "E ala ona fausia nei faletetele mo le fanau a'oga, ae o lo'o mataituina fo'i mea e fai i le afio'aga ma le itumalo atoa i lenei falelima pe a o'o ina mana'omia. O nei foi fale e mafai ona fa'aaoga i aso e fa'aleagaina ai ni nofoaga mo aiga ma le afioaga i le taimi e fa'alavelave fa'afuase'i fa'anatura, e aofia i ai tagata uma e avea ma nofoaga e tausia fa'apitoa mai ai e le malo i latou. Pau o lea e le mafai ona faia ai ni ta'aloga faitupe."

 

O le fa'afetai a le Kovana sa mua'i faia lea i le Ofisa o le Initeria, Lydia Nomura ma le latou aufaigaluega, fa'apea ma le tama'ita'i na mlaaga mai ma fa'aosofia lona lagona e ao ina fa'amalutia fanau mai le vevela o le la ma timuga pe a faia latou fa'atasiga po'o latou ta'aloga. "Lea ua tatou a'ea'e ai nei manuia."

 

I le fanau a'oga sa ia faliu ma fesili i ai,"Ua outou fiafia i le tou falea'oga fou?" E le'i tali esea e le fanau lo latou agaga fiafia ma le fa'afetai. Peita'i sa ia toe fa'amanatu i tagata uma sa sasao i lea aso, "E le faigofie ona saili ni tupe e fa'aleleia ai le tele o mea e ao ina fa'aleleia mo outou uma, e taumafai e sailia tupe e mafai ai ona fa'atino galuega fa'apenei. E ui la ina tele mea e fai, ae le tu'ua lava le galuega e ao ina faia mo fanau ae le lumana'i o le tatou atunu'u. A lelei fanau ma i'u manuia latou taumafaiga i a'oa'oga, ona fa'afaigofie lea ona fa'atautaia le malo i le lumana'i ona ua talenia i latou."

 

Fa'afetaia lea e ia o le afio'aga, "O lea ua mautu le tatou ta'iala, E a'oa'o e le nu'u atoa tatou fanau...fa'afetai fo'i la outou pitola'au ma lo outou lagolagosua. Le PTA ma lana vaega faafetai. A i ai mea e le gafatia e le Malo ona gase atu lea i lo outou titi faitama."

 

O lana fa'afetai mulimuli i le Nana's Construction, ae maise i le faletua o Fiapa'ipa'i Tuaolo Fruean, aua o lana fa'ata'ita'iga ua mulimulita'i uma atu ai isi pisinisi faufale, ia vave ma pu'upu'u le taimi e faia ai soo se ituaiga o falea'oga ma faleta'alo e fausia. E le fa'apaole le faiga, ae ua matua mautu lava.

 

Ua fa'ailoa mai i le tautalaga a le Kovana, o lo'o ua fa'asolo atu nei fausaga o faleta'alo aga'i i sisifo lea e soso'o ma Matafao ma a'oga tetele i Nuuuli ma Pavaiai.

 

O le lipine e tatalaina ai le galuega sa toto'o i ai le Tina o le EFKAS i Aua ma le tama'ita'i Fa'atonu o A'oga, Ruth Matagi-Tofiga.

 

O le faletua o Faleosina Faiai Voight sa taua'aoina le ki ma faia le tala'aga o le galuega atoa ai ma le tu'uina aloaia atu o le fa'atagaga ina ia fa'aaogaina ai le falea'oga uma e tolu ma le faleta'alo.

 

O fa'aaloaloga uma sa alofaiva i ai le PTA ma le pulega a le afio'aga.

 

FA’AMAU FA’AILOGA 30 TAUSAGA FA’AU’U VASEGA ‘87

 

I le taeao o le aso Faraile na auai fa'atasi ai le Fa'atonusili o A'oga, Dr Ruth Matagi-Tofiga, le Pule A'oga i Samoana, Tupa'i Roderick Atafua, Fa'afegaiga EFKAS Iasepi Ulu, le PTA Peresetene , Pulenu'u o Fagatogo ma Utulei, ae maise o le vasega o sui o matua, sui totino le Vasega 1987 ae maise o le vasega ma le faia'oga o le a latou fa'aaogaina le potu a'oga ua fa'aoaina i le 20 Komipiuta ma Masini Lomitusi e lua mai le Vasega 1987 a Samoana High.

 

"O le sao lena o lenei vasega, aua e fesili ane lava po'o le a se mea ua mafai ona fai e toe tali atu ai i le Laumua sa utuvai ai, ia outou fa'aaogaina ma outou fa'apelepele i ai, aua sa fai le faiva o saili, e le'i faigofie, ae fa'afetai i le Atua mo le tamaoaiga ma le loto fuatiaifo lelei, ua au ai se 'ai e tapena ae a tupulaga nei ma le lumana'i o le a'oga maualuga i Samoana,” o se tasi lea o fuaitau sa fofogaina e le tofa Taesaliali'i Lefiti, o se sui o le vasega 1987, a'o le fofoga fo'i o le polokalama o lea taeao.

 

I le aotelega o le foa'i e 20 masini Komipiuta ua mae'a fa'apipi'ia lelei, uaea ma ua fa'aaogaina ai laina o feso'ota'iga tau initeneti, lea sa alofaiva i ai le vaega a le ERATE ma le ASTCA, 2 masini lolomi ma le 2 Meapu'eata ua mae'a fa'atutuina, ina ia mautinoa le saogalemu o nei mea uma i aso ta'itasi. O lo ua faailoa ai fo'i le fiafia tele o le puleaoga ma le vasega o faia'oga i lea laumua, aua o le foa'i e sili ona mo'omia e le fanau i a latou suesuega ma sailiga i aoga i lenei vaitau o le talutalufou.

 

Ua tagisia fo'i le puipuigamalu a le vasega o Pulenu'u o le afio'aga o Fagatogo ma Utulei, le sa auai uma i le au vala'aulia fa'apitoa, "Ia alofagia ia malupuipuia lenei potu ma lona anofale i latou outou galuega leoleo, ina ia umi o aoga nei mea uma mo fanau e autova'a mai i Samoana."

 

Saunoa Matagi-Tofiga e faapea, "Le fanau a'oga i Samoana, lea ua fa'aea outou e lenei vasega, ua atoa le 30 tausaga talu ona maea a'oa'oga i Samoana, ae toe fagufagu ane lava i o latou loto, po'o le a se mea e fai mo outou ua uia le ala sa latou savalia mai, fa'afetai fa'atasi i tatou uma ona o le loto alofa, loto foa'i, loto tautua lelei, ma le loto fefa'asoa'i manuia. Ia outou fa'aaogaina ma lo outou iloa, o lo'o soloa'i mai fo'i nisi i tua atu o outou e mana'omia lava ona latou fa'aaogaina fo'i mea faigaluega aoga ma le mo'omia. Avmae'a ona a'oa'oina outou, fa'asolo atu e saili le atamai lautele ma tusi pasi maualuluga, toe aga'i mai ma fai fo'i sou sao mo le Laumua na e utuvai ai, o le aoga lava lea i lou malo ma ona tagata.”

 

"E moni lava, a tatou galulue fa'atasi e manuia mea uma. O le isi lea galuega ua tino atili ai lea fa'amoemoe ua tatala ai a'oga o lenei tausaga."

 

Sa i ai le keke o le fa'amoemoe ua taunu'u, o le fa'aosofia fo'i lea o le agaga fiafia. Ina ua mae'a le maimoaga i le potu a'oga ua mae'a fa'atutuina ai masini komipiuta nei ma latou masini lolomi, sa toe taliu mai loa le vasega ma latou malo fa'aaloalogia uma na sasao maimoa ma molimauina lea fa'amoemoe lelei, ina ia talisua le 'aiga fiafia, ae maise o le keke fa'amanuia ma fa'aaloaloga sa pale ai fo'i le vasega o malo fa'aaloalogia e o'o lava i susuga i Pulenu'u o afio'aga e lua, ma le Faipule fo'i o le afio'aga o Pago Pago sa auai, atoa ai ma sui mamalu o le PTA.

Comment Here