Tala I Vaifanua


O le Vasega 8 ma le latou faia'oga o Ms Sene, lea ua fiafia fa'atasi e maua se latou ata i le amataga o lenei tausaga aoga fou. [ata: Leua Aiono Frost]

O le vasega o tama'ita'i o lo'o i le Ofisa o le Manulele Tausala, e fiafia e tautuaina fanau ma matua i le aso na fa'avasega e talanoa ai matua ma faia'oga e tusa o latou a'oga i lenei tausaga a'oga. [ata: Leua Aiono Frost]

O le fanau ua fiafia aua ua a'e fo'i le a'oga ae o le toe aso foi lenei o le vaiaso. [ata: Leua Aiono Frost]

Manulele Tausala - Mana'omia Tusi mo Mataupu Saeanisi & Numera

 

Ona o le aso fa'apitoa e talanoa vavalalata ai matua ma faia'oga o latou fanau i le Manulele Tausala Elementary, o ananafi sa le faigofie ai le galuega a faia'oga aua sa o atu matua i so'o se taimi lava ma molimauina a latou galuega a'oa'o o le fanau, ae maise o le a talanoa fo'i i tulaga o i ai a'oa'oga a fanau.

 

Na iloga fo'i e matua, e i ai le latou vaega e fai fa'atasi ma le faia'oga, ia taumafai ona fa'atonu le fanau, ia fa'alogo ma usiusita'i lelei i taimi o vasega. "O mea nei e lua, o lo'o tusia i le Tusi Pa'ia, e ao ina maua e le tamaititi, ona iloga lea, o le a foa'ia i ai e le Atua le atamai. Fa'alogo ma le Usita'i,” o se tima'i lea a se tasi o tina i le vasega o aofia ai lana tama.

 

Peita'i e le na'o lea se fa'aletonu sa matauina. Ua iloga mai e le taitai ona tofu tusi le fanau i potu a'oga ta'itasi ae maise mataupu tau le Saeanisi ma le Numera. "Ona o le pau lava o tusi ua maua, ma sa na'o le valu lava fo'i lea sa faia ai a'oga i le tausaga ua te'a, lea ua taofiofi atu lava e ita le faia'oga, ina ia fa'aauau ai lenei tausaga, ma talosia fo'i le toe maua o nisi tusi i le tausaga a'oga nei,” o se tala lea a le faia'oga o le vasega 8.

 

O le aofai o le fanau a'oga mai le Level K5 se'ia o'o i le vasega 8 i Manulele Tausala Elementary i le tausaga nei e 997. Ua pa'u laititi mai le tausaga a'oga ua te'a e 1,041 tamaiti.

 

O lo ua nafa nei ma faia'oga se galuega tele o le faia o kopi mo le fanau i taeao po'o afiafi ta'itasi a'o lumana'i nei vasega, ina ia mautinoa e tofu le tamaititi ma le kopi e fa'amalamalama ai le mataupu i le potu a'oga, ma e taulimaina fo'i e i latou i o latou fale pe afai e tu'ua a'oga, e fa'atatau lea e fa'amanatu ai le lesona ina ia sa'o lana galuega fa'atino i le fale ua atofa mai e le faia'oga.

 

"O le tele o taimi e tauva i matou faia'oga i le taeao i le masini kopi, afai e le maua lena avanoa, ona faia lea o ni kopi mai nisi nofoaga e aumai e faia ai vasega, ia po'o le tusi lava i luga o le laupapa mea uma. E ui ina pa'u mai le mamafa ia i matou, ae fa'afetaia pe maua mai tusi a'oga e tofusia ai le fanau ma se tusi e vave ai  ona malamalama i latou,” o se tali lea a le faia'oga ina ua fesiligia i le tulaga faia e i latou o kopi mo nisi tamaiti uma o le vasega.

 

I le potu a'oga e tasi e tusa ma le 36 i le 42 le fanau a'oga ua i ai, ma ua nofo nofoa fo'i le fanau a'oga, aua sa faia se poloketi o galuega e fa'atino e le PTA o Nofoa ma Laulau, ina ia lava ai lea sapalai mo fanau a'oga i le Manulele Tausala.

 

Fa'afetaia le vasega o faia'oga ma le Pulega o lea a'oga, aua e ui ina to'atele le faitau aofai o le fanau a'oga ai, ae ua va'aia lava faofale uma o fanau i le amataga o piliota ta'itasi, ae maise e faia fo'i le vaega a le faia'oga o le a'oa'o i aso ta'itasi, tele vaiaso o le tausaga na va'aia ai le motu i luma o le aofai o faia'oga a le Manulele Tausala e leai se aso tia'i i le masina atoa i le tausaga a'oga ua mavae.

 

O le a'oga lea sa manumalo mai le latou sui tauva i le Tauvaga Poloketi Fa'atino o le Tala'aga o le Lalolagi.

 

Polenisia Fou - Samoa Airways Amata ia Novema

 

O le masina o Novema e amatalia ai le tautua a le Kamupani Va'alele a le Samoa Airways po'o le Polenisia lea e igoa ai nei, i le va o Samoa ma Aukilani, Niu Sila ae maise Sini ma Melepone i Ausetalia. Ua ma’ea fa’atulaga foi pasese mo nei faigamalaga e aofia ai pasese pa’u e mafai ona fa’afesootai le ofisa o le Polenisia.

 

"O lea la ua amata ona manino mai le lelei o le tele o kamupani va'alele e tautuaina femalaga'iga, aua e le toe vaivai fo'i le fia alu i fafo, aua o lea ua iloga mai e matagofie fo'i le oso aga'i i Fiti alu ai i le Fiji Air, po'o le Samoa Airways,” o le tala ata lea a le tina matua Pepe Samaota, o se tasi sa nofonofo fo'i i le maketi sa asiasi mai Samoa.

 

I nei malaga a le Samoa Airways, e faaaoga le va'alele tele 737 lea ua mae'a aiaia fa'alisi fa'atasi ai ma lana au pailate e to'a ono, e na'o le ono masina e faigaluega ai ona tu'ua lea i alo o Samoa lava latou e latou te pailateina lo latou Sa.

 

Maua le Faia'oga Fou Au Lakapi Manu Samoa

 

Ua fa'ailoa mai le susuga Fuimaono Titimaea Tafua ua toe filifilia nei e avea ma Faia'oga o le Manu Samoa. O le filifiliga lea sa faia e le Samoa Rugby Union, ma ua fa'afiafiaina fo'i le to'atele o i latou e toe tofia ai lana afioga Fuimaono ina ia toe kolenia ma fa'atonutonua le 'au lakapi fa'avaomalo a le atunu'u.

 

Na fa'ailoa mai fo'i e Fuimaono Titimaea Tafua i le vasega o tusitala, "O lenei filifiliga ua mae'a fa'ailoa mai ia te a'u, ua le 'au ese fo'i ona o le manatu i le 'au fa'avaomalo a le atunu'u, ua fai si leva o gasea mai e fia maua se 'ai.

 

O lo ua ia tau'avea nei le tofi sa galue mai ai le Faia'oga sa tautua ai o Namulauulu Alama Ieremia, lea na fa'amavae aloaia mai i le tusa ma le 3 vaiaso talu ai.

 

O le fa'alua ai lenei ona tula'i Fuimaono Titimaea i lea tofi iloga mo lea fa'agatama, aua sa ia tau'avea i le tausaga 2009 ma sa ia kolenia ma aoina le 'au Manu Samoa 15.

Comment Here