Ads by Google Ads by Google

Tala I Vaifanua


O se va'aiga i le au a tama'ita'i mai Amouli EFKAS Youth lea na masi'i e talia le vala'aulia na fa'auia mai e le Samoa Volleyball Federation i le tatou Asosi Volley Ball ASVBF e tauva i le ta'amilosaga o le Teuila 2017 i Samoa. Na toe taliu mai i le aso Sa na te'a nei, ma le tulaga lua. [ata foa’i]

O le tama'ita'i ua manumalo i le tofi Tausala Lalelei o Samoa mai le motu i Salafai, Alexandra Iakopo, ma ona matua ina ua mae'a le tauvaga tausala i Samoa. [ata: foa'i]

TULAGA LUA, AMOULI GIRLS LIKI VOLLEYBALL TEUILA I SAMOA

 

Ua toe foi mai i Tutuila teine mai le Amouli EFKAS Youth ma le tulaga lua i le sailiga o le Siamupini o le Volleyball, Liki o le Teuila 2017 i Samoa.

 

Na milo i latou i 'au sa tauva i le Pool A e ta'ito'alima Au sa auai i pool taitasi e lua o le ta'amilosaga atoa. O lona uiga o le aofai o 'au na lesitala mo le Ta'amilosaga Volley Ball a Tama'ita'i i le Teuila 2017 e 11, ma o lea ta'amilosaga sa fa'atautaia lea e le Samoa Volleyball Federation Inc.

 

Na masi'i le au malosi a Amouli Youth e talia le vala'aulia na fa'ao'o mai e le SVBF mo se 'au e auina atu e le American Samoa Volleyball Federation.

 

I taaloga o le Pool A sa latou ta'a'alo ai ma 'au volipolo malolosi nei: Lona Youth mai Fagaloa, Lupe o le Soaga, Saoluafata Youth, Falaula Eagles ma le Sideout.

 

Na tulaga lua le Amouli EFKAS Youth i a latou ta'aloga o le Pool, e tasi le latou faia'ina ae fa manumalo. Peita'i mai lena iuga o ta'aloga o Pool ua fa'amauina ai fo'i le o'o lava i ta'aloga o le to'avalu maualuga.

 

Na fa'amanuiaina le taumafai i le semifinals na ta'a'alo ai ma "I'a Sa" ma fa'asolo atu ai loa le taumafaiga i le ta'aloga o le Finals, lea sa fa'atalitali mai ai le "Lupe o le Soaga!"

 

O le pau lea o le latou ta'aloga ua le fa'amanuiaina, peita'i sa tofu ma le seti, ona fa'ato'a sailia ai lea o le manumalo i le toe seti o le ta'aloga.

 

O le Lupe o le Soaga ua mau ai nei le talita o le manumalo volleyball a tamaita'i 2017.

 

Fa'afetaia e i latou le tapua'iga mau a latou matua fa'aleagaga, Rev. Dr. Fa'alevao ma le faletua ae maise o matua ma aiga uma sa fa'atalia le latou taumafaiga. O le Asosi Volipolo a Amerika Samoa ona o le avanoa na malaga atu ai ma ta'a'alo i Samoa.

 

Ua fa'ailoa mai e le'i o'o ni ta'aloga Volleyball lea sa tu'u e faia i le Fale Ta'alo o le ASCC i le aso To'ona'i nei, ua mae'a fa'ailoa mai fo'i o le a toe sosoo i lea lava nofoaga i le aso To'onai o le vaiaso nei.

 

TAUSALA LALELEI O SAMOA - ALEXANDRA IAKOPO

 

O le tama'ita'i ua avea nei ma Tausala Lalelei o Samoa, Alexandra Iakopo, o le tama'ita'i mai le motu tele i Salafai. I fa’asalalauga mai Samoa, o lo’o taua ai o lenei tamaitai e sau mai Sapapalii, Fusi Safotulafai ma Moamoa, ma na toetoe lave a le ulu i le tauvaga, ona sa ia manatu e le agava'a o se tausala lalelei o Samoa.

 

Ina ua tu'uina atu lona pale i lona ao, sa ia fa'ailoa, "Na matua ou tatalo i le Atua i lenei taumafaiga, aua sa ou le manatu lava ou te pale i le tofi, peita'i o lo'u aiga ma le matou pule i le galuega lea fo'i e avea ma Kamupani e sapaia a'u, na fa'atauanau ina ia ou tauva. Lea ua manuia le fa'amoemoe, vi'ia lava le Atua, aua sa taula atu lenei taumafaiga ia te ia,” o sana tala lea.

 

O Alexandra e 23 ona tausaga ma sa sapaia o ia e le House of Gold i le tauvaga Tausala Lalelei o Samoa lea sa  lagolagoina atoatoa e le Fale'aiga a le McDonalds. O lea fo'i afiafi a tamali'i na mae'a ai le tautua a Pricilla Olano o le tausala a Samoa.

 

Na amata ona iloga taumafaiga Alexandra i le taimi o le taliga fesili i le taimi o fa'ata'ita'iga, soso'o ai ma lana taleni mata'ina na matua fiafia i ai le to'atele na sasao e maimoa o le Malo atoa, toe sau ma lana tali i lana fesili i le tauvaga, "Le aoga o le a'oa'oina" ua matua iloga ai lava e se'ia e ia le pale o le tauvaga.

 

O lenei tama'ita'i talavou o le lona lua i le ui'i o le aiga e to'atolu ona tuagane ma lona uso e to'atasi ma o nai ona matua o le Tiakono o Isa'ako ma Fagamalama Iakopo. Na amata a'oa'oina o ia i Samoa na si'itia lea ma fa'ai'u a'oa'oga maualuluga i le Colorado Monarch High School i Kalefonia USA. O se tama'ita'i e mautu lana auaunaga i le Ekalesia Katoliko.

 

I le taimi nei ua maua lona fa'ailoga Bachelor of Arts mai le Iunivesite o Samoa, ma sa amatalia ona faigaluega i le faletalimalo e totogia ai lana a'oga i le NUS ma maua ai lona avanoa i le fa'alautele ai ana aoaoga i le NUS Governance Policy Planning Unit ma toe faigaluega o se Suport Officer a le Australian High Commission.

 

Sa lipotia mai Samoa faapea: Tulaga 2: Miss Samoa N.S.W. Fasi Faitafa Talimatasi Liolevave; Tulaga 3: Miss Samoa Victoria Inc.  Adele Faaosofia; Tulaga 4: Miss TAPZ Fashion Naitosala Jane Schuster; ma le Tulaga 5: Miss Samoa New Zealand Natalie Leitulagi Toevai.

 

AIAIGA O TALOSAGA E FAATUPE AI PISINISI LAITI

 

O le fonotaga a le Komiti a le Konekeresi mo Pisinisi Laiti sa tula'i ai le Faipule o Amerika Samoa, Aumua Amata, ma ia talosagaina i latou, ina ia fa'aitiitia aiaiga fa'ataoto a le feterale mo talosaga o fa'atupega e fa'aleleia ai pe fa'aolaola atili ai pisinisi laiti i le teritori.

 

I pepa o fa’amatalaga mai le Ofisa o Aumua, o lo’o faailoa ai, efaapea, i lea lava fonotaga sa ia matua fa'afetaia ai le toe tula'i mai o le Komiti e toe iloilo le mana'oga sili e ao ina fa'amalosia ai ma una'i atili le fa'atutuina o pisinisi laiti e fa'aleleia ai le tamaoaiga o malo fa'ateritori.

 

"E fa'alagolago tele le malo o Amerika Samoa i pisinisi laiti, ae tatau ona fa'aitiitia aiaiga o talosaga mo fa'atupega a le Feterale ina ia gafatia e le aufaipisinisi lenei ona maua nei fesoasoani tupe ile taimi patino o mo'omia ai lea tinoitupe nono. E aoga le fesoasoani a Pisinisi Laiti e maua ai galuega a tagata o le atunu'u ma fa'aleleia ai le tamaoaiga tausi o le teritori, ae paga lea, o le tele ma le umi o taumafai le faipisinisi laititi e talosaga mo nei fa'atupega e ono fa'atuputele ai tupe fa'aalu, ma atili ai ona fa'aosofia lagona e sili pe a tu'u ia aua e le puupuu se taimi e fa'atalia ai le talileleia o se talosaga."

 

Pe afai e fa'aitiitia aiaiga mo'omia ona fa'ataunu'u e pisinisi laiti ina ia agava'a ai talosaga mo se fa'atupega, e le fa'atuai ai ona maua tupe e fa'aauau ai tautua a pisinisi laiti, pe le toe fa'aopoopo ai fo'i nisi fa'atupega ia i latou, ae o lo'o taumafai e tatala faitoto'a o latou tautua i le atunu'u.

 

"O pisinisi laiti e le taitai ona fa'atusalia i pisinisi tetele, e le amatalia ua mae'a fa'atulaga ni a latou loia tetele, latou suetusi ma tausi tusi po'o nisi fo'i ua i ai agava'a fa'atulaga mo so'o se vaega o pisinisi e fia fa'atautaia lelei, peita'i ua na'o se pisinisi e amatalia mai e na'o le to'atasi pe to'alua tagata faigaluega, e matele lava i tagata o le aiga e ona le pisinisi.”

 

Na saunoa Amata, "Peita'i o ni aiaiga e sili ona mana'omia e i latou nei faipisinisi laiti e ao ina tima'ia i latou i ala e fa'asaoina ai latou pisinisi ma mautinoa ua fa'aauau le auaunaga fa'apisinisi ma fa'asolo atu ina fa'alautele le tautua e fa'aaoga ai lenei fesoasoani tupe a le Malo Tele."