Tala I Vaifanua


Galuega sa faegai ma le Samoa Maritime ua mae'a se'i vagana ai le tosiga o laina o le alatele e faia i le vaiaso mulimuli o lenei masina i le auala i Afao. [ata: Leua Aiono Frost]

O se va'aiga i le lotoa a Matafao Elementary ua mae'a suatia i luga la'au tetele ua avea ma fa'asoesa i le taimi o matagi malolosi, ina nei pa'u tonu i falea'oga. O lea galuega na feutaga'ia e le Matagaluega o le Soifua Maloloina ma le Matagaluega o Galuega Lautele a le malo. [ata: Leua Aiono Frost]

GALUEGA I AFAO MA ATAULOMA - SAMOA MARITIME

 

Ua mae'a le galuega sa feagai ai ma le Samoa Maritime, lea sa latou fa'aleleia le apitagalu ma le alatele i Afao ma Agugulu i le itumalo o Alataua.

 

O lea galuega na amatalia i le tausaga e 2016 ma sa fa'atulaga e mae'a lelei le apitagalu ia Mati 2016. Na taunu'u lena fa'amoemoe ona amatalia loa lea ona galueaina le alatele, ua le fa'ataina ae ua fa'asima, ona o tulaga o tafega i le taimi o timuga tetele. Na amata sasa'a le sima mo le alatele i le masina o Iuni 2017 ae mae'a i le masina ua te’a.

 

I le taimi nei e le'i mae'a lea galuega i lona atoaga, ona tatau ona tosia laina fa'asinoala ma o se mea e fa'ato'a mafai ona fa'atino i le fa'aiuga o lenei masina, aua e tatau ona mautinoa a'ia'i ua mago lelei le sima o le alatele.

 

E tusa ai ma se fa'aaliga maise tasi o le Samoa Maritime, lea sa fa'akonekarate mo le galuega, "E tele na'ua se galuega sa faia i lalo ane o le alatele ma le apitagalu ua mautu nei, aua e mautinoa lava ua o'o le eleele i le sofa'i pea e peau malolosi o le sami mo le tele o tausaga. Lea ua mae'a toe fa'atutumu ma fa'aleleia atili ua mautu fo'i le fa'avae o le alatele ua i ai nei."

 

Fa'afetaia e le afio'aga lea galuega, ma e le o toe tele se vaega o le alatele o totoe e le'i galuea'ina pe afai e te malaga atu i Leone aga'i atu i Fagali'i i le aoga fou ua fa'atuina nei ma ua tatala i le amataga o lenei tausaga a'oga.

 

Pe afai e mae'a tosia laina o le alatele lea, aua ua matauina fo'i ua mae'a faaleleia ma le auvai o le Vaitafe i Atauloma e fa'aiu i ai lea galuega, ona fa'ato'a fa'avasega mai lea e le Malo se aso e tatala aloa'ia ai lea galuega matagofie ua mae'a fausia lelei.

 

FA’AFOUGA LOTOA, FA’ATULAGA FALEA’OGA FOU I MATAFAO

 

I le aoga tulaga muamua i Matafao, ua mae'a fuafua e fa'atuina se falea'oga fou fogafale lua ina mafai ona faia suiga tetele ua mae'a fa'atulaga e le faigamalo, e tau fa'afaleina ai le fanau aoga ua tupu ma ua televave fo'i lona si'itia i tausaga ta'itasi.

 

O lea Laumua ua mae'a taina i lalo ma suati la'au tetele sa fa'amalumalua nisi o falea'oga laiti ta'i lua potu a'oga sa i ai. O le mafuaga, aua ua mae'a va'aia e ali'i faigaluega a le Matagaluega o Galuega Lautele a le malo, "Ua mate totonu o lea pulu, ma e ono lamatia le mamafa tele o ona lala o lo'o falala i luga o le falea'oga, ae to'atele le fanau a'oga o lo'o aoaoina ai, fa'atasi ma faia'oga.”

 

"E le malolo le mafaufau o le pulega, aua e le toe mafai e se tasi lava mea ona toe fa'afo'i mai se soifua e maumau ona fa'atuai ona faia o fa'aiuga i ituaiga mea fa'apea. Ua matauina e i ai la'au tetele ma le mafala i totonu o le lotoa nei, ae tatau ona matau fo'i i aga o le tau ma ona suiga fa'afuase'i, e le taupule le tagata ma mea e tutupu mai i matagi malolosi ae gaui ai la'au ma pa'u'u i luga o falea'oga nei, ae o lo'o faia a'oga a le fanau ma faia'oga. E tatau ona tu'u i lalo ma suati ese aua o lo'o i ai isi fuafuaga fa'ataoto e fausia se falea'oga fogafalelua mo Matafao i le tausaga a'oga fou,” o se tala lea a le tama'ita'i pule a'oga Dr. Fa'aletino Roberts.

 

"O le falea'oga fogafale lua o le a fausia lava mo potu a'oga uma, ia le toe mo'omia ai falea'oga fa'afaleo'o nei e i le lotoa, ma ua mae'a pasia fo'i le vaega tonu o le lotoa e fa'atuina ai lena falea'oga. A mae'a ona ave'esea lea o falea'oga uma nei, ae fa'aavanoa loa le ogatotonu mo le faleta'alo, aua e aoga e poto i ai le Laumua i ta'aloga ma latou mea uma e fa'atino e aofia ai fa'au'uga ma tu'ufaatasiga a le a'oga e fia faia a'o malu le fanau mai le timu ma le la,” o sana toe fa'aliga lea.

 

O le taimi nei, e le'i a'e le latou ECE, ae toe lua vaiaso e fa'amae'a lelei ai le falea'oga fou ua fausia mo le ECE ona fa'ato'a a'e ai lea i le fa'aiuga o lenei masina.

 

O le Matagaluega a le Soifua Maloloina lea ua latou fa'atamafaia ia Matafao, ma o i latou nei sa vala'au i ai le Pule A'oga mo se fesoasoani e tausoa lua ma le Public Works i le kiliaina o la'au tetele ma le lotoa i mea e le mafai ona fa'atino e le Laumua.

 

O le fa'afetai ua ofoina mai lea fa'aululuga o Matafao, ona o le vave ona faia o lea suiga i le lotoa, e nei matagaluega.

 

I le taimi nei, e 540 le aofai o fanau a'oga ua lesitalaina i le tausaga a'oga i Matafao, e aofia ai fanau a'oga mai le Level K5 se'ia o'o i le Level 8. Peita'i, e le'i fa'amauina le tele o fanau a'oga fou ua ulufale mai i lenei tausaga a'oga fa'ato'a amatalia i lenei vaiaso. E aofia uma ai vasega mai le ECE, ma nisi e le'i toe fa'aopoopo mai le K5 se'ia oo i le Level 8.

 

I lea lava a'oga ua fa'ailoa mai e le tama'ita'i pule, "Ua fa'afiafiaina lava le agaga ona ua si'itia le pasene fa'aleatamai na fuaina i suega mai fafo i lenei Laumua, e tusa lea ma le 2%. O se si'itaga e fa'afetaia ai le galuega a'oa'o a Faia'oga, ua galulue fa'atasi ma Matua ia fa'amatu'u mai le fanau i a'oga afiafi pe a tu'ua le a'oga, ma isi fo'i a'oga o vasega a le Numera ma le Igilisi sa fa'atautaia mo fanau o lo'o mautu mai i faia'oga o i ai le mana'omia i le latou faitau ma le malamalama i le fa'aperetania ma e vaivai fo'i le numera."

 

"Ua mae'a fo'i ona toe faia le matou fonotaga ma faia'oga uma, ua matou manana'o e si'itia lea pasene i le 5% i le tausaga a'oga fou. Ma o le a fa'aauau fo'i le matou vasega i afiafi mo le fanau e mana'omia ona fa'aleleia le faitau tusi ma le numera. Afai e manana'o i matou e lelei falea'oga e a'oa'oina ai le fanau, ua matua mafuli fo'i e aoao le fanau. O le fonotaga a Matua ma Faia'oga lea ua fa'atulaga mo le vaiaso a sau, aua o le ulua'i aso o le A'oga, na matua faigaluega uma faia'oga a Matafao e le'i i ai ma se tasi na tia'i a'oga i lea aso,: o se tala lea a Dr. Roberts.

 

Sa ia fa’afetaia Kovana Lolo Moliga ma le taupulega ona o nei suiga ua fa'atulaga i Matafao i lenei tausaga.

Comment Here