Ads by Google Ads by Google

Tala I Vaifanua


O le susuga Teofilo Magalo o Aoloau ua ia mauaina le fa'ailoga mo le Tagata Faigaluega Malosi a le kamupani McDonalds American Samoa. [ata: Leua Aiono Frost]

LE TOE TOTOGIA TALAVAI I FALEMA’I FA’ALEITUMALO

 

Ua fa'ailoa i le mamalu o matua o lo'o faia talavai a fanau ma so'o se tasi lava i falema'i fa'aitumalo i Tafuna, Amouli ma Leone, o le a le toe totogia talavai afua atu i lenei masina o Setema.

 

O se faaaliga lea ua maua mai le Ofisa o le Soifua Maloloina ona ua manuia mai le talosaga sa tu'uina atu e totogia ai e le Medicaid nei talavai uma.

 

Ua fa'ailoa e le Ofisa o le Fa'atonusili a le Soifua Maloloina, o le a fa'ao'o mai se latou fa'amalamalamaga atili i se taimi o i luma mo le silafia e le mamalu lautele ae ua fa'amaonia mai e i latou ua taofia nei pili totogi mo so'o se talavai e faia i falema'i fa'aitumalo.

 

ASO MO TAGATA FAIGALUEGA - FA’AFETAI MO LE TAUTUA

 

I le aso Faraile ua te’a i le Veterans Memorial Stadium na fa’amanatuina ai le aso fa’apitoa mo tagata faigaluega uma i le atunuu - e aofia ai le malo ma pisinisi tua, ae maise i latou i lo’o tuatua i totonu o aiga, nu’u ma ekalesia. Sa auai le tele o sui mai vaega eseese o le malo fa’atasi ai ma nisi o kamupani tua.

 

O le saunoaga faapitoa o le aso na taoto atu ia Utu Abe Malae, ta’ita’i o le ASPA.

 

“E i ai le ‘upu a le atunu’-- e le’i tunoa faiva o le nu’u, e le falala fua fo’i le niu, e mafua ona o le agi a le matagi.  E fa’apena la le aso lenei. Ua o tatou galulue e fa’amama le laufanua, tafaala, ma le si’osi’omaga atoa o le atunu’u, ta’apena fa’amama fanua o a’oga, vali, ripea ma fufulu falea’oga uma; ua le gata i asosi ‘ese’ese ma ekalesia eseese ae fa’apena le to’atelega o le ‘aufaigaluega a le Malo ma koneterake.  O le aso ma le tala mai o ‘a’ao, fa’amalo atu le tauata’i i mea lelei,” o a Utu lea.

 

“E le fa’atuaoia mea lelei ma galuega lelei ua mae’a ona faia, ma ole a fai pea,” o se vaega lea o le saunoaga a Utu. “Ua le gata i totonu lava o le faigamalo, ae fa’apea fo’i le atina’e o le agaga e limalima fa’atasi le Malo ma le atunu’u, ina ia taunu’u i se tini manuia.”

 

“E manatua ai se fatuga ua loa ia Samoa, ‘Ua tofia e le Atua Samoa ina ia pulea e Matai, aua o lona suafa ua vaelua iai’, o lona tali e fa’apea, ‘O le ta  fa’avae lena, afai e tumau, o le tagavai lena, o le a tumau le manuia mo Samoa”.

 

“Ua mafua ona ‘ou aumaia lea pese ona o se manatu; o i tatou matai, o ta’ita’i o nu’u ma alalafaga, atoa ma le atunu’u, e tatou te avatu ni fa’ata’ita’iga mo tagatanu’u ma fanau, ina ia o latou maua le agaga naunau e punoua’i e galulue mo le atina’e manuia o Amerika Samoa,” o lana saunoaga lea, ae ‘aua tatou te manatu i se taui mo i tatou lava.”

 

“A fa’apefea ona o tatou manatu i se taui, ae o le aiga o ai? O le nu’u o ai? Ae o le atunu’u o ai?  O le Malo fo’i o ai?  O meatotino a i tatou lava.  Ole auaunaga e le faatua’oia.”

 

Sa ia fa’afetai tagata faigaluega uma i le atunu’u ona o lo latou manatu alofa ia Amerika Samoa.

 

Saunoa Utu e faapea, i se fonotaga lata mai nei i Hawai’i a le sosaiete, American Society of Civil Engineers, na saunoa ai le peresitene o se kamupani Niu Sila i lona faafetaia o le lelei o tagata Samoa i le tulaga o galuega, e aofia ai i latou o lo’o galuluega i Guam.

 

Ua le gata i lea, taua foi e Utu, o lo’o i ai tagata Samoa o lo’o galulue i le setete o Mississippi, mo o lo’o aloaia le lelei o latou galuega.

 

I le tulaga o galuega maua i le teritori, saunoa ai Utu o lo’o ta’imua ai le malo ma kamupani ‘ia, ae o lo’o taumafai foi le malo e atina’e le turisi. Ma sa ia talosaga ai se suiga i se isi ituaiga atina’e i le teritori, ma ia talosaga ai e inivesti i tulaga lelei o le soifua maloloina.

 

"Ia mautu ma fa'aleleia atili le tausia lelei o le Soifua Maloloina, ia mafai ona toe fo'i mai tatou tama fanau sa galulue i fafo ma ua lava lo latou tamaoaiga tau litaea e tausia lelei ai i latou iinei, nai lo latou nonofo ai pea i fafo, ona ua le mafai ona togafitia o latou gasegase iinei.”

 

“ia mafuli le Malo e fa'aleleia atili le a'otauina o fanau i tiute ma faiva o lo'o latou fa'atinoa ina ia fa'aleleia atili le tautuaina o le mamalu lautele, ona le aga'i lea o tatou tagata i fafo, ae nonofo mau iinei ma atina'e le tatou malo i ana tautua lautele ma ola saogalemu ai. O le fa'aleleiga atili o le tautua lautele, e fa'ateleina fo'i avanoa faigaluega i totonu o matagaluega ta'itasi, ma maua ai avanoa mo isi e faigaluega ai.”

 

Sa fa'ailoa e Utu galuega toe fa'atulaga lelei mo le  itumalo o le Tualauta ina ia fa'aleleia atili lona fa'ataotootoga, ona o le vaapiapi o le tele o vaega o le itumalo.

 

Na mua'i talosagaina e le Kovana se 10 sekone e talosia ai i latou uma ua a'afia i le afa tele i le setete o Texas aua e to'atele fo'i Samoa o lo'o alaala ai. Sa ia mua'i fa'ailoa fo'i, e i ai le fesoasoani e tapena e le malo, ina ia fa'ao'o atu mo i latou lo'o afatia ai.

 

E le gata i lea, ae sa tolaulauina aloaia fo'i suafa o i latou ua to'esea mai o latou nofoa a'o galulue pea, i le tausaga ua te'a. Na mua'i fa'ailoa a latou matagaluega ma suafa o i latou. Ona faia lea o le fa'aaloalo a le Malo e tusa o le taua o le latou tautua ina ua fa'apapa fanau ma ilia le pu fa'avauvau.

 

O le solo fa'aaloalo na soso'o ai sa ta'ita'ia e  le  Lutena Kovana ma le vaega o leoleo, ma sa va'aia ai le to'atele o i latou ua avea ma tagata faigaluega i Kamupani ma vaega ta'itasi o le Malo sa auai. O kamupani na auai i le solo o le McDonalds Amerika Samoa, Nana's Company, Tutuila ma Manu'a Stores, Happy Trucking, ma le Paramount Builders.

 

Na faia ta'aloga faasamoa o le tosoga maea ma le pasiga polo e fa'agaoioia atili ai tino o tagata faigaluega, ma sa fai 'au. O fa’afiafiaga sa faia e le TAOA ma le Nana's Comapany.

 

FA’AILOGA FA’APITOA A LE MCDONALDS AMERICAN SAMOA

 

I le aso fa’apitoa mo tagata faigaluega i totonu o le atunuu, lea sa faia i le Veterans Memorial Stadium, sa maua ai e kamupani le avanoa e aloaia ai ana tagata faigaluega. Ae peitai na o le McDonalds American Samoa sa faia lea tulaga, i se fa’ailoga faapitoa “Special Recognization Award”, sa tuuina atu ia Teofilo Magalo, o ia foi lea na filifilia e Tautolo Agaoleatu Charlie Tautolo, le peresitene o le McDonalds.

 

I lea fa'ailoga ua fa'ailoa ai: "Ua fa'amau fa'ailogaina le tautua matavela a Teofilo Magalo i lona sao ua iloga ona si'itia atili ai le auaunaga a le McDonalds Amerika Samoa i tagata lautele ma le atunu'u.

 

Na amata mai le tautua a Magalo i le McDonalds i le tausaga e 2007, sa avea ma se tasi o kuka. E mai i le taimi nei ua avea ma Fesoasoani i le Pulega, ae o lea ua fa'ae'e fo'i i ai ma le pule i le lala o le McDonalds i Tafuna.

 

Ua fa'afetaia e Magalo ia Tautolo ona o le fa'ailoga ua fa'aeaina ai lona tagata faigaluega. Ua ia ofoina lea fa'ailoga ia avea ma auga o le galuega fa'amaoni ma le galue a'ia'i o tagata uma i so'o se tiute ua tautua ai totonu o le latou Kamupani po'o le McAiga! Ua fa'afetaia fo'i le lagolagosua a lona faletua o Joyce ma le fanau ae maise le aiga o le tina o Alfred ma Matagofie Peters i lo la'ua fai fanau ma fesoasoani i lo la'ua aiga.