Tala I Vaifanua

6 TAMAITAI TAUVA TAUSALA AMERIKA SAMOA 2017-2018

 

Ua pasia le aso, Aukuso 15, na fa'atulaga e taofia ai ona toe fa'aulu se sui tauva mo le tauvaga a le Tausala Lalelei o Amerika Samoa, lea e tula'i ai le tama'ita'i lalelei o Antonina Lilomaiava sa lagolagoina e le Pisinisi o le SSAB i Tafuna.

 

E to’aono i latou ua mae'a fa'aulu o latou suafa, ma kamupani o lo’o lagolagoina a latou taumafaiga.

 

Salamasina Itu'aumalosi Aumua, o lo'o lagolagoina lana taumafaiga e le O & O Inc i Nuuuli. O le tausala tauva lona lua o Shalom Moana lea e lagolagoina e le Paradise Pizza mai Pago Pago. O le tausala lona tolu o le tama'ita'i o Sharane Tofi Smith 23 ona tausaga o lo'o fa'aulu mai e le NAPA Samoa, ma o ia lea o lo'o faigaluega ai lava i lena kamupani i lona faleoloa.

 

O le tausala lona fa mai le afio'aga o Afonotele o Feiloa'i Thompson lea o lo'o sapaia lana taumafaiga e lona aiga ma ana uo mamae. O le tausala lona lima o Matauaina To'omalatai mai Onenoa lea o lo'o lagolagoina lona fa'amoemoe e le Kamupani a le Lalelei, ma tamaita'i lona ono o Annie Masoe lea e sapaia e le Kamupani a le MC Auto Shop.

 

O le taimi nei ua amatalia lava ona a'oa'oina lelei i latou uma e sui iloga o le MASI, ina ia latou fa'atauaina lo latou tofi, po'o ai lava o le a manumalo, aua o se tofi e le fa'atauagavale i ai se tasi o i latou, e taua tele fo'i mo Amerika Samoa, i le fa'afeiloa'ia o soo se malo fa'aaloalogia a le atunu'u, o ia lava e lalamua e fa'afetauia ma fa'aula i lo latou ulufale mai.

 

O a latou aga ia tausa'afia i taimi uma ma laufofoga fiafia aua e tatau ona avatu uiga fa'asamoa talimalo lelei i so'o se taimi lava o le latou ola tautua i lea fo'i tofi e tauva i ai.

 

Ua fa'ailoa ia i latou tulafono o le tauvaga, ua fa'amanatu ia i latou vaega uma o lo latou agava'a ai mo le tauvaga, ma ia mausali i aga fa'aaloalo i taimi uma lava, e afua atu i lenei taimi ua amata fafau atu ai latou ola auauna i le tofi Tausala Lalelei o le atunu'u.

 

Ua fa'atulaga lenei tauvaga e fa'amanatu uma ai fo'i le isi to'a 24 o tausala ua mae'a tutula'i ma tautua i le atunu'u o se tausala lalelei sa filifilia ma fa'apaleina. O le manulauti o le tauvaga i lenei tausaga "Toe Tepa Tasi" e toe fa'atula'i ane ai uma nei Tausala Lalelei se'i toe tagai i ai le atunu'u ma patipatia le latou auaunaga, e o'o mai fo'i i lenei vaitau.

 

Ua i ai se avanoa matagofie o le tauvaga i lea po o le a fa'aavanoa mo se fa'afiafiaga fa'apitoa a nei tausala lalelei sa tuai, ma o le a fa'alauiloaina aloaia i latou i lo latou toe savavali tasi lava i luma o le aofia o le auai, ma patipatia o latou faiva o le fa'afiafia.

 

Ua mae'a fa'ao'o ia i latou uma o tausala tuai o latou tusi vala'aulia i le taimi nei, o le tausala fo'i o lo'o tula'i i le tofi i lenei tausaga, e toe tu'u atu ia te ia le avanoa e fa'alauiloa ai lana poloketi sa ia tauva ai, ma toe tepa tasi i le fa'agaoioiga ma le tulaga ua o'o i ai lana taumafaiga lena, a'o le'i fa'amavae aloa'ia i lona pale ma lona tofi i lea po fa'amoemoeina. O le autu o lana poloketi, "faitau tusi le fanau" a'o i ai i le falema'i mo ona togafitiga po'o talavai.

 

O le tauvaga tausala lalelei mo Amerika Samoa o le a faia ia Setema 15 i le Gov Rex Lee Auditorium i Utulei, itula e 7:00 i le afiafi.

 

TAPUNIA TAOA - FA’ATOA TATALA IA SETEMA 5

 

Ua faasalalauina mo le mamalu o matua matutua o le atunu'u, ina ia nofouta i le suiga, o le a tapunia uma lava To'omaga ma Ofisa autu o le Matagaluega mo Tagata Matutua i le aso Faraile o le vaiaso nei, fa'apea ma le aso Gafua o le vaiaso a sau, ona o le fa'amoemoe o le Malo e fa'atasia le aufaigaluega uma i le fa'amanatuina o le latou aso fa'apitoa ma le malo i le malae Ta'alo i Tafuna "Veterans Memorial Stadium mo le aso atoa.

 

O le aso Gafua ua fa'atulaga o le aso malolo mo tagata uma ua galulue mo galuega leipa i le Iunaite Setete ma ona teritori, ma ua aofia ai fo'i Amerika Samoa i lea aso iloga mo ona tagata faigaluega. O le aso Lua o aso ia ua fa'atulaga e maua ai fo'i le taumafa vela mo tagata matutua uma, ma o le a fa'aauau ai lena tautua.

 

SUIA TOFIGA CHARLIE COMPANY 442ND INFANTRY

 

Ua mae'a fo'i ona suia le fa'auluuluga o le Kamupani a le Charlie 442nd Infantry i le Vaega Au Fa'aagaaga, US Army Reserve, i Tafuna. Ua mae'a nei le tautua matavela a le susuga First Lt. Siva ae ua ua fa'afeiloa'ia e i latou le latou ta'ita'i fou ua tula'i mai o Cpt. Cotton.

 

Sa faia se latou sauniga pu'upu'u fo'i i le Konelio Pele US Army Reserve ia Aukuso 28, 2017 e fa'afeiloa'ia lenei nofoa'iga fou ma ua patipatia fo'i le tautua a le ali'i 1st LT Siva sa tu mai le foe i na tausaga ua te'a.

 

Sa auai i lenei sauniga le susuga le Lutena Kovana, MAJ Lemanu Peleti Mauga o le tatou malo, o se tasi o sui tuai o lenei fo'i vaega, ae maise le susuga Paepaetele LTC Jamias, Mapu lea sa ia fa'avaeina le USAR i le 1980, ona o le taua fo'i o lea suiga tofi mo le tatou vaega au fa'aagaaga.

Comment Here