Ads by Google Ads by Google

Tala I Vaifanua


Tapa Ipu le afioga le Ma'opu, Faumuina Joh Faumuina, i lona maota i Malae-Papa ile aso Faraile ua te'a i le taimi o le ali'itaeao a le Itumalo ma Samoa na poto i Leloaloa mo lea fa'amoemoe. [ata: Leua Aiono Frost]

FA’AFOTUTUPU AFIOGA LE MA’OPU FAUMUINA JOHN FAUMUINA

 

O le afiafi o le aso Tofi i le Ekalesia Katoliko i Lepua sa fa'apa'iaina ai le nofo e le afioga a Moseniolo Viane Etuale ma vasega o Patele fa'apea le Aufaigaluega Pa'ia na poto e fa'atautaia lea sauniga, e fa'ao'o atu ai i le Atua lana auauna, le afioga le Ma'opu Faumuina John Faumuina ma le faletua ia Akenese, lea ua sauni e tausia aiga, tautua le Ekalesia, le afio'aga fa'apea le itumalo i soo se ala e tatau ai. Le fa'atumulia le malumalu, i le pa'ia o aiga i ona tafa e fia, fa'atsi ma le itumalo ma Samoa na potopoto.

 

Na alafa'i i le toe aso o le fa'amoemoe i le tapenaga o le masi'i fa'aaloalo mai o le paolo ma e tolu fuaiala sa masi'i mai ai i latou. O le itu paepae i le afioga Mauga ma lena itu o le aiga, na muaimalae i lena taeao, ona masi'i mai ai lea o le afioga le Maluolefale Faiivae Iuli Godinet ma le pa'ia o aiga, ae tomuli ai i le Aiga Sa Toilolo na masi'i mai ai ma le tofa Galoia ma le Pa'ia o Aiga mai Pavaiai, lea na fa'ato'a suia ai la'ei o le fa'anofonofo ma le faletua i lea taeao.

 

E ui ina sa tofu matagofie la'ei ma teuteuga o le afioga le Ma'opu ma le faletua sa taua'aoina e isi masi'i fa'aaloalo muamua e lua, ae sa latou mataituina le taimi ae a le fa'amoemoe o le usualele a le itumalo sa api i le maota o le afioga Uti i lea taeao.

 

Na fa'ato'a sasao le pa'ia maualuga o le itumalo o le Ma'oputasi mo le latou ali'itaeao i le tusa o le itula e 2:00 i le aoauli ma sa a'amia loa le fa'anofonofo e tofa ia Loloaso ma Taesaliali'i. O le ava sa agaia lava e le aumaga a le afio'aga o Leloaloa ae toto'o le afioga 'Lafogaula' Tua Samuela, o lona tuaa lea ua fa'afotutupu i le itumalo.

 

Na iloga ona talitoga le itumalo, ma Samoa atoa i lea aso, ma sa va'aia fo'i le fa'afiafiaina aua o tulafale iloga i afio'aga ta'itasi sa maua le ta'i selau, soso'o ane ma isi e ta'i lima sefulu ae o le to'atele o le lautinalaulelei sa ta'i 30 uma lava toga.

 

E pei ona lau silafia e le to'atele, sa mua'i tautua Faumuina i lona suafa matai o Taufete'e mai lona aiga i Nuuuli, lea ua ia tu'ua lea suafa,  mo papa o le afioga le Ma'opu, Faumuina. O lo'o iloga fo'i lana tautua i le malo i le avea ma CEO o le falema'i o le LBJ i Fagaalu.

 

E tele fo'i agava'a o Faumuina i lea matata aua sa amata mai fo'i lana auaunaga o se tasi na faigaluega muamua i le Helath Planning ale falema'i a'o tu'ufa'atasia ma le DOH, a'o le'i tofia e le faigamalo a Kovana Lutali e avea ma Fa'atonusili o le Matagaluega o Fefa'ataua'iga.

 

I sana saunoaga i lona aiga, sa ia fa'ailoa ai, "Fa'afetai i le avanoa e tautua ai i lo'u aiga, ua leva fo'i na timuia ma laina i fafo ina ia fai se tautua ao le'i sau e tausia le tatou aiga. Ia fa'afetai i le Atua i le malosi ma le ola, aua o ia e afua ai mea uma. Fa'afetai i le aiga i le loto gatasi mo lenei fa'amoemoe."

 

O sana tala lea a'o le'i tapa ipu i lona maota i Malaepapa i le afiafi o le aso Faraile ua te’a.

 

MA’EA TOLAUAPI ‘LE TAUSAGI I LE DYWA I PAGO PAGO

 

O le aso Faraile ua te’a sa faame'a ai le tolauapi mo le tolu aso a le "Le Tausagi" lea sa faia i Pago Pago ma sa fa'ailoa le fiafia o le fanau sa auai i lea fo'i tolauapi o lenei tausaga.

 

"O le aoga ia o le matou tolauapi lea, aua ua maua ata uo mamae fou, ua mafai ona matou fefaasoa'i o matou lagona i le afaina o le si'omaga e pei ona matua fa'amamafa i lenei tolu aso na matou moetasi ai,” o se tala lea a le ali'i Einstein Z. Tama Kitiona mai le Manulele Tausala Eleemntary level 8.

 

O a latou galuega fa'atino sa faia, ina ia fa'aatagia ai o latou lagona naunau e faaleleia tulaga o le si'omaga ae maise lava i le fa'alapisi, ua ia fa'ailoa ai, "O lea ua aoga fo'i lenei moetasi, aua sa fa'ailoa mai ai ituaiga lapisi e matua leaga lava i le siomaga, ae maise ai lava oloa palasitika aua e le toe mafai ona liliua, ma toe fo'i i le palapala se'i vagana ua soka ese mai isi otaota uma lava, ma tu'ufa'atasi uma, ae tatalia le masini e mafai ona fa'apapa ai ma toe la'u i fafo i se kamupani tele e toe saunia ai nisi oloa fou."

 

Ua iloga le fitaituga o lo'o i ai oloa palasitika ma ua fa'amatala fo'i i le fanau, peita'i o le fili numera muamua lea ua o'o atu ina fa'alapisia ai le sami, ma ua tima'ia lava le fanau sa api i lea tolauapi, ina ia utagia e latou olaga talavou, ia latou le faia lea aga o le tia'i solo o lapisi fa'apenei, aua e oo uma lava i le sami.

 

O le tama'ta'i o Lomialagi Smith sa maua sona taimi e fa'ailoa mai ai lona manatu, aua o ia sa i ai i le vasega lona lua, 9-12 tausaga le matutua. "O le tele o galuega e fa'ailoa mai ai, ‘Aua le fa'alapisi’, ia ave le atigiapa alamini i le Kamupani a Leala i Tafuna mo le toe fa'aliliu e toe fa'aaoga mai i nisi fo'i atigi apa inu fou."

 

Na asiasi le fanau i le aso lona lua o le tolauapiga lenei i le Kamupani o lo'o latou toe fa'aliliua le alamini ma le atigifagu ina ia toe fa'aaoga, le kamupani a Leala i Tafuna.  Ma sa fa'aalia e lenei tama'ita'i lona lagona ina ua vaaia lea masini tele, "O lea ua ou iloa nei e tatau ona fa'aputu ese lava le atigiapa inu, sa le kea lava i ai, ae o lea ua iloa e tatau ona faia lea suiga i lo'u tagata talavou, e fesaosoani i le matagofie o le siomaga ma le tele ai lapisi e tatafe i le sami."

 

Ina ua fesiligia Grace le tasi o le vaega lua o le apitaga, pe mata e toe fia sau i se isi tolauapi fa'apea i le tausaga fou, ae tali mai o ia, "E fiafia a'u e sau ae manaia fo'i aua e o i pasi e asiasi i le paka fa'asao ma alu e asiasi i le Ofisa o le Gataifale i Utulei, lea e fa'aaigoa i le Kovana Tauese."

 

I le tolauapi sa auai atu le vaega a le ASEPA, National Park, National Marine Sanctuary, DOC, DMWR ma isi e faia folasaga i le fanau e atoa lelei le to'a 100 sa auai i lenei tolauapi a "Le Tausagi Enviro Discoveries 2017."