5 SUI PAKA FA’ASAO AMERIKA SAMOA MALAGA TINEI AFI I AMERIKA

E to'alima alo o le atunu’u o lo'o galulue i le Laufanua Fa'asao a Amerika Samoa, po'o le National Park of American Samoa, na malaga i le aso Faraile na te'a atu, e auai  fa'atasi ma le isi to'a 13 o i latou na mua'i tu'ua le atunu'u ia Aukuso 4, 2017, e avea ma sui tinei afi i le tele o mu ua a'afia ai le vaomatua o le setete o Kalefonia.

O se tala mai le ali'i pule o le National Park i le taimi nei, Acting Superintendant Daniel George, "O i latou nei ua malaga, ua mae'a ona faia a'oga, tusitusi ma le fa'atautaiga fo'i o latou tiute tinei afi, a'o le'i mua'i tofia e malaga ese atu.”

E le gata i lea, ae faia koleniga fa'apitoa ia lava le manava, ia lelei le tamo'e i nofoaga e pei o le vaomatua ma le 'ae mauga fo'i, ia faigofie ona fa'atino e i latou tiute i le vaomaoa o setete eseese o lo'o ua fa'atulaga e galulue ai.

"Pe afai e mua'i taunu'u i nofoaga ua fa'atulaga mai e malaga aga'i i ai, ona toe faia lea o le isi a'oga fa'apitoa lava e tusa ai o le vaomatua o le a latou tineia le afi o i ai, ma fa'atasi uma atu i ai isi sui fo'i mai isi National Park a le Iunaite Setete, ia gafatia fo'i ona latou galulue fa'atasi ma na sui uma i lalo o le ta'ita'iga e tasi,” o a Daniel George lea.

O i latou na malaga i le aso 4 o Aukuso, na fa'atulaga e o aga'i i Modoc, Kalefonia, ae o le vaega to'alima mulimuli ua fa'atulaga e malaga sa'o i Redding, Kalefonia.

Ina ia tusa ai ma se lagona o le Laufanua Fa'asao, ua le mafai ona latou faailoa maia suafa o le aumalaga se'ia mae'a ona fa'amautuina i latou i nofoaga tonu e galulue ai i Kalefonia.

FA’AMONIA GREG LOUGANIS ATALI’I O FOUVALE LUTU

Ua lipotia e nusipepa ma televise, le fa’amonia lea o le susuga ia Greg Louganis, o ia o le alo o Fouvale Lutu, e alaala i Hawai’i.

O lenei alo o Samoa ua lauiloa i le taaloga o le “Diving” e pei ona manumalo ai i pine auro e fa i le Olimipeka i le tausaga e 1984. I lea vaitau sa salalau ai lava tala faapea, o Greg o ona tuaa o Samoa.

Taua e Greg i talanoaga ma le au tusitala e faapea sa ia manatu po’o ai ona matua moni.  Sa ia taua atili e faapea po'o i ai se mafuaga sa tulitulimatagau ai e lo'u tama lo'u olaga mai a'o itiiti, aua o lo'o tulata atu i le matou aiga i San Diego, le fale o le isi uso o lona tama, o ia lea na te fa'ailoa ia Fouvale, mea uma lava o lo'o faia e Greg i ona matua fai.

Peita'i, e le'i manatu Fouvale ina ia vave feso'ota'i, sa ia fuafua leleia fo'i le vaitau e faia ai lea so'otaga. O le tausaga e 1984, fa'atoa mafai ona o'o ane Fouvale i le tasi o ana tautalaga fa'apitoa sa faia i Honolulu, ma fa'ailoa ane, o ia o lona tama moni.

"Na ona ma'ua fetaui, a'o loimata sa ou va'aia i ona fofoga, ma e le tele fo'i ni ana tala sa talanoa mai ai, pau o lana fesili, po'o a mai a'u, po'o o'u fiafia? Sa ia fai mai, Sa ou mana'o ou te tausia oe.”

I le tausaga 2015, na faia ai le fa'atasiga a le aiga o Lutu i Hawaii, ma na maua se tusi mai lona uso la'ititi o Malcolm, e vala'aulia i le reunion.

A'o le'i auai Greg i le fa'atasiga lea, sa ia mua'i faia lana suesuega o le DNA ina ia 100% lona mautinoa, ona matua moni na fanau mai ai. Ma ua le toe i ai sona matamuli sa ia lagona mai tausaga e tele, ua ia iloa nei, o lona tupu'aga e matua lautele ma anoanoa'i ona aiga Samoa.

Ua maliliu nai ona matua fai, i la'ua sa fa'afofoaina lona olaga tausaili ma tausia leleia o ia, peita'i, e le'i taofia e i la'ua ona tausaili matua o Greg, ae ona sa mu le nofoaga sa tausia ai o ia o se tamaititi e saili ni ona matua, o lea sa faigata ai ona maua matua moni o Greg. O i la'ua ma si ona tuafafine, sa fa'atamaiti fai uma i la'ua, ae matua si ona taufafine. O ona matua ia o Peter ma Frances. O Peter Louganis o se ali'i Tausitusi a se Kamupani Va'a Fagota.

SAILIGA SELENI SAMOANA HIGH SCHOOL BOOSTER CLUB

O le taumafaiga a le Samoana High School Booster Club e fa'atupe nisi o mana'oga mo le Au Ta'a'alo Football ma le au Ta'a'alo Volleyball a le aoga maualuga, sa faia i le aso To’anai ua te’a ma sa latou fa'atautaia ai se Uilipaelo i le Fagaloa ma le Radiothon i le KSBS.

O le aofai o le seleni ua mae'a fa'amautu mai e $6,050 mai le a'ao foa'i o le mamalu o le atunu'u sa fea laulau sa fa'atutuina lea i le KSMart i Tafuna, Cost-U-Less i Tafuna, CBT i Nuuuli ma le tasi Faleoloa i Pago Pago.

O le Uilipaelo na toso i le Fagaloa sa amata mai le isi vaega i Aua e oo atu i Fatumafuti. E to'a 20 matua sa auai fa'atasi ma tamaiti ma teine ta'a'alo o le 'au Volley Ball ma le Au Football a Samoana High. Sa auai le susuga le Pule A'oga Rodney Atafua ma le Peresetene o le PTA i lenei tausaga.

Ua tapena fo’i le Booster Club, lea o lo’o taitai ai John Fuimaono, ina ia fa'ao'o atu se fa'afetai i le atunu’u mo le lima foa’i.

FALETELE MO OFISA O TAUTUA ESEESE A LE KOLISI TU’UFA’ATASI

Ua fa'ailoa mai e ono tolopoina le tatalaga o le Faletele mo Auaunaga Eseese i le Kolisi Tu'ufa'atasi o Amerika Samoa.

O le masina o Setema sa fuafua e fa'amae'a lelei ai, ae tusa ai ma le tele o galuega le mae'a lelei ona o fesuia'iga o le tau, e tolopoina ai ni vaega o lea galuega, e afua ai ona fa'atua'i mae'a.

Ua tula'i mai e mae'a lelei mea uma lava tau le fausaga i le fa'ai'uga o Setema 2017, ae o totonu fo'i i galuega finisi ia matagofie ma talafeagai ma so'o se aiaiga o le avea ai ma Leed Platinum Building, e tatau lava ona pasia a'ia'i.

O le a mataituina ai tulaga tau le fa'aaogaina o panele mo le miti'ia o le vevela o le la e saunia ai lona puna'oa eletise, o ituaiga matauila e fa'aaogaina, o le fa'aaoga fo'i o le malamalama o le la ma ona sulu, ae o se tasi o nofoaga e usita'ia aiaiga o le puna'oa lanumeamata lea e fealofani lelei ona so'otaga ma le si'omaga.

Na suaina le eleele mo lea galuega ia Ianuari 2014, ma lona paketi fa'asoa e $5.14 miliona. ma sa fuafua e na'o le 14 masina e fausia ma mae'a ai. Ua umi le taimi e fausia ai nei, aua e le o po se lilo i le tulaga o le tau e matele ina timu, ma ua le gafatia ai ona faia galuega e tatau ona fa'atino i aso la.

Ua fa'ailoa mai, e ui fo'i ina fesuia'i nisi o le tapulega a le tatou Kolisi Tu'ufa'atasi, ae o lo'o gasologa lelei lava lea galuega.

"Afai e maea lenei maota, o le a avea ma faletele lona tolu ua mae'a pasia fo'i o se Leed Platinum Building i le tatou Malo, lea e aofia fa'atasi ai le ASEPA, ASPA ma i matou nei. Ua tele aoga o le a tautuaina ai le fanau a'oga iinei, ma ua mafua ai ona fa'ailo o le Multi Purpose Building,” o se tala lea mai se tasi o lo'o ia va'aia le fausaga ma le galuega i ona tulaga uma mo le Kolisi.

O le a aofia fo'i se potu fono, Auditorium, i lea lava faletele, ma ona ofisa ta'itasi o lo'o i ai i le fale tuai, ae fa'aavanoa ai isi potu sa i ai, e avea ma potu a'oga.  Peita'i o nei mea uma, o le a fa'ato'a fa'amautu a'ia'i i le taimi tonu e mae'a ai le faletele, ma faia fa'ai'uga mai le Peresetene o le Kolisi.