Ads by Google Ads by Google

Tala I Vaifanua

SA’AFI’AFIGA MO MOANA TIMENA AUMAVAE

 

Na faatumulia le malumalu o Siona le Mauga Paia, o le Ekalesia EFKAS i Leone i le aso Faraile na te’a nei, i uo ma aiga na lolofi atu e molimauina toe saunoga o le Tina peleina ia Moana Timena Aumavae.

 

Na soifua Moana i le aso 10 Fepuari 1956 i lona aiga i Hawaii, ae faamanavaina ana galuega e le Atua i le aso 19 Iulai 2017. O lona soifuaga aoaoina e aofia ai aoga laiti i Hawaii, ma fa’aauau ai i le aoga a le Fiailoa School ina ua siitia mai lona aiga i Amerika Samoa nei, ma fa’au’u mai ai i le aoga maualuga a Leone i le 1974.

 

Sa ia tauaveina le suafa Tomanetoa mai lona aiga i Samatua, Samoa, ae ina ua matua o ia ma lagona le le toe atoatoa o le malosi, sa ia talosagaina ai loa lona aiga e fa’aee le suafa i lona tuagane o Aumavae Kenape L. Aumavae na te fa’aauauina.

 

O le tausaga e 1987 na fa’aipoipo atu ai o ia i lona ali’i o Lazaro Tolentino i Hawai’i ma atina’e ai lava lo la aiga, ae ina ua maliu lona ali’i, na toe fo’i mai ai loa o ia i Samoa e tausi ona matua ma tautua lona aiga.

 

Na taua e ni isi o uo ma aiga i a latou molimau le taua tele o le soifua tautua sa fa’atinoina e lenei Tina i lona aiga, ekalesia ma le afioaga, ma ua fai lea ma fa’ata’ita’iga sili mo le to’atele o i latou.

 

“O se Tina e sogasoga e sailiili i mea e manuia ai le aiga, e loto fesoaosnai i tupulaga talavou, e fiafia fo’i e tautua mo fanau a le ekalesia, o lona aiga ma le atunu’u. E le tele sona tamaoaiga, ae o le fiafia ia e faasoa atu le alofa i soo se tasi,” o le molimau lea a se tasi o lona aiga.

 

E le misia fo'i se A'oga Aso Sa ma se mea e tasi a le Autalavou, aua e taua ia te ia le aoa'o atu o tupulaga o Siona i le afioga a le Atua. E taua fo'i ia te ia, le fa'atonutonu o fanau a lona aiga, atoa ai ma fanau a lana ekalesia ma le afio'aga o Leone i uiga ma tu fa'asamoa moni tau le talavou.

 

A’AFIA FANAU SAMOA I FA’ALAVELAVE I ALASKA

 

Ua taua mai i ni ripoti mai fafo le sailia e Leoleo i totonu o Anchorage i Alaska o ni isi o fanau Samoa, ona o le fa’alavelave lea na ave fa’amalosi ai se ali’i e 34 tausaga le matua ma fasi fa’amo’amo’a lona tino, toe loka o ia i totonu o se pa u’amea, mulimuli ane toe momoli lona tino ma fa’ata’atia i luma o se falema’i i le afiafi o le aso Sa, Aokuso 13.

 

O i latou e to’afa o lo o tau sailia nei e Leoleo, e aofia ai ni ali’i se to’atolu ma se tama’ita’i se to’atasi, lea ua poloaina e le fa’amasinoga tusi saisai e pu’e fa’apagota mai ai i latou nei. O i latou uma nei e fa’ai’u Samoa, ma ua mae’a fo’i ona fa’alauiloa o latou ata i luga o le televise ina ia fa’a faigofie ai ona maua i latou e Leoleo.

 

O le fiu ai o le uo tama’ita’i a le ali’i na a’afia o Abshir Mohamed, na ia logoina ai loa Leoleo mo se fesoasoani, ma amata ai loa sailiga a Leoleo i le nofoaga na mulimuli lava vaaia ai le tino o lenei ali’i.

 

Na faateia Leoleo ina ua latou maua atu i luma o le falema’i se pa u’amea lea e loka ai manu, o lo o loka ai i totonu le ali’i o lo o latou tau sailia ma manu’a i lona tino.

 

E le o manino mai i le taimi nei le mafua’aga na ala ai ona fa’atino e i latou ua sailia nei lenei fa’alavelave.