Ads by Google Ads by Google

Tala I Vaifanua

FINAU TA’ALOGA VOLIPOLO SAILIA SIAMUPINI 2017

I le tamia nei, ua amata ta’aloga e saili ai ‘au e 4 maualuluga e sailia ai le Siamupini o le Samoa Volleyball Challenge League lea o lo’o fa’aauau pea i le fale taalo a Samoana High School.

I se va’aiga i le ituaiga ta’a’alo ua tauva ai nei le fanau talavou, ae maise i le Under 19, ua matua suia lava le tomai ua latou fa’aaogaina ai le polo.

“Afai e oso atu i le isi fika ae poloka mai ona ua lelei foi le puipui mai a le la itu, ia suia le aikia e fa’aaoga, pe fa’aaoga loa le fai’ai ma le iloa i le ta’aloga, na ia maua le ‘ai, o le sini atoa lea,” o se apoapoaiga lea a le faia’oga o le ‘au a le Mizuno i lana ‘au, ina ua matauina ua fita le ta’aloga i le va o si ‘au nini’i ma le ‘au masii mai Samoa All Stars U19.

O le vae vave fo’i o le fanau talavou ia piki mai le polo pe a oo ina masasau tu’i a le isi ‘au, e matua iloga lo latou taumafai e fa’aaoga soo se avanoa ia sao le polo ma fa’aauau ona toe molita’i atu i le isi ‘au mo se ‘ai. “E sa le fo’i, e oki lava o fusu ma le polo,” o se tala ata lea a le ali’i Kolone Alefosio, Mizuno.

Peita’i i le latou ta’aloga na fa’atautaia i le afiafi o le aso Lulu ma le Au Masii mai Samoa, ua malolo ai i latou i le malosi tele o tauau o tama mai sisifo. E lua seti soso’o na avea e le ‘au mai Samoa, ae tasi le seti na maumalo ai Mizuno i le latou fetauiga lea. O lona uiga ua aga atu nei le ‘au mai Samoa ina ia sailia le siamupini ma se ‘au e manumalo mai a Pavaiai ma le All Sports lea e le’i faia lena ta’aloga faitaulia.

I vaega matutua, sa mua’i tatala malae ai le ‘au malosi a le Laumua o Tuma, siamupini o le Tutoatasi a Samoa ma le latou Teuila Week o le 2016, ma le ‘au a Pavaiai Men’s Team. E lua seti na malo ai Laumua o Tumua ma ua tatalia nei e i latou se isi ‘au e latou te fetaui i le 4 ‘au pitoaluga e latou te fetaui mo le siamupini o le Samoa Challenge.

Ona o le taimi fa’atulaga nei mo le fa’aaogaina o le malae i Samoana mo ta’aloga uma e faia ai ta’aloga e muta i le itula e 8:00 i le afiafi, o lea ua le gafatia ai ona faaauau ta’aloga na soso’o ai, peita’i o le a soso’o fo’i mo le afiafi o le aso Tofi, taimi masani, ma ua vala’auina fo’i le au a le Laumua o Tumua ina ia toe talosaga le latou nonofo pea seia mae’a le ta’amilosaga Volipolo a le Samoa Challenge ona fa’ato’a tu’uva’a atu lea i Samoa.

 

FANAU FA’AFAIGALUEGA E LE SPORTS COMPLEX

Sa mua’i finau mai nisi o fanau e to’a 15 na fa’afiagaluega e le Sports Complex lea e va’aia le Veterans Memorial Stadium i Tafuna, ua fai si umi ae le maua mai ni a latou siaki totogi, ae o lea ua fa’ailoa mai ua maua nei siaki mo i latou uma.

Peita’i, mo se tasi o lenei fanau e le’i taliaina e lona sui le aofaiga o itula sa fa’afaigaluega ai o ia, sa ia toe fa’auia fo’i le isi ana faitioga i le faigamalo, ma ua toe fa’aulu nei ona itula fou ina ia totogia.

Fa’ailoa mai, o nei fanau e ala usu atu i le stadium i le itula e 6:00 i le taeao, ae fatato’a manava fo’i i le 6:00 i le afiafi mo lena vaitau. Lea fo’i ua toe fa’atula’i ese mai nei galuega sa fa’afaigaluega ai.

Ina ua fa’afeso’ota’i le vaega a le Sports Complex mo se fa’amaoniga sa faigaluega nei fanau ma ua totogia fo’i i latou, ae fa’ailoa mai e le sui, “Ioe sa faigaluega, ua mae’a totogia i latou, e le o toe faigaluega fo’i i le taimi nei i latou na, ae tatau ona talanoa sa’o i le ali’i fa’atonu HenryTavake, mo se fa’amalamalamaga atoatoa o le ituaiga faigaluega na fa’afaigaluega ai nei fanau.”

Na fa’ailoa mai fo’i,  “E moni e i ai le sui e to’atasi na le malie i ona itula faigaluega, peita’i, ua toe fa’aulu ona taimi o loo manatu o ia e ao ina totogia, peita’i e le’i faigaluega ai.” O le fa’apupulaga, o le pepa pani lava latou e le o i ai nei itula, ae ua faatonuina ina ia totogia, le 120 itula o totoe.

Ua fesiligia fo’i le Matagaluega o Tagata Faigaluega a le Malo i lenei aofai na faigaluega mai a le Sports Complex, ae fa’ailoa mai e i latou, o ni konekarate poo nisi faigaluega tumau na latou taliaina e faigaluega mo le malo.

E le i mafai ona maua le susuga ia Tavake mo sana fa’amatalaga e tusa o lea vaega sa fa’afaigaluega i lana pulega i lea vaitaimi ma ala fo’i o totogia ai.