Ads by Google Ads by Google

TALA I VAIFANUA

FA’ATA’ITA’IGA POO SAUNI TAGATA UMA MO FAALAVELAVE FAALENATURA

 

O le itula e 11:00 i le taeao nei i le ofisa autu a le malo i Utulei, le EOB, o le a faia ai le tatou Fuafuaga Fa'ataoto mo Tapenaga e tali atu i fa'alavelave tau Galulolo, ina ne'i lutia fa'afuase'ia le atunu'u i se taimi o lumana'i ae ua mae'a fa'ata'ita'ia lea fuafuaga, ma iloga ua toeitiiti atoatoa lelei e fa'asaogalemu ai tagata uma.

 

O lea fuafuaga fa'ataoto e ao ina fa'ata'ita'ia a'o mataituina e le vaega o le US Army, ina ia va'ai toto'a ma pasia lelei, pe mata o talafeagai mea uma ua tapena e le Matagaluega o lo'o Puipuia le Saogalemu Fa'alotoifale o Amerika Samoa, ia saogalemu tagata uma.

 

O le Matagaluega o Auaunaga ma Pulega [Administrative Services] o le Malo o lo'o ua gafa nei ma le taumafaiga e fesoasoani malosi i le Matagaluega o le Puipuiga o le Saogalemu Fa'alotoifale o le Malo ina ia sao ma uli lea fa'amoemoe i le Maota o le Malo i Utulei, aua o lo'o faofale ai le Ofisa o le Taiulu o le tatou Malo, atoa ai ma isi uma matagaluega o aofia ai.

 

"Lea ua sauni e tu'u atu le tatou Fuafuaga Fa'ataoto o mea e ao ina fa'atino e fa'asaoina ai tagata i nei taimi faigata, ua tatau loa ona matua tu'u atoatoa i ai o tatou fai mea mae'ae'a, ia sefe mai le soifua o tagata o le atunu'u e o mai i le Maota o le Malo, ae maise fo'i o i latou o faigaluega i lenei faletele o Ofisa o Matagaluega ta'itasi o i ai." O se saunoaga lea a le susuga le Fa'atonu Fuega Sa'ite Moliga.

 

"Ua iloga le mea e fa'atino e fa'atonu uma o matagaluega ta'itasi, peita'i, pe ua nofo saunia fa'atonu uma e fa'alogo i ta'ita'i tofia mo le aotelega o le auaunaga?" O le tala ata lea a Moliga e tusa o le latou vaega o le a fa'atasi i le Emergency Office.

 

LE TOE TALIA AFIOAGA MOATA’A NI PISINISI ASIA

 

Ua fa’aalia i ripoti mai Samoa le tumau pea o le afioaga o Moatasi i le latou faaiuga ua mae’a ona faia, e le toe taliaina ai ni pisinisi Asia e fausia i totonu o le nu’u. Na taua e se sui o le afioaga o Moata’a ia Asi S. Blakelock i tusitala i Samoa e fa’apea, o le fa’aiuga sa pasia mai e Tuaa ua lagomau mai Tiasa, o lea lava o loo mulimuli ai ta’ita’i o le afioga i le taimi nei, ma e le mafai ona toe suia lea fa’aiuga ua leva ona i ai.

 

E ui o lo o i ai ni isi o le atunu’u ua latou fesiligia lea fa’aiuga, peita’i na taua e Asi le i ai o nisi o afioaga ua latou lagolagoina le latou fa’aiuga, ona e manatu i latou o se fa’aiuga poto ma lelei mo le puipuia o le lumana’i o fanau a le atunu’u.

 

O lea faaiuga na mafua ai ona faaalia lagona faanoanoa o se alii faipisinisi i totonu o Moata’a, ona ua silia i le $70,000 le tupe ua alu i le toe fa’afouina o lana pisinisi, ao lea ua tuuina atu le faaiuga e tapunia ai lana pisinisi.

 

TO’ATELE O LOO FAATALITALI I SIAKI O LAFOGA

 

E to’atele le au totogi lafoga ua fa’aalia lagona faasea ma le le fiafia, ao faatalitali ai i le taimi e maua ai siaki mo latoua e fesoasoani ai i le tapenaina o fanau mo le toe a’e o aoga i le vaiaso fou, ae a faaalia e se sui o le Ofisa o Lafoga i le Samoa News, o le aso 17 Fepuari lea o loo gata mai ai siaki sa tufaina mai, ma le fa’amoemoe o se taimi e le o toe umi e alu atu ai le isi sapalai o siaki ua mae’a ona sainia.

 

Na taua e se tasi o Tama matua le alu atu e siaki lana siaki ae faailoa ane e lei oo le faasologa ia te ia, ae ina alu i le ofisa ma piki mai ai lana numera, na mafai ai loa ona maua le siaki o lana lafoga sa faila i le aso 22 Fepuari ananafi.

 

Na taua e lea Tama le faateia o ia ina ua maua mai lana siaki, ae a vili atu i le telefoni ae fai mai o loo gata lava i le aso 17 Fepuari le tufatufaina o siaki o lafoga. O le auala na fa’atino ai e se tasi o tagata matua a le ofisa o Lafoga le tautuaina o ia, na ia fa’aalia ai le tatau lea ona fa’amalolo tagata matutua o loo galulue i nisi o ofisa a le malo, ae tatala le avanoa i fanau talavou o loo tau saili ni galuega.

 

TOE SAUNIGA MO LE ALI’I FITAFITA NA MALEMO I ALEGA

 

Ua fa'atulaga le sauniga fa'apitoa mo le ali'i fitafita na maliu fa'afuase'i a'o maulu i le ogasami i gatai o le Tisa's Barefoot Bar i Alega, Sgt Albert Chung, ia Aukuso 6, 2017.

 

O lea sauniga e fa'atautaia lava i le USArmy Reserve i Tafuna i le aso Faraile o lenei vaiaso i le itula e 1:00 i le aoauli ma o le a fa'atautaia o se sauniga fa'apitoa e fa'amanatu ai lona soifua tautua fa'atasi ai ma nisi o tatou tagata ae maise o isi ona uso a fitafita i le Vaega Au a le Malo tele.

 

E na'o le 32 tausaga le matua o lenei fitafita ma o lona tupuaga e afua mai Korea, peita'i ua o'o fa'atolu mai o ia i le tatou malo e ala i se vaega o fitafita o le US Army sa latou o'o mai e fesoasoani i le fa'aulufaleina atu o le to'atele o fanau a le tatou malo ua mae'a fa'atauto e tautua i le US Army na le USArmy Reserve.

 

O le isi sauniga mamalu mo lenei ali'i fitafita o le a faia mo ia pe afai o le a to'ai taunu'u i lona aiga.