Ads by Google Ads by Google

TALA I VAIFANUA

LESITALA MO LE VAIASO O LE COAST WEEK

 

Ua faailoa mai e le Matagaluega o Fefaatauaiga ma Alamanuia le amata lesitala lea o au taaalo mo taaloga eseese, i le faamanatuina o le vaiaso o le Coast Week i le masina fou o Setema, e aofia ai tuuga ‘aau, faapea ai ma tuuga o va’a alo e aofia ai le ituaiga o le Kayak.

 

E tatala le avanoa i soo se kamupani, faalapotopotoga poo afioaga foi e fia auai i lenei fa’amoemoe.

 

FAAVAE LE ASOSI VOLIPOLO FOU I LE ATUNU’U

 

Ua fa'ailoa mai ua i ai nei le isi Asosi Volley Ball fou ua mae'a fa'atuina i le tatou teritori, ma ua sauni atu i latou ina ia fa'atautaia ni a latou ta'amilosaga Volley Ball i le teritori. Ua fa'ailoa mai e faia le latou fonotaga i le aso i Nuuuli, peita'i, ua faia fo'i le fonotaga a le tatou Asosi Volley Ball ASVBA i le maota e masani ai o Gaisoa i Fagaima.

 

Ina ia mautinoa o lo'o tumau pea lava le fiafia o fanau a Amerika Samoa i lea fo'i fa'agatama, ua fa'ailoa mai o lea asosi volipolo fou ua avea ai nei le ali'i o Ben ma peresetene. O lea fo'i le asosi ua fa'atasi atu i ai ma le susuga Legae'e Mauga, peita'i e le o avea ma se tasi o le nofoatofi mo lenei ulua'i tausaga.

 

E tusa ai ma se manatu fa'aalia o se tasi ua iloga fo'i ona faia so'o a latou 'au Volley Ball e tauva i le Liki ASVBA, ua ia fa'ailoa mai lona taofi, "Po'o le a lava gaoioiga e fa'atautaia mai le tele o tausaga, o lo'o i ai lava le agava'a i fanau e tauva ai i lea fo'i fa'agatama. Ua lagona fo'i le tele o nisi e fai manatu i so'o se taumafaiga, ae le avea ai le naunau o matou uma lava ia faia le gaoioiga e ao ina faia, e fa'amausali ai le naunau o fanau ia tauva ma fa'aaoga le latou taleni ta'alo."

 

E le o mafai ona fa'aalia taofi o nisi e tusa o lenei suiga tele, aua ua fa'ailoa mai e se tasi sa auai i le ASVBA ua avea nei ma totino o le ASVBF, "O lo'o i ai lava le fiafia i tagata ta'a'alo uma, peita'i, e le taofia ai fo'i le manatu ina ia faaleleia atili o ala e tautuaina ai i latou e naunau i lea fa'agatama, ia fa'ateleina i latou e maua avanoa e malaga atu ai i fafo e tauva ai."

 

TOE A’E AOGA I LE VAIASO FOU

 

O le a toe amata a'oga a le fanau ae maise o aoga tumaoti e aofia ai le Manumalo ma sosoo atu ai lava ma aoga a le Malo, ma ua tapena fo'i le au faioloa i le atunu'u mo latou oloa eseese e mafai ona tua i ai matua aua fa'atauga mo le fanau e toe a'e ai a'oga.

 

Ona o le aso e toe amata ai a'oga, ua leva fo'i ona fa'alauiloa mai Oloa tau api ma isi oloa e fa'aaoga mo le a'ega o a'oga, ato a'oga, toniga o a'oga atoa ai ma latou se'evae ma le tele o la'ei ta'alo e mo'omia mo latou piliota o taaloga.

 

E ese mai le Paradise Inc i Nuuuli ua tula'i mai fo'i le Ace Home Center i Malaeimi ma le tele o latou oloa o ituaiga eseese fa'atasi ai ma tusi e fa'aaoga mo le faitau tusi a fanauiti, tusi valivali ata ma api fo'i e mafai ona fa'aleleia atili ai le ola fia a'oa'oina.

 

Ua tapena fo'i le matagaluega o aoga a le tatou malo mo le latou matafaioi o le fa'alava o faia'oga i potu a'oga ina ia mautinoa ua maua e le fanau a'oga i le atunu'u le ituaiga o a'oa'oga ua fa'atulaga e le Malo tele mo fanau uma ua soifua i totonu o latou setete ma teritori.

 

E i ai fonotaga fa'aleaoaoga ua mae'a fa'atulaga mo faia'oga uma, le vasega o faia'oga fou, ae maise o le vasega o au kuka i totonu o le polokalama a le Mea Taumafa mo le Fanau A'oga.

 

I lenei fo'i tu'uaga umi o a'oga, e tele lava aoaoga fa'apitoa sa faatautaia mo le fanau a'oga. E le'i gata ai i le tele o aoga na fa'atatuaia e le Arts Council mo vaiaso e fa o le masina o Iulai, ae sa faia fo'i a'oga Samoa e le Matagaluega o A'oga, le polokalama ua fa'aigoaina ASIA.

 

TOATELE UA NOFOMAU I NIU SILA I LE POLOKALAME A LE QUOTA

 

Ua tula'i mai ua to'atele Aiga Samoa Tuto'atasi ua maua latou avanoa e malaga ai i Niu Sila e nonofo mau ma faigaluega e tausia ai latou aiga, ona o le polokalama a le Kuata Mo Niu Sila.

 

Ua le gata i aiga o lo'o alaala tumau i Samoa lava, ae ua fa'apena fo'i ona fa'asalafa nei avanoa i aiga Samoa o lo'o alaala i Amerika Samoa nei.

 

Ua fa'ailoa mai i fa'amaumauga e tusa ma le 1,100 avanoa o lo ua mae'a fa'aavanoa mo aiga Samoa e alaala tumau ai i Niu Sila, ma e silia ma le 1,500 tagata taito'atasi, o sui o aiga ua talia i lea polokalama ua mae'a fa'amautu atu i Niu Sila ona o lenei avanoa.

 

O lea polokalama e se'ia suafa o aiga i le palota, ma e ui lava ina ua tula'i mai le aofaiga o talosaga i le 15,263 aiga ua mae'a faila atu latou talosaga, ae ua tula'i mai fo'i ua maua le 1,000+ ua mae'a lelei ona fa'amautu latou aiga i Niu Sila mai lea faitau aofai.