115 TAMAITI AUAI POLOKALAMA  4H - ASCC LAND GRANT

O le aso ananafi sa fa'amae'a ai le tele o tautua sa a'oa'oina ai fa'apitoa le fanauiti mai le 5 tausaga e o'o i le 12 tausaga le matutua, ae o i latou sa fa'aulu atu e ta'i 13 - 15 tausaga le matutua, sa avea lea ma fesoasoani malosi i le vasega o ta'ita'i, mo le fa'atautaiga o a'oa'oga sa feagai ai le fanau mo le 4 aso o lenei vaiaso.

"Ua fiafia tele ua ou maua se avanoa i lenei tausaga e avea ai au ma faia'oga fesoasoani i le matou tina faia'oga o le Polokalama a le 4H lea e a'oa'o ai le fanauiti ina ia iloa lelei tausia le soifua maloloina, ia fa'amama mea uma i totonu o lou aiga ae maise le falenofo o alaalata'i ai lou aiga, ia fa'amama fo'i nofoaga o loo tausia ai meaola fa'afagagfao, fesoasoani i lou aiga i le galuea'ina o le fa'ato'aga, iloa ona faia fe'au i le umukuka o le aiga e gaosia ai mea'ai, ma isi lava ituaiga o fe'au e masani ona fesoasoani ai fanau talavou i o latou matua ma aiga i aso ta'itasi,” o se tala lea a Zynbad ma Joseph, o ali'i ua atoa le ta'i 14 tausaga le matutua, ae ua avea ma sui fesoasoani i faia'oga ta'itasi o vasega e 4 o lo'o vaevaeina i ai le fanau e 115 ua ulufale ma lesitala e auai i le 4H i lenei tu'uaga o a'oga.

O le tina o Nellie o le 4H e nafa o ia ma le fanau e 5-7 tausaga le matutua, ua ia fa'ailoa fo'i, "O lota fiafia latou e alausu mai e va'ai i le naunau o le fanau e fia iloa ma soso'o latou lesona sa faia mai i le aso ananafi. Lea ua va'aia, e matua fiafia le fanau e fa'atumu a latou tusi ata ua mae'a ona fa'avasega, e iloa ai fo'i e matua le ituaiga a'oa'oga sa faia i le fanau, a'o o mai i lenei polokalama."

Sa asia e le fanau a'oga togala'au o fa'ato'aga o la'au 'aina, o lo'o totoina e le aufaigaluega faifa'ato'aga a le Land Grant. Ua latou va'aia ai le olaola o la'au toto lelei, ma e fa'asusu i le suavai. E ese mai lea e asia fo'i e i latou le faletoto la'au lea e fa'afailele ai fatu la'au e fa'aola mai ai la'au fou ina ia totoina. O nisi o nei la'au ua fa'aaogaina lea mo vai fofo Samoa, lea e matele ina fiafia tele Tagata Samoa e inumia e malolosi ai latou tino.

E le gata i lea ae tele na'ua fo'i latou taimi o a'oga na fa'amalosia ai lo latou mautinoa o le saogalemu o i latou a'o fa'aaogaina mea faigaluega, o vaila'au o'ona e ao ina latou iloa lelei e ono ai lamatia ai lo latou soifua maloloina, ma ia mata'alia i latou i le fa'aaogaina o mea faigaluega i galuega e fesoasoani ai i latou matua i galuega o fa'ato'aga.

O le tele o taimi o le fanauiti, e fa'alogologo ai latou i tala o faitauina e faia'oga, lona lua o le fa'amalositino lea. e tatau lava ona faia i aso uma, i ta'a'alo fo'i e fa'aalu ai le afu ma le so'ona mamafa ai o latou tino. O le faitau tusi ma le valivaliga o latou tusi ata, ua i ai lava piliota e faia ai e le fanau.

E i ai lo latou taimi e faia ai le 'aiga o le aoauli, a'o le tu'ua mai i latou i aso ta'itasi. I le latou toe aso, sa fa'atulaga ai le latou fiafia e faamuta ai mea uma sa latou a'oa'oina, ma ia tumau ai fo'i lo latou naunau e toe ulufale i le polokalama lenei i le tausaga fou, peita'i, e ao ia i latou uma, ona mautinoa, e galulue mea uma ina ia maua ai le poto ma le aoaoina lelei. E ao fo'i ina malosi lou tino ma maua lou soifua maloloina, ina ia atoatoa ai le fiafia o le tagata soifua.

ASIA "Tama'ita'i U18 Hand Ball" OFISA FAIPULE I LE KONEKERESI

O le taeao ananafi sa o'o atu ai le susuga Carl Floor Sr. ma le 'au a tama'ita'i U18 Hand Ball i le Ofisa autu o le Faipule i Uosigitone Aumua Amata ina ia fa'ao'o atu se latou fa'afetai tele ia te ia, aua sa ia sapaia a latou taumafaiga ia saili seleni mo a latou malaga mo ta'aloga fa'atauva fa'avaomalo, lea ua i'u manuia.

"O oe sa e le fesiligia se fa'amoemoega lelei, sa e sapaia matou sailiga, ma sa e fa'amanuia mai, atoa ai ma lau saunoaga fa'amalosi! Lea ua matou fo'i mai, e ao ia i latou ona toe fa'afo'i le fa'afetai ia te oe, aua uma mae'a le fa'afetai na si'itia i le Atua ma matua ma aiga, ae maise le tapua'iga le mavae a le tatou Malo,” o a Floor lea.

Saunoa aumua, "Ou te matua fa'afetaia outou ma la outou taumafaiga. Sa outou le va'ai i lo outou laiti ma le fa'atauva'a, ae ua outou faia le mea sili, ma ua outou fo'i mai ma le 'ai o le manumalo. Ou te mautinoa, sa ia te outou lava le Atua o mea uma ma le malosi uma lava, o le fua lena ua outou maua ai se sini taua sa outou tausailia."

I lea lava fa'atasiga, sa tula'i le tama'ita'i o le Kapeteni o le 'au Hand Ball U18, Stepahie Floor, ma taua'aoina le polo o le latou ta'aloga na manumalo mulimuli ai, ma ua avea ma latou pine fa'amau, e ulufale atu ai i le Youth Olympics i le 2018 i Argentina.

O se meaalofa na matua talia fa'afatueleele e le tama'ita'i Faipule ma ia fa'apea ai, "O se fa'ailoga matagofie lenei o se taumafaiga ua au ma se sailimalo ua fa'aeaina, fa'afetai o le a ou alu lava ma a'u i Uosigitone, ina ia fesili ai le to'atele o nisi e malaga atu i lo'u lea Ofisa, ma ou fa'ailoa i ai a outou saini ua tusia ai, e fa'amau ai lo outou tausaga o le manumalo."

Ina ua mae'a se tali na tapena e le tama'ita'i faipule mo le fanau ta'a'alo, o le sauvai suamalie e aoga mo e ta'a'alo, ona toe tula'i lea o le Faipule ma ia fa'ailoa i le fanau tama'ita'i o le atunu'u, "Ua fili fa'apitoa outou i lenei fa'amoemoe, afai e fita le ala, e fa'ateleina ai lo outou iloa ma le agaga e le mana'o ina ia matu'u ese atu le taumafaiga a'o to'ele pea. Ia outou iloa e fa'a sefulumaletasi ona ou tauva, fa'ato'a ou maua le manumalo. E 22 ai tausaga talu ona ou faia lena faiva o le faia'ina. Ae fa'atupula'ia pea e le Atua le naunau, aua e i ai se manumalo o lo'o fa'atali mo oe i le faitoto'a o le fa'aeaina e matagofie lona taui. Fa'afetai, lea ua outou taumafai ma outou mafai. Ia tasi lo outou loto, e tasi fo'i le fa'amoemoe, e tasi le 'auga o mea uma, ia manumalo! Ia tausailia atili pea lena tulaga, a'o outou alofaiva atu i isi tauvaga o lo'o lomaloma mai e fa'aleleia atili ai o outou tomai. Ou te sapaia lava outou aua o lo'o avea pea a'u ma o outou sui e tapua'ia o outou faiva i malae. Aua ne'i galo ia te outou, e taua le atamai i so'o se mea, e eseese lava le ta'alo ma le atamai ma le ta'alo i le malosi."

Na fa'ailoa e le susuga Floor, e lua isi ta'amilosaga o le a tapena atu i ai i latou, ma o ia ta'amilosaga e faia i le tausaga fou ia Fepuari 2018 ma le vaitau o Iuni ma Iulai 2018 i Kalefonia. O Fepuari 2018 o le ta'amilosaga Hand Ball lea i Ausetalia, lea ua mae'a taua'aoina le latou vala'aulia ina ia auai atu ai.

O i latou uma na auai i lea fa'atasiga ma Aumua Amata e aofia ai: Faiaoga CJ Floor, Frances Auva'a Nautu, Imeleta Olive Matautia, Fiapaipai Fanene #23, Naomi A'asa, Tara Mageo #5, Elsabad Tuiolemotu Elisara #14, Danielle Floor #6, Jasmine Liu #12, Stephanie Floor #3, Roselyn Faleao #7 ma le matua lava e to'atasi sa auai o Tootoo Tuiolemotu Elisara mai Poloa.