Ads by Google Ads by Google

Tala I Vaifanua

TOATELE LE MAUA SIAKI TOTOGI I LE OFISA O AOGA

 

E to'atele nisi o faia'oga a le Matagaluega o A'oga ua toe le maua fo'i latou siaki totogi i le aso sa tatau ona totogi i le aso Gafua na te'a nei. O nisi fo'i o i latou e le'i maua atu latou siaki totogi e fa'auia atu i latou tusi tupe ma talaina i tua e pei ona masani ai.

 

I le taimi nei, ua fa'ailoa atu ia i latou, e fa'atalia le aso Tofi po'o le aso Faraile e maua ai latou siaki totogi.

 

E le o le taimi muamua lea na tula'i mai ai mea fa'apenei i nisi lava fo'i o tagata faigaluega a le Matagaluega o A'oga. I le lua masina talu ai, na fa'atalia ai fo'i e nisi o le aufaigaluega a lea matagaluega latou siaki, ae ua le maua. O nisi o i latou, ua fa'ato'a atoa ai lea o le tausaga talu ona faigaluega i lea matagaluega. Ona fa'ailoa mai lea, e masalo o lo'o va'ai toto'a i ai le fa'auluuluga o le matagaluega, aua ua atoa i ai le tausaga talu ona faigaluega.

 

Ina ua o'o atu i le aso Faraile sa fa'atalia e maua ai, ae toe fai ane i ai, e tatalia ia le isi taimi e maua ai le latou siaki totogi. Ona o'o lea i lena aso totogi, ua maua na'o le siaki sa'o lava o lena lua vaiaso, ae o le siaki sa misia, sa fa'ato'a maua i le aso Tofi ua tolu i ai vaiaso talu ona fa'atalia le toe fa'aa'e ane o lena siaki mo le sui faigaluega.

 

Pe afai e maua ai fo'i le vasega o faia'oga o lo'o a'afia i lenei vaiaso totogi, ae o lo ua silafia e i latou ua a'afia i lenei fa'aletonu, e le na'o outou ua o'o i na tiga.

 

Ina ua maua mai lea fanoga, na taumafai e fa'afeso'ota'i le Fa'atonu o A'oga Ruth Matagi, sui fa'atonu ae maise fo'i o le fa'atonu o Matagaluega o tagata Faigaluega a le Malo, ua o gatasi lava i leai o se tali mai e fa'amanino ai lea mataupu.

 

O le pagatia o le le totogia o pili, ae maise o le fia maua o se tupe e fa'atau ai mea'ai a aiga o nei sui o a'afia, e le faigofie ai lagona.

 

SGT. ALBERT CHUNG, MALIU I LE SAMI O ALEGA

 

Ua faalauiloa mai nei le suafa, Sgt Albert Chung, o se ali'i fitafita a le US Army, 32 tausaga o lona soifua, na maliu i le sami o Alega i le aso Sa na te'a nei, a'o maulu i latou i lea ogasami.

 

O le ali'i fitafita o se tasi na soifua a'e i Amerika peita'i o lona tupuaga e mai Korea. Na fa'ato'a to'ai taunu'u mai o ia i Amerika Samoa i le afiafi o le aso Faraile na te'a, ma o lo'o auai mai o ia i nisi sa auina mai e fesoasoani i le fa'aulufaleina o fanau a Amerika Samoa ua mae'a faatauto e tautua i le USArmy.

 

O le fa'alua ai lea ona o'o mai Chung i le teritori, ae o lo'o tautua o ia i le Army i Korea.

 

Fa'ailoa mai e MSgt Eric Mills, o ia lea e fa'auluulu i ai le aumalaga fesoasoani a le Army lea sa sau ai Chung, "O lenei ali'i fitafita, o se tasi e faigaluega lelei tele, ma e fa'alogo i fa'atonuga, e faia ona tiute ma le fa'amaoni. O se tasi o le a misia i le matou galuega."

 

“O Chung o se tasi ua fai sina uma o avea ma se tasi e matou te faigaluega fa'atasi lava i le faaulufaleina o fanau i le USArmy i le Pasefika, ma sa a'oa'oina fa'atasi lava i ma'ua i nei ituaiga o faiva."

 

"O le fa'afa ai lea ona o'o Chung i Alega ma o na taimi uma lava sa a'ua'u ma maulu ai i latou. O se tasi o mea ua matou fiafia tele e faia, peita'i, e le mailoa lava mea fa'apenei e tutupu mai, ma maumau ai se uo mamae ia te'i matou uma."

 

E to'alima i latou na o i Alega mo le latou mea masani ona fai. Na latou fa'atalia le tai se'i sua mai, peita'i, a'o latou fa'atalitali ma talanoa fa'asamasamanoa, ae ua tete'i i le sau o se tasi o latou uo ma fa'ailoa o lo ua i ai se faaletonu ua tupu ia Chung.

 

Na fa'ailoa le agaga fa'afetai o Mills i le taumafaiga a Candyman, ina ia fa'asaoina mai le ola o Chung, faatasi ai fo'i ma ia, aua sa tafea ese atu fo'i o ia, ma sa matala ese mai ona seevae a'au.

 

Sa ia fa'ailoa mai, atonu lava sa i ai mea sa tatau ona latou faia, ia fa'asaoina mai ai le tupu o lea fa'alavelave matuia mai le amataga, peita'i, i le taimi nei, ua ia te'i latou le agaga fa'anoanoa ona ua motusia le mafutaga ma se tasi o i latou sa latou tautua fa'atasi ma iloa lelei i le latou olaga i le Army.

 

Ua tapena le USArmy ina ia malaga fa'apitoa ai se tasi o ta'ita'i iloga o le Vaega Au ina ia auina atu le tino maliu o Chung i lona aiga.

 

FA’AFAIGALUEGA E LE MALO UNA’IA MATAUPU MEDICAID

 

Ua fa'afaigaluegaina fa’akonekarate e le malo o Amerika Samoa ia Betty Lou Taylor, o se tasi e agava'a i mataupu o le Medicaid, na te una’ia lenei mataupu i le malo fetarale.

 

O lea fa'ai'uga na faia i le lua masina ua te’a e Kovana Lolo Moliga, ina ua matauina, o le a tuai gaioiga e tau fa'asaoina mai ai alagatupe Medicaid for Amerika Samoa ae maise o se agava'a e mo'omia tele i le taimi nei.

 

Na fesiligia le Fa'atonu o le Medicaid o le tatou atunu'u, Tofoitaufa Sandra Young mo se fa'amatalaga pe aisea sa le fa'aaogaina ai lea tinoitupe a'o lava le taimi e fa'aaoga ai mo le to'atele o gasegase e fia auina atu i fafo.

 

O sana tali mai, "E le o i ai se tupe e toina mai e le Malo, ina ia totogia ai le 45% e ao ina totogia e le ASG mo pili o tagata gasegase e auina atu i fafo a le Malo. A le maua mai lea vaega tupe a le tatou Malo, e le mafai lava ona fa'aaogaina lea tinoitupe ua mae'a fa'amauina mo le tatou falema'i e le Medicaid."

 

O le fa'apupulaga, o le 55% pasene o le 80% e totogia e le Medicaid mo pili uma lava o tagata mama'i e auina atu i fafo mo togafitiga, lea e maua ai lea faitau miliona o lo'o fa'amauina mo Amerika Samoa ma e mae'a le taimi e tatau ona fa'aaogaina ai i le 2019.

 

O le taumafaiga ia toe fa'aopoopo atu se taimi e mafai ai ona fa'aaogaina lea vaega tupe, e tatau ona una'ia malosi i le CMS, lea la ua fa'afaigaluegaina ai Taylor, o se tamaita'i loia mai le itu a le Ripapilikana, ma e aoga e galulue fa'atasi ma le Faipule i le Konekeresi, Aumua Amata i Uosigitone, ina ia maua'a mai se tali a le CMS e fa'aauau le aoga o lea tinoitupe mai le Medicaid mo le tatou falema'i.