Ads by Google Ads by Google

Tala I Vaifanua

FAITAU AOFAI O MALIU & PEPE SOIFUA

 

O se tasi o mafuaga o le fa'ateleina o e ua maliliu i tausaga ta'itasi ua fa'amauina, ua fa'ailoa mai e le sui Ofisa o Fa'amaumauga a le Matagaluega o Fefa'ataua'iga, Meleisea Vai Filiaga, "E to'atele na'ua le mamalu o le atunu'u ua mae'a fa'amauina fo'i i le tatou ‘Faitauga o le Atunuu’ ua maua i gasegase tumau."

 

I fa'amaumauga, e tusa ma le 280 maliu na fa'amauina i le tausaga, ma ua tusa lea o le 23 maliu i le masina, po'o le lima i le vaiaso. O se numera fo'i ua si'itia i lenei tausaga.

 

Peita'i i le faitauga o le aofai o pepe fou fananau mai 10 tausaga o va ai le faitauga o le aotelega o le atunu'u, ua matauina ai se fa'aitiitia e tusa o le 800 o pepe. I le sefulu tausaga ua tuana'i atu, sa fa'amauina ai le 1,800 pepe na soifua mai, peita'i o lea ua fa'amauina le 1,000 pepe fou ua soifua mai i lenei sefulu tausaga.

 

Fa'aalia e le Vaega o Fa'amaumauga, "O lo ua tula'i mai ua matele tina ina loto e faigaluega, saili le atamai i a'oga, ae ua fa'atiitia ai le taimi e nofofale ai ma le toe fa'ananau ai. Ua to'atele fo'i tina ua fiafia e va'ai toto'a lo latou soifua maloloina, ona ua tima'ia i latou i ala e fa'aleleia ai le tausiga o lo latou soifua maloloina."

 

Mo se fa'ata'ita'iga, i lea lava faitauga na fa'ato'a uma atu, ua iloga ai mai ia Iulai 2016 se'ia o'o mai ia Iuni 2017, e na'o le 100 tagata na fa'aopoopo i Amerika Samoa, i lona faitau aofai e na o le 60,300. E i ai nisi ua malaga mai, nonofo ma toe taliu, o ituaiga fa'amaumauga la nei e le'i mautu lelei mai, ae ua fa'ailoa e Meleisea, e tatau ona lelei aoina mai nei fa'amaumauga mo le fa'aleleia atili o le lipoti faitau aofai o le atunu'u.

 

"Ua galulue fa'atasi nei le Ofisa o Femalaga'iga ma le Ofisa o Fefa'ataua'iga ina ia fa'aaogaina ma fa'aupuina lelei le pepa fa'atumu a tagata femalaga'i i va'alele ina ia mafai ona mautu lelei fa'amaumauga o tagata femalaga'i ma le umi sa alaala ai i le atunu’u a'o le'i toe taliu atu i malo sa o mai ai, po'o le fa'aauau atu e alaala i nisi setete ma teritori o Amerika,” o a Meleisea lea.

 

O se isi mea e faigata ai ona mautu lea faitauga, ona o nisi e mafai lava ona o mai i le pemita, nonofo se'ia mae'a le taimi fa'atulaga, toe fo'i i nu'u na o mai, ae toe o mai ina ia nonofo mau ai. Peita'i o nisi, na o mai toe taliu, ae le'i faitauina lava.

 

FONOTAGA SAMOA NA LUA IA OKETOPA 2017

 

Ua fa'atulaga le isi fonotaga ma le Malo o Samoa e faia ia Oketopa 2017, ma e malaga fo'i le tatou au usufono, ae talimalo Samoa. Ua mae'a tima'ia le mamalu o Fa'atonu uma ina ia tapena a latou lipoti e talafeagai ma mataupu fa'aautu "Fefa'ataua'iga : ala e fa'aleleia atili ai!"

 

E le gata ai i fa'afetauaiga ina ia sologa lelei ai le tamaoaiga tausi o le atunu'u, ae ua mataituina fo'i isi ala o feso'ota'iga ma Samoa, ina ia faaleleia atili ai le tautua o tagata lautele o malo na lua.

 

O le vaega o Va'ai Tau ma le tulaga o le Suiga o le Tau ua i ai nei, ia mafai ona nofouta le mamalu lautele ia autasia le malamalama o tagata lautele i fa'asalalauga ma suiga ua o'o mai o le tau. O se mea fo'i lea e matua fia mautu tonu lava e ui ina e i ai le eseesega o i ai i le taimi nei ma ituaiga fa'asalalauga e fa'auia i ala leo mo le mamalu lautele i taimi o afa, matagi malolosi ma galulolo.

 

SUIA TAIMI MAUA AI PILI ELETISE MA LE SUAVAI

 

Ua fa’alauiloa e le Pulega o le Eletise ma le Suavai le vaitaimi tonu o le masina e fa’aa’e ane ai e i latou pili fou fa’alemasina o a latou tautua lautele mo tagata uma. Sa masani ona maua nei pili i le aso 21 o masina ta’itasi.

 

O le suiga ua fa’ailoa mai o pili fou uma ua eseese taimi e fa’amauina ai i tagata uma e alaala i le itu i sasa’e o le motu, ua amata maua pili fou mai le aso 7 o masina ta’itasi, ona soso’o lea ma le maua o pili fou a le afio’aga tutotonu ma fa’asolo atu ai i le vaega o aiga e alaala i le itu i sisifo o le motu.

 

Ua augatasia pisinisi uma i le aofa’i o aso e tu’u mai e totogia ai le pili, ona amata lea ona fa’ae’e i ai le sala o le fa’atuai ona totogi, e ta’i 10 aso mai le aso na fa’amau ai lau pili fou o le eletise, suavai ma le lapisi.

 

O pili a Aiga ta’itasi, e le sala ae ua fa’ailoa atu ina ia taumafai e totogia vave pili fa’alemasina ina ia le motusia lau eletise ona ua tele na’ua lau pili e le’i totogia.

 

FAIA AOGA CPR & KOMIPIUTA MO AVE PASI AOGA

 

E 20 ave pasi mo le Matagaluega o Aoga sa auai i le vasega CPR lea sa faia mo le fa itula i le Aso Gafua ua mavae i le falema’i o le LBJ.

 

O lea a’oa’oga o loo fa’amoemoe ia maua ai ni ave pasi, ae maise lava i latou o loo fe’aveaia tamaiti o loo i ai manaoga fa’apitoa i lalo o le Polokalama o A’oa’oga Fa’apitoa mo fanau uma e le atoatoa le malosi o le Tino po’o le Mafaufau (SPED), ina ia mafai ona ofoina atu lea fesoasoani  pe afai e mana’omia, ma pe a tupu fo’i se fa’alavelave fa’afuasei i luga o le ala.

 

E fa’aopoopo atu i vasega CPR sa faia, sa auai fo’i ave pasi i se vasega fa’a-komepiuta lea sa ofoina mai e le Matagaluega o Tama’ita’i ma Tupulaga Talavou, ma sa faia i lea ofisa i Pago Pago lava.

 

O le sini o lea vasega ina ia a’oa’oina fo’i ave pasi i mea tau komepiuta, po’o a lava lipoti e mana’omia, o le a le toe tusia ae na’o le tã sa’o i komipiuta ma auina sa’o atu i luga o le  initeneti.

 

FOAI MAFUTAGA TINA PULEAGA SAMOA PAGO PAGO I LE HOPE HOUSE

 

O le aso Lua sa faia ai le foai e $5,000 mai le Mafutaga a Tina a le Pule’aga Samoa Pago Pago, e fesoasoani i le faamanutina o le 30 tausaga o le Hope House.

 

O le tausaga lenei e atoa i ai le 30 tausaga o le auaunaga alofa a le Hope House, lea e le gata ina tausia fa’apitoa ai i latou o alaalata’i ai, ae ua faigaluega ai foi le to’atele o i latou ua agava’a e tausia lelei gasegase fa’apitoa ma tagata matutua. O se sao aoga tele lea o lea nofoaga mo le tamaoa’iga tausi o le atunu’u.

 

O Larry Sanitoa, le tasi o totino o le Komiti Fa’afoe o le Hope House sa i ai i le taimi o lea foam, ma sa ia fa’ailoa mai,

 

“O le Mafutaga a Tina o le Pule’aga Samoa Pago Pago, o se tasi lea o Sosaiete a Tina loto fesoasoani ma le malosi i le alofa ma le fa’atuatua i le agaga foa’i. Fa’afetai tele mo le foai aua o le galuega alofa o lo’o fa’atino ai lava mo i latou uma o nofoia le Hope House. Fa’amanuia le Atua ia te outou tina mo le foa’i,” o le saunoaga lea a Larry Sanitoa ose totino o le Komiti Fa’afoe o le Hope House.

 

O Moseniolo Viane Etuale sa avea ma sui e saunoa mo le taua’aoina atu o le foa’i a le Mafutaga a Tina faapea le Teutupe Dr. Annie Fuavai ma le Failautusi Luana Tavale.