Ads by Google Ads by Google

Tala I Vaifanua


O se va’aiga i le taimi na tini ai le tamo’ega a le alo o Amerika Samoa sa auai i le malafoni i Long Beach le 2008, lea e molimauina le fu’a a Amerika Samoa ua ia tau’avea ae le’i toe taliu mai o ia e va’ai ma maimoa i lona nu’u na fanal ai. [ata: Brian Conboy]

O se taimi muamua lea ua toe o’o mai ai Brian Cruz Conboy i le falema’i o le LBJ lea na fanau ai i le 49 tausaga ua te’a. [ata: Brian Conboy]

BRIAN CONBOY - TOE TALIU MAI I LE 49 TAUSAGA

 

O le 49 ai lenei o tausaga talu ona fanau mai Brian Cruz Conboy, i le falema’i o le LBJ, ae fa’ato’a toe taliu mai i Amerika Samoa. Na alaala ona matua i le afio’aga o Nua ma Seetaga, ma e leai sona toto Samoa, peita’i, o lona ola a’e i le teritori, ua avea ma so’otaga.

 

Ua leva ona mana’o e toe fia taliu mai ina ia va’ai patino i le nofoaga sa ola a’e ai, ma ona tagatanu’u, ae maise o lana aganu’u ua ta’uta’ua tele i Long Beach ma Oceanside lea e to’atele tagata Samoa o alaala ai.

 

O ona matua sa malaga mai i Amerika Samoa ona ua fa’akonekarateina lona Tama, Roy Conboy, e avea ma faia’oga i le Nua Elementary School i le 1966, lea ua fa’aigoaina nei o le Alataua Lua Elementary School.

 

Sa malaga mai le ali’i faiaoga ma lona to’alua, Josephine Conboy, ma le fanau e to’atolu, Mike, Teresa ma Mark. Ae na fanau Brian i Amerika Samoa ia Iulai 10, 1968. Sa alaala i latou i Lakewood, Kalefonia ao le’i o mai i Tutuila.

 

I sona lagona i le nu’u na soffia a’e ai, sa faailoa mai e Brian, “O a’u e na’o se miti sa ou va’aia i ata, ae o le naunauta’iga sa ia te a’u atoa, ia mafai lava ona ou va’ai patino i le atunuu ma nofoaga o lo’o o’u va’aia i ata, ma fa’alogo i ai i tala a lo’u uso ma lo’u tuafafine ma o’u matua.”

 

Sa ia fa’amatala lana taumafaiga mo sona tusi folau, “O le tausaga na ou taumafai ai e maua so’u tusifolau 1990, na faate’ia ai a’u i le latou fa’amatalaga, e tatau ona toe talosaga mai so’u pepa fanau fou, ua mae’a fa’afouina kopi aso fanau mo Amerika Samoa, ma o a’u e le o se Sitiseni o Amerika, ae o a’u o le Nesionale o Amerika, ona o a’u sa fanau i Amerika Samoa.”

 

E atoa le tausaga o fa’atalia le pepa aso fanau mai Amerika Samoa. Ona faia lea e le Ofisa o Tusi Folau i Kalefonia le Tusi Folau fa’avaitaimi le tumau, e tasi le tausaga lona aoga, e fealua’i ai i le vaomalo, ae mo le Iunaite Setete lava ia e fa’aaoga ai e Brian lona pepa fa’amonia ID ma isi pepa fa’amaonia o Kalefonia.

 

“Mai le umi a’o tapena o’u pepa malaga, sa ou iloa ai ua fa’ateleina le lagona fia va’ai ma tulaueleele i le malo na ou fanau ai. Ua atili fa’aosofia lea lagona, aua ua fesiligia a’u i nisi fesili sa mafai ona talia e o’u matua ma lo’u uso matua o Mike, o ia lea sa fa’au’u i le Fia Iloa High School, ae matou te le’i o ese atu.”

 

O Brian e faia’oga i Kalefonia i le Special Education i le a’oga, John Muir Academy i Long Beach, Kalefonia.

 

I lana malaga mai, sa o mai i la’ua ma Mike. O le tama’ita’i faia’oga Evelyun Bowles Satele, lea ua avea nei ma Fa’atonusili o le TAOA, o se tasi sa manatua mai pea e Mike a’o a’oga i’inei. O ia lea sa o’o i ai i la’ua i lona maota i Alao, ma maimoaina ai le tapenaga o le suavai mo le to’ona’i o le aso Sa.

 

“I le va’ai atu i nei mea uma, ua fa’afiafiaina atili ai a’u ou te fia taliu mai ma nofo mau ma faigaluega iinei. O lo’u malo lenei, e ui ina e leai so’u aiga ae o lo’u lagona i le fa’amalo mai o tagata ma fai mai, talofa, afio mai, ua lava lea e fai ma o’u aiga iinei,” o sana tala ‘ata lea.

 

O se tasi o uo mamae a Mike, le ali’i fitafita tuai o Tusi Suiaunoa mai Nua, o ia lea sa matua fiafia i la’ua e latou te feoa’i solo. “E le’i faigofie ona motusia le mafutaga a i latou a’o talavou, o le a toe fetaui a’o soifua pea, mai le tele o tausaga ae o lea ua toe maua le so’otaga.”

 

O le tama’ita’i faipisinisi Fonoti Isabel Hudson, o se tasi sa fetaui i ai lenei ‘au uso, ma o ia lea sa fa’asalalauina fa’apitoa le mana’oga tupito ia Brian ma Mike i le faatasiga a le Kalapu a le Liona i le afiafi o Iulai 14, i le Fale’aiga o le DDW.

 

“Ua ou va’aia e ola fesoasoani ma alolofa tele tagata Samoa, ou te fiafia nei ou te taliu atu, ma feso’ota’i ma nisi tagata Samoa i Long Beach fa’ailoa atu i ai ua ou fo’i atu iinei,” o le tala fiafia lea a Brian.

 

O se tasi o fiafiaga o Brian o lona tauva lea i tu’uga tamo’e, amata mai tu’uga pupu’u ma ua o’o lava i malafoni ma tu’uga ia e tolu mea e tutu’u ai, tamo’e, a’au, vili le uila.

 

Sa ia fai mai, “E ui ina ou te le mauaina se tulaga mua, ae o le agaga tonu o le le fia muamua, a’o le tau’avea lea o le Fu’a a Amerika Samoa, lo’u nu’u na fanau ai.”

 

I le tauvaga a le “Ironman” na alu ai fo’i o ia ma lona mitiafu sa lomia ai le tatou fu’a i lona fatafata, o lo’o fa’amauina pea lona taimi ma lona tulaga i lea tu’uga tele i le talafa’asolopito o tu’uga fa’a-afeleti i le Iuniate Setete. Mo i latou uma e mafai ona sailia ia fa’amaumauga, e maua lona tulaga pe afai e te tusia lona ioga ma le igoa o le tu’uga i laina o feso’ota’iga fa’ainiteneti, o lo’o i ai foi ma lona ata ma le taimi na ia tutu’u ai.

 

“Sa ou ofua lea mitiafu ua lomia ai le fu’a o lo’u malo ma le agaga mitamita o a’u lava o le Nesionale mai Amerika Samoa. Mai le 17 aso o’u tu’ua lo’u malo, ua ou toe taliu mai e fa’ailoga lo’u 49 tausaga i le nu’u na ou fanau ai!  E pele Amerika Samoa ia te a’u,” o sana toe upu lea, ae le’i toe taliu i Long Beach i le aso Faraile ua te’a.

 

Ina ua fesiligia pe toe fia fo’i mai e nofo mau, ae fa’ailoa mai, “O le taimi lenei, e iloa lava e Amerika Samoa lo’u toe fo’i mai, aua ou te sau fo’i e tautua lo’u malo ma ona tagata.”

 

90 ASO SAPALAI FA’AAGAAGA O LE SUAU’U I AMERIKA SAMOA

 

I le folasaga na tapena Sione Lousiale Kava o le OPM po’o le Ofisa o le Pulega o le Suau’u a le malo, na ia fa’ailoa ai, “O se tasi lava o popolega tele i le Malo o Amerika Samoa, ona e le umi se malosi o i ai pe alai ae fa’aletonu tulaga o va’a suau’u e afeas Pago Pago nei. O le tele o le sapalai o le sua’u fa’aagaaga o i ai e na’o le 90 aso po’o le tolu masina, ona mae’a lea.”

 

“Pe afai e fua fa’atatau le tele ma le vave o le fa’aaoga a le atunu’u o le kesi i aso ta’itasi, ua matauina ai, o le tele o le sapalai fa’aagaaga o i ai e na’o le 50 aso, ona mae’a lea, pe alai e i ai ni fa’afitauli e alia’i mai ma taofia ai malaga a va’a suau’u ua mae’a fa’atulaga.”

 

Ae a tutumu tane i le sapalai o le Kesi, fa’ato’a o’o mai aso fa’aletonu, ona silia lea ma le 90 aso, o lava le sapalai mo le atunu’u.”

 

I lea folasaga sa fa’afofogaina uma e i latou na usufono ma e fo’i na fa’alogologo i le fonotaga lona 104 a Pulega o Uafu ma Taulaga i le Pasefika ma Tonga lea na ma’ea i le aso 20 o Iulai.

 

I le o’o mai o va’a suau’u lea ua i ai le latou Uafu fa’apitoa, o lo’o pito lava i gatai e soso’o ma le Tauese PF Sunia Marine Center, ma ua mafai ona fa’ataoto ai le paipa suau’u tele e pamu atu ai le suau’u.

 

Ua mae’a fo’i ona fa’ailoa mai e lea lava lipoti le tele o ituaiga kesi ma le suau’u o lo’o fa’amautu i tane i Gataivai.

 

Ua maea foi ona pasia e le Kamupani o lo’o pulea le lotoa o tane suau’u le latou agava'a e mafai ai ona latou toe aoina le suau’u masa’a e tusa o le 50bbl i le na’o le 30 minute. E latou te auina atu mea faigaluega fa’apea ma tagata e fa’aaogaina. Ua a’otauina ma sapaia i latou e le OSRO ma le Komisi o le Aia Mama i Hawaii.\