Ads by Google Ads by Google

Tala I Vaifanua


O se va’aiga i le amataga o le Liki Kirikiti a Autalavou a le Pule’aga Samoa Pago Pago i taaloga a le Sone I Sasa’e ma le Sone I Sisifo a tama’ita’i. [ata: Leua Aiono Frost]

O se va’aiga i nisi o matua ma aiga e fa’afeiloa’ia le to’ai i fanua o le ‘au malosi a le American Samoa Beach HandBall Girls U17 Team lea ua maua le avanoa e ulufale atu ai I le Ta’amilosaga a le Youth Olympics i Argentina i le tausaga 2018. [ata: Leua Aiono Frost]

O se va’aiga i le tapua’iga a le Sone I Sasa’e i taaloga a Autalavou a le Pule’aga Samoa Pago Pago. [ata: Leua Aiono Frost]

TA’AMILOSAGA TA’ALOGA AUTALAVOU PULE’AGA SAMOA PAGO PAGO

 

Ua amata fa’agasolo ta’amilosaga kirikiti a autalavou o sone e fa a le Pule’aga Samoa Pago Pago. Peitai sa amata taaloga ta’amilosaga mo autalvou i le aso 17 o Iuli i le ta’amilosaga Volleyball i le Pope Paul ll Gymnasium i Malaeloa.

 

O vaega e fa ua vaevaeina i le Falelima i Sisifo, Falelima i Sasae, Le Fagaloa ma le Vaega Tutotonu. O le afioga Patele Asalemo ua avea ma Fa’atonu o Tupulaga Talavou.

 

Ina ua fesiligia o ia e tusa o lenei fa’amoemoe, e aoga fo’i mo tupulaga e fa’aleleia atili ai latou tomai i ta’aloga ua fa’atauva ai nisi ina ia agava’a mo ta’aloga fa’avaomalo, ae saunoa Patele, “O le fa’amoemoe lona lua lea. Ia lelei latou taleni ta’a’alo fa’atauva ma le tausa’afia, ae tumalele le fa’amoemoe, ia fealofani tupulaga talavou, aua na’o na fia fa’amasani, ae ua mausali lava le masaniga fa’atalavou ma ia le o’o atu o latou olaga talavou i fa’alapotopotoga sese e afua ai ona maua latou olaga i a’afiaga tau soligatulafono.”

 

O taaloga e fa’atautaia e aofia ai le Volleyball, kirikiti, basketball ma le soccer. O lea ua o’o mai i le ta’amilosaga lirikiti ma e tatau ona tofu le ‘au e tasi ma ta’aloga e tolu, peita’i o le ulua’i aso lea na amatalia i le aso Faraile, sa fetaui a tama’ita’i o le Sone i Sasa’e, e afua atu i Lauli’i se’ia pa’ia Aoa ma Tula, na fetaui ma le Sone i sisifo lea e amata i Vailoa ma Leone se’ia o’o i Amanave.

 

Ma na manumalo sasa’e i tamaitai ona faia loa lea o le ta’aloga lona lua mo le itupa o ali’i, o le ‘au a le Sone i Fagaloa, amata mai Aua se’ia pa’ia Fagatogo ma Faga’alu na fetaui ma le ‘au a le Sone Tutotonu lea e aofia ai Nuuuli se’ia o’o i Iliili, Pavaiai, Futiga ma Tafuna atoa.

 

I le ta’aloga a tama’ita’i, na muamua tata le ‘au a Sisifo ma maua ‘ai e 19, tuli loa e le ‘au a Sasa’e, e na’o le tolu pe ae ua sili ‘ai, 20 e malo ai. O le ta’aloga mulimuli o lea aso na muamua ai tata le ‘au a le Fagaloa ma sa maua ‘ai e 52, tulia e le ‘au a le Central e le’i maua ‘ai ae ua atoa le pe e 19, na’o le 42 latou ‘ai na maua.

 

O le vaaiga i le taaloga lea e le o faigofie, aua e oo i le taimi ua vavalalata ai ‘ai o le ta’aloga, ua luluti fo’i ma mafaufauga o le au talutua’a ma le ‘au fa’ate’a aua ua atoa le 40 ‘ai ae toe lua pe o totoe.

 

O au talituaa a le Fagaloa, e na’o le 52 ‘ai o lo’o tulia. Peita’i, e le’i toe umi lava ae taso’o mai pe e lua, ma mae’a ai le ta’aloga i le na’o le 42 ‘ai 19 pe o le Central ae le maua ai e 52 o le Fagaloa.

 

Ua tapena le Komiti o Ta’aloga e fa’aauau ta’amilosaga kirikiti i le aso To’ona’i. O a nisi ta’aloga e totoe o le a fa’ata’utaia lea i aso e le o fa’atautaia ai ta’aloga lea ua oli atu le Samoan Affairs e fa’atautaia mo le Liki Kirikiti a le Moso’oi 2017 lea e tatau ona mae’a i le vaiaso Moso’oi ia Oketopa 2017.

 

O ta’aloga Basketball e fa’atautaia e afua ia Iulai 24, 2017 ma fa’aauau i le aso Tofi o le vaiaso a sau i le Faleta’alo o le Ekalesia i Malaeloa. A mae’a le liki Kirikiti ma Basketball ona soso’o lea ma le ta’amilosaga o le Soccer.

 

TALIU MAI AU TAALOA BEACH HANDBALL AMERIKA SAMOA

 

I le vaiaso ua te’a na toe taliu mai ai i le atunu’u le ‘au ta’a’alo beach handball a tama’ita’i talavou e i lolo ane o le 17 tausaga le matutua ma le latou matati’a ua ausia, ua mafai ona ulufale i le Ta’amilosaga a le Youth Olympics e faia i Argentina i le tausaga fou, mo le fanau e i lalo o le 17 tausaga le matutua. O se taimi muamua fo’i lea ua mafai ai ona maua e se tatou ‘au ta’a’alo talavou se avanoa fa’apenei e ulufale ai i le Youth Olympics.

 

Fa’aalia e le faia’oga ma le Persetene fo’i o le Asosi Handball i Amerika Samoa, Carl Floor, “O le mea na matua fa’ate’ia ai Ausetalia o le malosi o le toe sofa’i atu a le matou ‘au ma ua le toe gafatia ai ona fa’ataututu mai a latou tama’ita’i i le malosi na una’i atu ai le tatou ‘au ma maua ai le 5-4 i le toe taumafaiga mulimuli ma fa’amau ai le manumalo fa’alua a tatou tama’ita’i i a latou fetauiga e sailia tonu ai pe ulufale i le Ta’amilosaga a le Youth Olympics. Fa’afetai lava i le tapua’iga a matua ma aiga, lagona lava le mafanafana o le loto i taimi uma o le mafutaga i na atunu’u.”

 

Na fa’ailoa mai e le tama’ita’i o Stephanie Floor, Kapeteni o le ‘au, “E tele ina fesili mai le ‘au Lusia ia matou, Aisea tou te talie ma fiafia ai ae o lena e faiaina? E tasi lava le tali, ‘E le o uma ai le lalolagi, e tele fo’i isi avanoa e ta’a’alo ai, ae sili lava o le ta’a’alo fiafia e aoga lea i le sipili ta’alo i taimi uma’.”

 

O le tala fiafia a le tama’ita’i o Frances Nautu sa ia faapea, “O lenei malaga mo ta’aloga e mama, sa le manatu e umi fa’apea se malaga, ae o le fiafia latou i ai, aua ua asia nisi malo e le’i fuafua e o’o i ai le olaga talavou. E manaia uma lava malo sa uia i le matamata ma le iloa atu fo’i o latou tagata. Ae oo atu fo’i i le nofoaga e faia ai nei ta’aloga,  e fetaui ma isi talavou i nisi malo e ese mai Amerika ma malo tuaoi a le Pasefika.”

 

“O le mea sili ua tele matou uo, o tama’itai fo’i i latou, ae o le fiafia ia o i latou ua fa’amasani i nisi e mamao mai i lenei itu lalolagi le atunuu e nonofo ai. Ua i ai le fa’amoemoe e toe fetaui tasi lava o Argentina, ae o le mea sili ia o’o i ai le ola ma le malosi i le pule fa’asoa a le Atua.”

 

Sa ia toe fa’aopoopo mai, “O le isi lava lea malosi’aga sa ia te’i matou uma, aua a faia talosaga e feso’ota’i fo’i manatu e fia mafuta mai i matua ma aiga.”

 

Na fa’afetaia e tama’ita’i ta’a’alo latou ta’ita’i sa latou malaga. Peita’i sa taua e  Frances, “Ae o le matou fa’afetai fa’atasi ma le ‘au uso, o le fa’asoa ma le fa’amalosi’au mai a talavou sa tau’avea i matou i taimi uma e fita ai ona sailia se ‘ai e manumalo ai, fa’afetai tele ia Steph Floor ma Fiapa’ipa’i Fanene.”