Ads by Google Ads by Google

Tala I Vaifanua


O se meaalofa na taua’aoina e le Pulega o le Uafu i Tonga mo Amerika Samoa Port Administration o le “Matau La’au tele lava”, ua talia e le faatonu o Uafu ma Malaevaalele a le tatou Malo, Taimalelagi Dr. Claire Poumele. [ata: Leua Aiono Frost]

O le taimi ua taua’aoina ai le meaalofa mo le sui sa ia faia le folasaga mo le Pulega o le Uafu i Tonga CEO Mosese Lavemai. [ata: Leua Aiono Frost]

FOLASAGA MALO TONGA FONOTAGA LONA 104 PULEGA O UAFU

 

O Mosese Lavemai, le CEO o le Pulega o le Uafu i Tonga sa fai ma sui o le aumalaga e to’atolu na masi’i mai mo lenei fonotaga. Sa ia mua’i faafetaia lava le mafai ona fa’atula’ia le auaunaga a le “Talofa Airways” mai Samoa i le va o Tonga ma Amerika Samoa, o lea ua mafai ona vave o’o mai ai i latou. I lana folasaga sa ia fa’ailoa ai, “Pe ana leai lea so’otaga fou lava ma aoga tele mo i matou i Tonga, ua fa’aaogaina mo lenei fonotaga. Fa’afetai fo’i i le vave ona talia e le Fa’atonu ma le Malo o Amerika Samoa ma le Iunaite Setete o lea tautua, ua matua fa’apuupu’u ai le taimi fa’aalu vale i feoa’iga i le ea, ae tuai ai ona fa’ato’ai mai i fauna o Amerika Samoa.”

 

I lana folasaga na fa’atautaia mai i ata fa’asolo sa fa’ailoa ai le auaunaga a le Uafu tele i Tonga lea ua fa’atautaia ai Uafu mo Va’a La’u Oloa, ma le isi mo le Uafu o Va’a La’u Pasese tetele po’o Meli. Ua taumafai fo’i ma le vaega tolu o lea Uafu tele, o le a fa’agaoioia ai le tautuaina o Va’a Fagota tetele ma laiti.

 

E ese mai le tele o va’a loa ua fa’aluaina le aofai ua ulufale ma taula atu i le latou Uafu tele o Queen Salote International Cargo Wharf ua fa’apena fo’i le Uafu o Vuna, lea e taula i ai Meli tetele ma ua fa’aaogaina fo’i luga o lea Uafu mo fefa’ataua’iga o Galuega Taulima ma mea gaosia i Tonga mo le to’atele o tagata maimoa mai fafo, fa’atasi ai ma le fa’aaliga fo’i o Tu ma Agaifanua a Tonga.

 

Ua avea nei le Uafu o Tonga e fetaulai i ai va’a oloa, ma fesuia’i ai uta a va’a. Ona o lea auaunaga, e ao ina matua mautu le saogalemu o tagata faigaluega fa’apea fo’i ma le saogalemu o Oloa ma Uta fela’ua’i i pusa oloa tetele. I masina ta’itasi ua ta’i 12- 17 va’a oloa e taula atu i le Queen Salote Wharf. Ona o lea ua vave tele ai ona mo’omia lava le fa’aleleia atili ma le fa’alauteleina ole tautua a le latou Malo i lea Uafu. E na’o le tasi lava le latou Va’a Pailate mo le  fa’aulufaleina atu o va’a uma i nei Uafu e lua.

 

Ua fa’ateleina le tulaga o fela’ua’iga i le va o Amerika Samoa ma Tonga e ala i oloa fa’atau mai ma fa’atau atu. I va’a e fesuia’i va’a e uta ese mai ai mai Tonga, e ao ina maua’i va’aia ala o tulafono o nei uta pe o talafeagai ma aiaiga o uta oloa mo Amerika Samoa.

 

E ao fo’i ina fa’aleleia atili le tulaga o mea faigaluega i luga o le Uafu mo Fela’ua’iga o Oloa i Tonga, ua fai si leva o ituaiga o lifi ma mea uma o fa’aaogaina e tagata faigaluega, e ono lamatia ai le saogalemu o Oloa ma tagata faigaluega.

 

“A lelei mea faigaluega, ua vave ma saogalemu fo’i le fa’atinoga o tiute e le aufaigaluega fa’atasi ai ma le pulega o le Uafu,” o sana tala ata lea.

 

“Peita’i, i so’o se galuega lava e tau fa’auia atu ni suiga lelei mo le fa’atinoga o tiute i Tonga, e matua mataituina lelei lona tulaga o a’afiaga mo le saogalemu o le gataifale ma le siomaga atoa i tagata ma meaola uma o le sami, aua o le gataifale lava ma le laueleele, o sosia tumau lea e fa’alagolago i ai Tonga, pe afai ae le toe o’o atu ni va’a oloa,” o sana toe upu lena, ona fa’aalia loa lea o le ata fa’asolo i le puna’oa o Tonga e ala i le gataifale ma le tele o i’a tetele o tafola se’ia o’o lava i i’a laiti.

 

O le masina o Aukuso 2017, o le a talimalo ai le Pulega o le Uafu a le Malo Tonga i le fonotaga a le Pacific Maritime Transport Alliance, lea e aofia fa’atasi ai i latou ma Niu Sila.

 

O lenei fonotaga o lo’o auai mai le Pulega o le Uafu a Tonga, o se sui vala’aulia e fa’alogologo i le fonotaga atoa, ma fai ai le latou lea folasaga matagofie mo le silafia a pa’aga uma e to’a 13 ua latou auai fa’atasi nei.

 

TAUVAGA FA’AEVAGELIA FA’ASAMOA

 

O le Tauvaga Fa’avagelia fa’asamoa a le Pulega Tualauta ma Leasina i Sisifo o le Ekalesia Fa’apotopotoga Kerisiano i Amerika Samoa sa fa’atautaia i le Faleta’alo i Kanana Fou, ma sa amata i le taeao.

 

O autalavou EFKAS sa auai i lea aso e aofia ai Faleniu, Aoloau, Pavai’a’i, Ili’ili, ma Vaitogi. Sa auai fa’atasi ai ma latou Faifeau ma o latou faletua. Na amata le fa’atasiga i le i le tatalo na saunia e le Susuga i le Faife’au Toeaina  Tony Hollister ona soso’o ai lea ma le fa’asologa o le polokalama fa’ataoto - amata ia Ili’ili, soso’o ai Aoloau, Pavaia’i, Vaitogi, ma Faleniu.

 

Manaia lava tala ma siva fa’asamoa, aua e toe fa’amanatu ai i le mamalu o le atunu’u, po o fea lava o e aumau ai, e le galo lava lo tatou aganu’u moni o Samoa. O le tele o nisi o tala fa’atino, sa auga i le tupulaga talavou e gasolo i fafo e fia saili le lumana’i, peita’i, e lele lava le toloa ae ma’au mai pea i le vai.

 

E le’i faigofie le fa’amasinoina o nei mea uma sa fa’atauva ai autalavou, na naunau uma lava i le manumalo ma sa iloga foi ona faia e i latou le mea sili i a latou polokalama na tapena mo le aso o Autalavou.

 

“I taumafaiga uma ua fa’atinoina e le fanau talavou, e leai se isi na fa’atemeteme le tapenaga, pe foliga mai e lei lava tapena, fa’afetai i le agaga o le fai mea lelei i so’o se mea e tapena ai le ola fa’aleagaga o le fanau talavou. Fa’afetai i Faife’au ta’itasi ma latou ta’ita’i Autalavou aua, ua iloga nei, e tele le taleni lea e i nei pulega e lua ua mae’a fa’aalia o latou sao,” o tala lea a le ta’ita’i o le sauniga ma le fa’atasiga ina ua mae’a ona maimoaina le polokalama i lona atoaga.

 

O le fa’atulagaga o le manumalo se’ia o’o i le mulimuli, sa fa’aalia ai le fa’aiuga a fa’amasinoga e le susuga le Faife’au Toeaina Tony Hollister: Tulaga muamua ai le autalavou mai Aoluau, tulua Faleniu, tulaga tolu Pavaiai, tulaga fa Vaitogi ae mulimuli le ‘autalavou a Iliili, o le autalavou fo’i lea a le Toeaina.

 

O lana fa’amalo sa ia fa’ailoa ai lona agaga ia nofo fealofani le fanau talavou mai pulega e lua, aua nei latou faia ni amioga e le tusa ma se atali’i o le Atua, ma ia taumafai e usiusita’i i mate i totonu o le li’o o aiga,  ma fa’alogo fo’i i ta’ita’i i totonu o autalavou ma galuega, ae sili ia fa’atonu i le Atua i mea uma.