Ads by Google Ads by Google

Tala I Vaifanua


O se va’aiga i le aufaipese a toeaiina mautofi o le LDS i Pago Pago usuina le latou pese ua avea ma vi’i ia i latou o le latou uso ma o se tama i le to’atele o le ekalesia, Masavai Lameko Lopesi i le aso Lulu i sauniga mo le aiga. [ata: Leua Aiono Frost]

Nisi sa auai i le sauniga mo le aiga o le tama ia Masavai Lameko Lopesi lea sa maliu fa’afuase’i ona o se fa’alavelave tau ta’avale. O lea sauniga sa fa’atautaia i le malumalu LDS i Pago Pago o lana ekalesia sa tautua. [ata: Leua Aiono Frost]

O le taimi na tutula’i ai tuafafine o Lopesi mo le latou pese ma le fanau a Lopesi i gagana e fa - Gagana Niue, Gagana Samoa, Gagana Tonga ma le Gagana Peretania. [ata: Leua Aiono Frost]

TO’ESEA FA’AFUASE’I TAMA O LE AIGA - MASAVAI LAMEKO LOPESI

 

O le loto fa’avauvau ma le lagona o le fa’anoanoa sa tutula’i ai le atali’i o Douglas Lopesi ma molimau i le olaga o si ona tama, ma e o’o mai i le taimi ua lagomau ai nei o ia, e le o iloa e lona mafaufau fa’avasega, le mafuaga ua alu fa’afuase’i ai lona tama, ae tu’ua i latou ma le tina o le aiga.

 

E ui fo’i i nei mau tiga, ae ia fa’ailoa, le toe fo’i o nisi o lona a’iga a’o tatalia pea le taimi e faia ai lenei toe sauniga mo lona tua’a, se tasi na te iloa lelei, le to’atele o tagata e na te faia i ai galuega lelei. O le tama o se tama alofa, ua molimauina e lana fanau lea tulaga. E o’o fo’i i lona aiga, sa matua leiloa e le to’atele, o Lopesi o se tasi na malaga mai i Amerika Samoa ao tolu ona tausaga, nofo ai ma a’oga, lea ua i’u ina amatalia lona aiga ma le tina o Misela Lopesi, ae fa’afetai, e matua Samoa lava lona agaga.

 

“O le tele o mea o le ma’ua aiga e faia lava e Masavai le tonu aua ua masani i mea e fai i aiga Samoa ma le olaga tautua e leai se leo. E fa’amoemoe ia te ia lo’u loto i mea i le lotoifale, ma le aiga potopoto fo’i. Ina ua maliu o ia, sa sili ai ona ou muamua, aua e tele atu lona iloa ma lona malosi e fa’atino ai mea uma o le aiga,” o le molimau lea a si tina.

 

O le upu mai le Fesoasoani muamua o le Uarota i Pago Pago i lana molimau, sa ia fa’ailoa ai, “O lenei tama e matua manino lona fa’amaoni i ona tiute i le galuega. E le tuai i le galuega, e fai mea mafai, e le fai mea ittiti i le galuega ae fai mea ia lava ma totoe, e fiafia fo’i e talia e tagata lona tautina.”

 

E tele na’ua le li’o o lana tautua. E le gata i le aiga Sa Fano i Faga’alu, ae au fo’i lana va’aia i nisi o lona aiga e nonofo solo i le atunu’u.

 

Sa fa’ailoa fo’i e nisi o sui o le Aiga Sa Fano, “E leai ma se tasi o i matou na iloa, o Lopesi o se Niue, seia o’o i le taimi na maliu ai, ma fesilgia le tina o Sela, po’o fea se nu’u na soifua a’e ai Lopesi, ae na fa’ailoa mai, o Lopesi o le Niue moni lava!”

 

Na i ai sui o lona aiga mai Niue, o ona tuafafine sa latou ola fa’atasi mai, ma ua alaala tumau nei i Ausetalia. Na usuina latou pese i le fa’a Niue, ma le fa’atoga ae maise o le fa’asamoa o lea lava pese lotu, e fa’ailoa ai le agaga o Lopesi a’o ola, e fia fia i nei uma lava gagana ma ona tagata ma sa ola ai lava i Samoa nei.

 

Na tula’i Faye Roberts o se tasi sa faigaluega o le Pule fo’i o le Cost-U-Less peita’i ua litaea. O ia fo’i lea sa ia fa’afaigaluegaina Lopesi i le taimi na ulufale atu ai e faigaluega I lea faleoloa tele. “Sa ou va’ai i le tagata e fa’amaoni i le taimi, e fa’amaoni fo’i i le tulaga tau le tupe. E moni lava e saunia e le Atua ala e fa’amanuia ai i so’o se tasi e faia le amiotonu. O lona laufofoga e te le va’aia ai se fa’anoanoa I taimi uma, o le ata lava e fa’afeiloa’ia oe pe a lua fetaui.”

 

AVANOA FAIGALUEGA VA’ATAIMI DHSS & DOH

 

Ua vala’auina so’o se tasi o tama fanau a Amerika Samoa fa’apea ma i latou ua alaala tumau i Amerika Samoa, ina o’o ane e piki ni a latou pepa fa’atumu e talosaga ai mo avanoa faigaluega mo sina vaitaimi i le matagaluega o Alamanuia mo Tagata Lautele ma o le a fa’amalamalama atili fo’i outou pe afai e te fia iloa atili ia ituaiga avanoa ma galuega o le a e fa’atinoa pe afai ae talia lau talosaga e te faigaluega.

 

O le toe aso e tatau ai ona toe fo’i ane ai lau talosaga ua mae’a fa’atumuina, o le aso 14 Iulai, 2017 i le itula e 3:00 i le afiafi.

 

O ituaiga o galuega e fa’atinoa e tagata ua talia, e faia le suesuega i tua i aiga e fa’atatau i lo latou soifua maloloina I gasegase o lo’o togafitia ai sui o aiga, ma vaila’au o lo’o latou fa’aaogaina. O le a fa’amauina fo’i faamaumauga uma e ao i le aiga atoa, po’o i ai nisi o lo’o togafitia i gasegase tau le mafaufau, ma nisi o lo’o i ai mana’oga fa’apitoa.

 

Talosaga mo avanoa, malaga ane i le Ofisa o le Children, Families & Behavioral Health Services i Utulei, tuaoi I le WIC ma le Food Stamps ae ua e taulimaina lou Numera Saogalemu, pepa aso fanau, pepa fa’amaonia ID e le’i uma aso ae i ai ma le ata: Tusi folau, ID o le Ofisa Femalaga’iga. O fa’amaoniga o tipiloma ma fa’ailoga mai a’oga e pei lava ona masani ai i tatou pe a talosaga mo avanoa faigaluega.

 

TAGA TATAU A LE ATUVASA - TACOMA/SEATTLE

 

O le to’atele o Samoa o loo alaala i so’o se malo, e auga o latou mafaufau ma fa’anaunauta’iga ina ia ta ni a latou ‘la’ei samoa moni,’ malu mo tama’ita’i, a’o tatau mo ali’i.

 

Ua o’o atu lea tautua matavela a ali’i tufuga fa’apitoa o le Malofie i Tacoma ma Seattle, Setete o Uosigitone. O se sui o le Samoa News sa molimauina lea fa’atasiga mai ia Iuni 30 - Iulai 2.

 

O le matuaofaiva o Tufuga Su’a Suluape Ala’iva’a Petelo sa o’o atu ma lana au ta fesoasoani e aofia ai lona atali’i Su’a Suluape Peter, Suluape Steve Looney, Suluape Angela, Suluape Keone Nunes ma Suluape Sii Liufau.

 

Sa i ai nisi sa faato’a va’aia lea i le tiga o le au, aua sa faatoa maimoaina lea e i latou le taina o le malofie. Peita’i, o le fa’aiuga o lea vaitau fa’apitoa mo le “Laei Samoa moni, ae o le amataga lea ona autova’a atu le to’atele mo le fa’ailogaina o le Fu’a a Samoa i Seattle, ma sa o’o atu i ai le afioga le Faipule o Amerika Samoa i le Konekeresi, Aumua Amata mo lea fa’amoemoe lelei.

 

O le Tufuga lea ma lana au ta tatau sa matele ina galulue i Kalefonia, peita’i ua fa’asolo ate nei le latou galuega i lea Setete tele aua ua fa’ateleina foi tagata atumotu i lea itu o le Iunaite Setete.

 

O le Cam Tattoo supplies, lea e numera muamua i le tele o latou mamanu e taina ai pea, ma e latou te sapalaia fo’i le tele o mea faaaogaina mo le taina o pe’a, lea sa latou fa’atautaia lenei Fa’aaliga o Pe’a Eseese a le Atuvasa i Tacoma ma Seattle, Uosigitone. E le gata ina latou sapaia lea fa’amoemoe, ae ua latou fa’atupea fo’i le “Tauvaga Tatau 2017” i ona vaega eseese sa fa’amasinoina ai.

 

O le iuga o nei taumafaiga uma, ma sola mai ma le atali’i o le tasi o ali’i tape’a mai Futiga ma Alao, Akiu Sele o Amerika Samoa le fa’ailoga muamua.

 

O fa’ailoga o le tauvaga tatau na saunia fa’apitoa lea e le Tausala Lalelei o Amerika Samoa, Ms Antonina Lilomaiava, ma le MASI. Sa alai atu le tausala mo le taua’aoina o ana fa’ailoga i e na lautogia ai, ma le tama’ita’i Peresetene o le Masi, Fou Imo mo lana fo’i vaega.