Ads by Google Ads by Google

Tala I Vaifanua

lFA’AILOGA TUTOATASI A LE IUNAITE SETETE

 

Na fa’ailogaina le tutoatasi o le Iunaite Setete o Amerika i Amerika Samoa nei i le aso Lua o le vaiaso lenei, ma o le aso malolo mai galuega masani a le malo ma kamupani tua i le teritori.

 

O le to’atele o le atunu’u, sa latou saunia tafaoga fa’aleaiga ma ‘aiga e fa’atasia ai i latou ma e tele lava i BBQ sa fa’atino fa’atasi ai le latou fiafia e so’ofa’atasi ai i lea aso taua.

 

I se maimoaga i le atunu’u, sa va’aia ai le faia lava o galuega o nisi kamupani fau alatele ma auvai, O le galuega i Agagulu ma Atauloma sa va’aia ai le kamupani a le afioga ia Fano Frank Shimasaki o lo ua fa’aaoga le aso malolo e tau le tele ai ta’avale feoa’i i le alatele, e fa’amae’a ai le tele o le ala sima o lo ua aga ane e fausia lelei, ae ua mae’a lelei le apitagalu ona fausia lelei.

 

O le galuega o lo’o fa’atino e le McConnell Dowell i lumafale o le a’oga a Midkiff Elementary ma fa’asolo i le A’oga Maualuga i Leone, ua fa’aauau ona fa’atino, aua e matua tumu lea alatele i le mau omoomo tetele o lo’o lilofia i le sauvai lepa ma au le mailoa ni pu tetele e ‘aveta’avale i le tele o taimi.

 

O nisi o autalavou sa faia latou sailiga tupe i le alatele, ma sa faia latou “Fufuluga Ta’avale” e saili seleni mo poloketi e fa’atupe i a latou ekalesia. O le Autalavou a le EFKAS i Iliili sa lava le latou sailiga i lumafale o le falesa.

 

I le LDS Amanave, sa faia le tatou fa’atasiga i le paka e feagai ma le sami i Amanave lava. Sa fa’atutu malae volleyball, faia kirikiti e fa’aaoga ai polo tenisi.

 

Mai le itu i sasa’e o le motu, sa maua ane ai le amataga o le Mafutaga Fa’aleaiga a le Aiga Sa Tuatoo i Alofau. O le fa’amoemoe o le aiga lea, e amatalia lea i le aso Sa nei, i le latou sauniga lotu fa’apitoa ma fa’asolo ai le polokalama mo le vaiaso atoa a sau.

 

E oo lava i Tula le asiasiga, ua fa’aaogaina e nisi o aiga le aso malolo aupaolo e moa ai le vao ma faia isi galuega fa’amatagofie ai o latou lumafale ma tafafale. A’o nisi ua amata ona fa’amumu le BBQ.

 

I le Manumalo Baptist i Malaeimi, sa fa’atino ai le Liki Basketball mai le masina o Iuni seia o’o mai ia Iulai 4, ma sa faia le tatou BBQ tele e tufaina ai ni faailoga mo ‘au sa tauivi i lea liki a le Paramount Builders.

 

Ua fa’ailoa mai na suipi le ‘au malosi a le “All Whites” ma e tele fa’ailoga sa atofaina mo sui ta’a’alo o lea ‘au, ae maise ai le sui na avea ma tama ta’alo lelei i le liki, Sione Joe. O fa’ailoga sa ia mauaina e aofia ai le ili eletise fou, o le tipoti vaivela eletise, o le ogaumu eletise mo kuka ma le fa’amalu lautele.

 

FANA TAMA’ITA’I SAMOA I FEDERAL WAY WASHINGTON:

 

Ua fa’ailoa mai e tala e fa’ate’ia ai fo’i nisi o matua ma aiga o lo’o alaala fanau i le setete o Uosigitone, ona o se tama’ita’i Samoa, ua le fa’ailoa maia lona suafa ona o suesuega a leoleo o lo’o fa’aauau pea, ua fana e lana uo tama i Federal Way, Uosigitone.

 

O le tama’ita’i e 21 tausaga o le soifua ma e tuga fo’i ona manu’aga, ma ua i ai nei o ia i le Harborview Medical Center i Seattle mo togafitiga, ae lei toe maua mai se tala e tusa o se tulaga o i ai  ia. O lo’o fa’aauau pea  su’esu’ega a Leoleo i lenei mataupu, ae ua fa’ailoa mai, o lo’o malaga mai lenei tama’ita’i mai le tatou teritori, peita’i o lana uo tama, e na’o le 23 tausaga e noto o ia i Federal Way. Ua taofia nei le ali’i lea i le falepuipui i King County i moliga tau fa’ao’olima.

 

2 ALII SAINA: GAOI MAI MASINI TUPE ATM

 

Mai le malo o Samoa, ua fa’ailoa ai le fe’au taua ia i latou uma mai fato e fia ulufale i Samoa, ina ia nofouta e le o fa’avaivai pe fa’aititia le mamafatu o sala e tu’uina atu ia i latou e faia solitulafono.

 

E to’alua ni ali’i mai Saina na asiasi i Samoa, ma le la’ua fuafuaga e late gaoia le tele o tupe mai masini tupe a faletupe ma toe sosola. Peita’i, ua maua ma ua fa’ao’o fo’i i le fa’amasinoga i la’ua nei, ae ua maua fo’i ma le ala ua la’ua gioia ai nei tupe e $70,000.

 

O i la’ua nei o Yang Quigreen ma Zhong Shuiming lea ua mae’a saisaitia nei e leoleo ma ua fa’atulaga le ali’i loia o Alex Su’a e avea ma la’ua loia. Ua talosaga le loia a le Malo Lupematasila ina ia fa’afalepuipuia i la’ua nei mo le 4 ma le ‘afa tausaga, ma ua tu’uina i le finagalo o le susuga le Fa’amasino Fepulea’i Ameperosa Roma mo sana fa’ai’uga.

 

I le finauga a le Loia a le Malo, Lupematasila, sa ia fa’ailoa ai, “O ituaiga soligatulafono nei e ao ina matua fa’amamafa lava le fa’asalaga e tu’uina i ai, aua ua leva ona fafau mai nei solitulafono ma sa ululale mai ma le mautinoa e le faigofie ona maua i meafaigaluega ma le atamai fo’i o i ai i o tatou tagata faigaluega i o tatou atumotu ia ala ua o mai ma sui nei e toto i mafaufau o le fama talavou.

 

Ua matua mana’omia lava fo’i e Lupematasila, ina ia faia le fa’asalaga ia matuia. “Ia matua latou lagona le tiga ua o’o i faletupe nei ua lato se’ia mai ai lea tele o le tupe, ae o ala fo’i ia e alu ai fo’i mafaufau o tupulaga o le atunu’u e faia nei ituaiga o soligatulafono e i latou,” o a Lupematasila lea.