Ads by Google Ads by Google

Tala I Vaifanua

LUA ‘VAN’ MO A’OGA I FALEASAO MA OLOSEGA, MANU’A

 

O le poloketi sa amata fuafua i le lua tausaga ua mavae mo fanau aoga i aoga tulaga muamua a Olosega ma Faleasao i Manu’a ua ma’ea ma ua fa’ao’o le ta’avale Van mo Olosega Elementary i le vaiaso ua te’a, ae o le amataga o Aukuso, e fa’ao’o ai le ta’avale lona lua mo Faleasao Elementary.

 

“O lenei poloketi ua mae’a sainia le maliliega faifa’atasi a le Matagaluega o Fefa’ataua’iga (DOC) ma le Matagaluega o Aoga, ina ia talosagaina le vaega tupe mai le Community Development Block Grant e fa’atupe ai ni ta’avale ‘Van se lua  e fa’aaogaina mo le fela’ua’iga o fanau a’oga ma nisi fo’i galuega e tatau mo aoga nei i le Manu’atele, ona e le to’atele fanau a’oga ma e tau leai foi ni auala e fa’aaoga e i latou,” o se tala lea a le tama’ita’i o Lina Petaia o le DOC.

 

Na talosaga e le DOC lea fa’atupega, ua talia lelei mai, ma o le a fa’aauau lava fo’i ona va’ai toto’a i le fa’aaogaina ma le fa’aleleia atili pea o lea tautua, e toe tali atu ai i le CDBG e tusa o le fa’aaogaina tatau o le alagatupe na toina mai.

 

FALE O PISINISI I LE MAKETI & LATOU TAUTUA

 

I le maketi i Fagatogo ua atoa nei le lua tausaga talu ona tatala ai avanoa e fa’afailele ai pisinisi fou fa’ato’a amata, se’ia o’o ina malolosi ma gafatia ona fa’atautaia mai nofoaga tumau a i latou lava.

 

I lea nofoaga, e lima potu ua mae’a fa’atula’ia ai, ina ia tofu ma se pisinisi e fa’atautaia ai. O se galuega na lelei ona fuafua, ma ua va’aia fo’i fua lelei, peita’i, e le o mautu lelei pea pisinisi o lo’o fa’atautaia ai, ona e le o toatele i latou e agai atu i ai e fa’aaoga latou auaunaga.

 

Mo i latou uma e fa’atautaia mai ia avanoa latou pisinisi e fa’aaoga fua le Initeneti e ala i le WIFI, e i ai le komipiuta ma ona so’otaga i le masini lolomi, le Kesi ma nofoa e fa’aaogaina ae maise o le potu fono e mafai ona e fa’aaogaina mo ni fonotaga.

 

Pisinisi muamua o loo i ai o le “Pacific Wide and Wise” lea e fa’atautaia e le tama’ita’i o Valerie Lei Sam. O lo’o ia aumaia le anoanoa’i o se’evae ma e i ai fo’i lana tautua “Tupe Lafo” o loo ia ofoina mai i lea lava vaega o le Maketi.

 

Pisinisi lona lua o le “Worldwide Corporation” lea o lo’o fa’atautaia e le tama’ita’i o Lilly Hunt. O lo’o ofo mai ai lana tautua i le failaina o lafoga a so’o se tasi ma ua ia ofoina mai foi fautuaga mo so’otaga fa’apisinisi pe afai e mana’omia.

 

Pisinisi lona tolu o le “Shekinah Creation” e fa’atautaia e le tama’ita’i o Eileen Solaita. O lo’o ofoi ai le tele o so’o se ituaiga oloa Samoa o galuega alofilima e fa’afetauia ai au sikaili i so’o se taimi. Ae maise o loo ia lomia ofu mitiafu, ie lavalava ma isi oloa fa’apena e fa’aaogaina ai fa’ailoga a aoga maualuluga ta’itasi i totonu o le atunu’u.

 

Pisinisi lona fa o “Le Hunza Wellness” lea o lo’o ofo mai ai le tautua e fofo le tino, le tua, o vae ma lima ma le tuaua ae maise le ulu pe afai o lo ua fa’alogoina e i tatou le lagona ua tutumu le tino, ma ua vave ai foi ona oso le toto maualuga. Fa’aaoga nei tautua mo le mamalu lautele, e fa’aleleia atili ai lou soifua maloloina. Ua fa’alauiloa o lo’o i ai le pa’u o le totogi o lenei tautua, pe afai o le a e fa’aaogaina lenei vaitau e te o’o ane ai e fofo lou tino.

 

O le avanoa lona lima o lo’o taofia pea e le’i o’o ane i ai le pisinisi ua latou fa’aagaaga e fa’aaogaina.

 

O le totogi o nei potu mo pisinisi, ua fuafua i le $1.25 i le sikuea futu i le masina ma e tusa o le $200 i le masina. E tatala mo pisinisi lea nofoaga mai le 8:00 i le taeao se’ia o’o i le 4:00 i le afiafi i aso faigaluega o vaiaso ta’itasi, peita’i o le Aso To’ona’i ua fa’aaogaina lea pe afai e talosagaina e fia tatala lau pisinisi.

 

PUIPUIA MAI LE FA’AMA’I HIV/AIDS

 

O le HIV/AIDS, STD Board co-chair, le Tama ia Kelemete, ua ia uunaia tagata lautele e oo atu i le Ofisa o le Soifua Maloloina i Faga’alu e fai ai suega mo le fa’ama’i o le HIV/AID ma isi fa’ama’i feusuaiga. O Iuni 27, sa fa’ailoga ai le “National Testing Day”  suesuega fa’apitoa o le AIDS i le Iunaite Setete.

 

I totonu o le atunu’u, sa saunoa ai Patele Kelemete i le Samoa News,  o lea e fa’auauaina pea suega mo lea fa’ama’i aua o se mea o lo o faia i tausaga ta’itasi  i le vaiaso mulimuli o Iuni i tausaga taitasi.

 

O le autu o lenei tausaga: “Test Your Way, Do It Today!” (Su’e lou Ala, Faia loa Nei)!. E tusa ai ma fautuaga ma fa’amatalaga autu tau lea gasegase ma isi fa’ama’i e ao ina puipuia mai ai tagata lautele, e tusa ma le 1.1 miliona tagata o le Iunaite Sitete o loo maua i le fa’ama’i HIV/AIDS, peitai mai le tasi mai le to’afitu o i latou e le’o iloa uiga ma afuaga o lea ma’i.

 

Fa’apea mai Fr. Kelemete, e ui o le fa’amamafa lea o suega ua tuuina i lenei vaiaso, e mafai ona faia suega so o se taimi ao faagasolo lenei tausaga. O ia suega o loo fai fua ma e fa’alauaiteleina. Na fa’aopoopo mai Fr. Kelemete, o le latou matafaioi o le uunaia le auai mai o tagata uma ma faalautele atili ai le silafia e tagata o lea gasegase fita.

 

O le HIV/AIDS, o su’ega o le STD, o se galuega fa’atasi o le matagaluega i le lotoifale o le soifua maloloina.

 

O tusitusiga a le CDC, pe afai o loo e ola ma le HIV, e tatau ona amata togafitiga i se taimi vave . E mafai ona tausia oe i vaila’au mo togafitiga o le HIV ma matua fa’aititia lou avanoa e ono a’afia ai se tasi mai ia te oe.  Afai e te le o a’afia i le HIV, e iai laasaga o lou puipuiga ina ia e le a’afia ai i le lumana’i.

 

$35.4 MILIONA FA’AOPOOPO TEUGATUPE SAMOA N.P.F

 

O se tala fa’afiafialoto mai le Komiti Fa’afoe o le Samoa National Provident Fund po’o le NPF a tagata faigaluega a le Malo o Samoa tutoatasi.

 

O le aofaiga o le tupe ua maua mai i tatou tupe fa’apolopolo ua tula’i mai i le $35.4 miliona ma ua fa’amanino mai e tusa ma le 7.2% o le a fa’aopoopo i teugatupe uma o lo’o i ai i le NPF pe a o’o atu ia Iulai 1, 2017.

 

Na fa’ailoa mai i se tusitusiga mai le komiti fa’afoe o le NPF ua fa’atulaga nei e i latou le pasene o le si’itaga, po’o le tupe fa’asili e 7.2% mo teugatupe uma ua i ai i le SNPF i le taimi nei.