Tala I Vaifanua


O se va’aiga i le ali’i o Alex mai le Sheraton Aggies ua fa’afiafia i latou o e faigaluega i Kamupani Va’a i le teritori. [ata: Leua Aiono Frost]

O se va’aiga i le fiafia fa’atasi o sui mai le Sheraton Aggie Grey Hotel mai Samoa, Suavi Tuilaepa ma le au faipisini Tusi Pasese i Va’alele ma Kamupani Va’a i le tatou nei teritori i le latou fiafia na fia i le faletalimalo o Tradewinds i Tafuna. Tala tusia i Tala i Vaifanua i le lomiga o lenei aso. [ata: Leua Aiono Frost]

O le vasega o tama’ita’i e faigaluega i a latou pisinisi Tusi Pasese mo Femalaga’iga i Va’alele, i le teritori. Ua fiafia aua ua fa’afetaia i latou ma latou galuega e tima’i atu i tagata faimalaga ina ia fa’aaoga le Sheraton Aggies i Vaisigano po’o Satapuala i Samoa, ae tofu nei nofoaga ma le Casino e fa’afiafiaina ai i latou ma toe sailia ai se isi laki. Tala tusia i Tala i Vaifanua i le lomiga o lenei aso. [ata: Leua Aiono Frost]

FA’AFETAIA GALULUE FA’APA’AGA FALETALIMALO SHERATON AGGIE:

 

I le po fiafia na tali atu ai le Pulega ma le aufaigaluega a le Sheraton Aggie’s o Samoa i a latou pa’aga fa’apisinisi i Amerika Samoa ma latou fesoasoani fo’i e fa’auia a latou turisi ma e tafafao i Samoa i le faletalimalo, sa iloga ona fa’afiafiaina i latou na auai.

 

Na mua’i si’itia le taulaga fa’afetai e le Fa’afeagaiga EFKAS i Fagatogo Rev. Iasepi Ulu.

 

“O tautua e so’otaga ai tagata e to’atele, ua fa’ailoa ai uiga alofa o le talimalo lelei, ma ua taumafai ina ia au le auaunaga i mana’oga tupito o tagata o lo’o tu’ua o latou lotoifale, ae masi’i atu ma alaala le tumau ai i faletalimalo. Fa’afetai mo la outou pito la’au tausi, ua si’itia pea le tamaoaiga e ala mai ai, ina ia lauolaola pisinisi, e aoga fo’i mo aiga o e o faigaluega ai, ae maise o tatou malo na lua,” o sana upu pu’upu’u lea, a’o le’i si’itia le fa’afetai.

 

Na tutula’i le alii pule o le itu tau fefa’ataua’iga i le Sheraton Aggies ma ia fa’ailoa ai lona agaga fa’afetai fa’atasia ai i latou uma na pa’au mai mo le fa’amoemoe na latou talimalo ai i sui uma o pisinisi i le teritori aua o loo tele lava le fesoasoani mo i latou e fa’auia atu i Amerika Samoa nei.

 

I lea lava so’otaga ua mafua ai ona latou malaga mai e matua fa’ataua le auaunaga lea ma faafetaia le agalelei aua ua iloga lava i le to’atele o i latou asia Samoa ua alaala i le latou faletalimalo, e o’o lava fo’i i aiga ma tagatanu’u o Amerika ua latou fa’aaogaina le latou foi tautua.

 

“E matou te taumafai atili ina ia fa’amalieina o latou loto pe a o’o atu i latou i Samoa, peita’i o le fa’asinomaga mai la outou tautua, ua mafua ai ona matou maua lea avanoa taua,” o le sana saunoaga lea, Mark Francis, e pu’upu’u ae anoa sa ia folasia ai lona agaga fa’afetai ma ua fa’atasia uma ai i latou o sui na malaga mai, ae maise o le pulega ma le aufaigaluega atoa a le Sheraton Aggies i Samoa i ona faletalimalo e lua, Vaisigano ma Satapuala i Samoa.

 

Sa i ai se ata fa’asolo sa fa’alauiloa fa’apitoa mai ai le matagofie o mea ua mae’a tapena e ala i nofoaga ma lona teuteuina fa’apitoa, ae maise o isi fo’i malaga eseese e fa’amalie atili ai le agaga o le tagata tafao i laufanua ma le gataifale o Samoa.

 

Ua i ai le avanoa e avea ai le tagata tafao ma pa’aga ‘tau totino’ a le Sheraton Aggies, o le totogi o lou avea o se totino fa’apa’aga mo le tagata e to’atasi e WST$120 mo tagata e to’alua e WST$170 ma le aiga atoa e WST$250 na amata mai ona lesitala lea fo’i avanoa ia Iuni 5, 2017. O lea totogi fa’atotino e uma fo’i le aoga pe a maea le tausaga atoa mai le aso na totogia ai. O le aoga, e pa’u ai fo’i le totogi mo potu ma isi tautua uma a le Sheraton Aggies mo oe ma lou aiga, po’o oe ma lau pa’aga.

 

Ua i ai fa’apitoa eseese ua ofoina mo i latou e alaala i le faletalimalo. Ua i ai to’ona’i fa’apitoa mo le aso Sa ma e laulauina mo tagata uma e piki ai le meataumafa e te mana’o i ai i le tele e te gafatia ona laulelei ai. Ua fa’alauiloa e afa le totogi mo mea taumafa a le fanau mai le 4 tausaga se’ia pa’ia le 12 tausaga le matutua.

 

Ua fa’alauiloa mai le matagofie na’ua o le potu tele mo so’o se ituaiga o fonotaga, ma o se potu teuteuina lelei e agava’a mo fonotaga tetele. E o’o lava fo’i i fa’aipoipoga ma fa’atasiga o aiga e to’atele totino, ua mafai on fa’aofi i lea lava potu ua mae’a fa’ameafale mo ia ituaiga o fa’amoemoe.

 

Afai o le a i ai nisi o totino o nei fonotaga e fia nonofo i le faletalimalo lea, e mafai ona pa’u le totogi o potu i le US$135 pe afai e silia i le to’a 10 i latou o le a api i le Sheraton Aggies. Ese atu ai ma le taumafa fua i le malu o le taeao, le totogia le WIFI mo lana Initeneti, 15% toese mai le Lafoga o Faletalimalo, le totogia fo’i le avega o ana ato ma le aumaia o ana atopa’u mai le malaeva’alele ae maise o le WST$50 e maua mo lana ta’aloga i le masini tupe a le Casino e maua ai se isi laki. O lea paketi ua ofoina mai e amata ai ona alaala le tagata asiasi i Samoa ia Setema 30, 2017 se’ia o’o lava ia Mati 31, 2018.

 

O lo’o ua ofoina mai se isi fa’alauiloaga e ala i ata tapu’e fa’asolo, ina ia tu’ufa’atasia uma fa’aipoipoga sa fa’atautaia i lea faletalimalo, ma ua fa’atulaga ai e fa’aalia lea ata i le aso Faraile ma le aso To’ona’i, Oketopa 13 & 14, 2017 ma e le totogia lea tautua, ae mafai ona maimoaina e tagata uma o le a auai i le faletalimalo i lea afiafi, pe o aiga fo’i e fia maimoa, ae le totogia se ulufale. Mo lea fa’amoemoe, e mafai ona maimoaina nisi o fa’aipoipoga i ata fa’aemo i le Facebook www.facebook.com/SheratonSamoaAggieGreysHotel/.

 

Na umi lava le taimi o fiafia fa’atasi le ‘au faipisinisi Tusi Avanoa i Va’alele ma Faletalimalo, le Ofisa o Turisi a Amerika Samoa, ae maise o le vasega fo’i o le au fai faletalimalo a le tatou Malo, sa auai e talia le fa’aaloalo aloa’ia a le Sheraton Aggie Grey Hotel mo i latou uma ona o le fesoasoani ae ua latou iloa fo’i o lo’o loma mai le latou Teuila Week ia Setema, e tatau fo’i lona galulue so’ofa’atasi atu i ai.

 

TUI PUIPUIA MO LE FLU - MANUMALO BAPTIST I LE ASO

 

O le taeao nei, aso Faraile, ua toe fa’aauau ai ona faia tui puipuia o le flu lea o lo’o fa’asolo, i le Manumalo Baptist Academy i Malaeimi.

 

Ua fa’ailoa mai e Bernard Puni o le DOH, “Afai e mae’a tagata uma na gasolo atu mo tui puipuia o le Flu, ona tapunia fo’i lea o le tautua lea e amata tatala mo le lautele i le itula e 8:30 i le taeao o le aso.”

 

Manatua e sili le puipuia nai lo le tau toe togafitia! O nei tui e aoga tele mo le tausaga atoa  e puipuia ai oe mai le flu.

 

“MASI”- FA’AILOGA 25 TAUSAGA SETEMA 2017

 

Ua fuafua le Asosi a le Tausala Lalelei a Amerika Samoa [MASI] ina ia fa’amanatuina fa’atasi le atoaga o le latou 25 tausaga talu ona fa’avae mai le latou Sosaiete ma le filifiliga o le Tausala Lalelei o Amerika Samoa mo lenei tausaga 2017-2018, ia Setema 2017.

 

Ua fa’ailoa mai e le tama’ita’i peresetene o le MASI, Meafou Imo, o lo ua amatalia fuafuaga fa’ataoto a le asosi. Ua fuafua e faia se ata fa’asolo o tausala ta’itasi na tula’i mai lea vaitausaga atoa e 25. Ua vala’aulia fo’i tausala lalelei uma sa tutula’i i le tofi, ma ua fa’aigoaina lea ata - “Toe Tepa Tasi.”

 

O le iuga o lea po iloga, o le a taua’aoina aloa’ia atu ai le “Pale o le Tausala Lalelei o Amerika Samoa,” lea o lo’o umia nei e le tama’ita’i o Antonina Lilomaiava, i le sui o le a filifilia e fa’amasino i lea afiafi a tamali’i. O le a fa’afetaia ai fo’i le auaunaga matavela a Antonina Lilomaiava i lona malo ma ona tagatanu’u e ala i le avea ai ma tausala i le tausaga 2016-17.

 

I le afiafi o le aso Lulu na te’a nei, sa malaga ese atu ai le Tausala Lalelei ma le Peresetene o le MASI mo se vala’aulia e auai fa’apitoa  i le tatalaina o le “Fa’aaliga o Tatau a Samoa” i le setete o Uosigitone. O se ulua’i taimi lea ua faia ai lea fa’aaliga i lea setete ma o lo’o sapaia e le to’atele o tagatanu’u o Samoa o lo’o alaala ai, fa’apea ma isi o lo’o autova’a atu i isi setete uma o le Malo tele.

 

Mo le Tauvaga Tausala Lalelei o Amerika Samoa e to’afa sui tauva ua mae’a fa’ailoa mai lo latou fia auai. Peita’i, e le’i tapunia le avanoa e fa’aulu ai so’o se sui tauva ua ausia tapula’a e pei ona mae’a tamau ai mo tausala tauva. O lea aso patino o le aso 31 Iulai, 2017.

 

Ua fa’alauiloa atu fo’i mo kamupani ma sosaiete uma e fia fa’aulu ni latou tausala lalelei mo lea tauvaga, alofagia fa’autagia mai le aso ua ta’ua i luga. Ua vave fo’i ona fa’amuta le fa’aulu maia o suafa o tausala, ina ia lava ma totoe le taimi e tapena ai i latou e fa’atupea sui mo vaega ta’itasi o le a tauva ai i le tauvaga.

Comment Here