‘TAOFI PITO MAEA O LAU AGANU’U’

O le tausaga tausaga lenei ua tatalaina avanoa mo le lesitalaina o fanau i le polokalama mo le tu’uaga umi lenei o a’oga a le atunuu, ina ia a’oa’oina ai le fanau i nisi o mea e ao ina fa’amautu i o latou olaga, e matua mautinoa ai ua ia malamalama lelei i lana aganu’u e ala lea i mamanu o Elei ma o latou uiga!

Lea ua tapena ai le Amerika Samoa Arts Council i Fagatogo, ina ia toe fa’ailoa ma aoao fanau, mai le 7 tausaga se’ia o’o i le 17 tausaga le matutua, i le aganu’u o lo’o taofiofia pe fa’amau i Mamanu o Elei Samoa moni.

O lenei polokalama mo le taumafanafana mo le fanau e faia lava i tausaga ta’itasi, peita’i, e sailia lava manulauti ina ia fa’aautu i ai le tapenaga mo mataupu e aoaoina i le fanau, o autu fo’i e ao ina manino e matua taofia ai le pito maea  tu ma agaifanua a le atunu’u.

O lea ua mautinoa nei, ua tele ituaiga o elei ona o lea ua la’eia e tagata lautele so’o se ituaiga o mamanu ua tusia ma lomia mai mo fefa’ataua’iga mai Fiti, Tonga, Maori a Niu Sila, mamanu o la’ei mai Hawaii, ma ua tauai ina fefiloi fa’atasi ma Elei Samoa moni.

“O lea o le a a’oa’oina fa’apitoa le fanau i uiga o ata o lo’o ua tusia ma lomia i Elei Samoa moni. E le gata i lea, ae o le a latou taina i Laupapa Elei mo le gasoia lelei ai o Upeti Elei Samoa moni. O le a lomia ai ie ma fa’atau atu pe fa’aalia fo’i i le fa’aiuga o lenei polokalama ma taumafai e fa’aosofia ai le fiafia ma le naunauta’i o le tama ma le teine samoa talavou, ia le mou atu lea agaifanua matagofie a le atunu’u,” o se tala lea mai se tasi o sui o le Art Council e tusa o le polokalama o lo’o loma nei mo le fanau talavou.

E amata le a’oa’oga fa’apitoa mo le taumafanafana ia Iulai 3, ae fa’ai’uina lelei ia Iulai 28, 2017. Peita’i, o le Lesitala e amata ia Iuni 12 se’ia oo ia Iuni 23.

Ua le taliaina se lesitala mo le fanau e telefoni mai, peita’i ua mana’omia ona fa’aulu mai le suafa o lou alo i lou oo ane i le latou Ofisa ma totogia fo’i le $5 mo lona ulufale i lea polokalama taua mo le tu’uaga lenei o a’oga.

E le gata ai ina a’oa’oina le Elei ma le Taina o Mamanu Samoa i Upeti e tapena ai Elei, ae o le tele o isi fo’i galuega alofilima a le atunu’u, ua a’oa’oina ai le fanau ina ia fa’amautu atili lo latou iloa ma le fiafia e silafia nan gaosia nei oloa Samoa.

FA’AU’U FANAU AMERIKA SAMOA - ARGOSY UNIVERSITY HAWAII

Ona o lenei vaitau o lo’o fa’asolo atu pea maimoaga ma le patipatia fo’i e le mamalu o le atunu’u o taumafaiga a latou pelega, o fanau o lo’o lu’ia o latou soifua talavou i le sailliga o le atamai lautele i kosi eseese ua ofoina mai i A’oga Maualuluga, Kolisi ma Iunivesite, o lea ua va’aia ai nisi o alo o le atunu’u, ua fa’au’u mai le Iunivesite a le Argosy i Hawaii, ae sa a’oa’oina e faiaoga i Amerika Samoa i le potu a’oga i le Pago Plaza ma le Tradewinds Hotel i Naumati Tafuna.

Na fesiligia le malaga mamao atu o fanau i fafo mo lea fa’amoemoe, peitai ua fa’ailoa mai e le susuga Dr. Toafa Vaiaga’e, o se tasi o ta’ita’i fo’i o lea Iunivesite i le lala i le teritori, ma ia fa’ailoa ai, “O le vaega lea o i latou ua maua le avanoa lelei e malaga atu ai fafo, ae ua mae’a fo’i latou kosi sa tau’avea. Ua le mafai fo’i ona taofia i latou mai se avanoa lelei e malaga atu ai, ina ia savavali e talia o latou fa’ailoga maualuluga i Hawaii, ma o se fiafiaga fo’i lea i le matou aufaigaluega, pe a va’aia, o lo’o fiafia alo talavou o le atunu’u e fa’aauau a’oa’oga, ma talia o latou fa’ailoga sa tautiga ai.”

Mai ata sa fa’auia mai e i latou na fa’au’u, ua iloga ai fo’i le matagofie o le polokalama fa’apitoa o le fa’au’uga sa auai atu ai i latou, ma ua ese fo’i lagona o i latou ina ua ese fo’i sui o latou aiga ua fa’atasia ma i latou i le tatou setete tuaoi, ma ua fa’ailoa mai e i latou, “Ua matou fiafia aua na matou fuafua faatasi e o mai i Hawaii e talia ai matou fa’ailoga. Ua uma na talia fa’ailoga AA i le Kolisi Tu’ufa’atasi o Amerika Samoa, ae o lea ua oo mai i matou fa’ailoga nei, ua manana’o e talia i se isi nofoaga e ese mai le tatou atunu’u, e fa’aosofia ai fo’i lagona e fa’aauau atu pea le taumafai mo isi fa’ailoga il usa atu, pe a aula i le ola ma le malosi mai le Atua.” O se tala lea a le tama’ita’i fa’au’u, May Masina Katitar - Thompson mai Pago Pago, Falealili ma Afonotele.

E tusa ai ma se fa’apupulaga a Dr. Vaiaga’e, sa ia fa’ailoa ai, “Sa mafai fo’i ona faia se fa’ai’uga a i latou ua maea latou kosi ina ia tatalia le matou fa’au’uga lea ua fa’atulaga mo Setema 2017. Peita’i, o le faitalia lava e i le tama ma le teine fa’au’u, ua mae’a latou kosi ma ua agava’a mo le fa’alauiloaga ua maua tusi pasi maualuluga, ona fiafia lea o nisi o i latou e malaga atu i fafo e tofo fo’i i le suamalie o le fa’ailoa mamao ese atu mai o tatou eleele o latou taumafaiga.”

“Peita’i, o le to’atele o le au fa’au’u, lea ua naunau e latou te tatalaina se isi matati’a fou i le amataga o galuega a’os’o a le Iunivesite o le Argosy i o tatou laufanua nei. Ona ua fuafua le fale ua mae’a osi feagaiga ma le Argosy e tatala ai matou Ofisa uma i le latou fogafale muamua, o lea ua taofiofi ai le avanoa matagofie lena, e mae’a tatala Ofisa autu i lea fale fou, ma fa’ataunu’u ai loa le fa’au’uga tele i le Gov. Rex Lee Auditorium, Utulei, ia Setema o lenei tausaga.”

O le fale fou o loo fausia nei i talaatu o le CostULess i Tafuna, lea ua mae’a fa’atulaga mo le Iunivesite o Argosy i lona fogafale muamua, ae o le fogafale 2 e pule ai lava le aiga o Halecks ma latou pisinisi po’o a Ofisa o le a lisia i ai. O le fale atoa, e le o pulea e le Argosy University, o lo’o pulea lava e le susuga Dave Haleck.

Ua fa’ailoa mai, o le tele o latou potu a’oga o le fa’amautu i lea falefou,fa’atasi ai ma latou Ofisa Autu uma, ae o le Laboratory ma se isi potu a’oga e tasi o le a tumau pea lea i le Pago Plaza.

O le aofa’i o le au faau’u ua fuafua atu e taua’aoina latou fa’ailoga i lea fa’au’uga tele, pe tusa o le 65 o i latou, e amata atu i le AA, BA, BS ma MA. Ua faailoa mai fo’i e Dr. Vaiaga’e, “O nei AA, ua na’o ni tagata matutua o lo’o ua leva ona faigaluega e tau sailia tusi pasi peita’i e faigata ona maua avanoa e a’o’oga ai ona e leai ni vasega e ofoina mai i itula afiafi i le tatou Kolisi Tu’ufaatasi. Peita’i, o fanau talavou uma fa’ato’a pasi mai High Schools uma lava finei, e fa’amalosia lava e i matou, ina ia o atu e tau’avea muamua kosi mo latou ASc ma AA, fa’ato’a ulufale mai ai mo ni fa’ailoga maualuluga ia i matou. O le afuaga lea e matou te le faia ai ni fa’apupulaga tau kosi tau’avea i a’oga maualuluga, ae fa’atali lava se’ia o’o ma maea mai taumafaiga a le fanau mai le tatou Kolisi Tuufa’atasi.”

Pe afai e tusa ai ma le Silisiliese ma ana fa’amanuiaga, ua tamau le aso e tatalaina aloaia ai le latou Ofisa fou ia Setema 27, 2017; peita’i, o le latou fa’au’uga ua fa’atulaga e faia lea i le aso 29 Setema, 2017 i le Lee Auditorium i Utulei.