Ads by Google Ads by Google

Tala I Vaifanua


O se va’aiga i le la’uina ese mai o u’amea o le va’a fagota lea sa pa’ulia i le motu o Rose Atoll i le tausaga 1993. [ata: Leua Aiono Frost]

O le tama’ita’i na ia maua le tulaga “Togisilia” i le vasega fa’aiuaso a le tatou Kolisi Tu’ufa’atasi i Malaeimi i le fa’au’uga o le masina o Me, 2017. Ms Vaimalu Vaiau mai Aunuu ma Alofau. [ata: Leua Aiono Frost]

O se va’aiga i le alii fitafita Amerika Samoa lea ua fa’au’u mai ana AIT mo le avea ai ma Military Police mai Fort Leonard Wood i Missouri. [ata: foa’i]

FOLASAGA A BRIAN PECK - ROSE ATOLL

 

I le aso na atofa mo folasaga o le Aua Transect po’o le vaega ua nofo va’ava’aia o le a’au i Aua talu mai le tausaga 1917, na i ai isi folasaga fa’aopoopo sa tapena e isi saeanisi.

 

O Brian Peck le tasi o ia ali’i suesue fa’apitoa mo le motu tu’ufua o Muliava po’o le Rose Atoll. O ia o se saeanisi i le itu o le Gataifale Fa’asao o Amerika Samoa - NMSAS.

 

Sa ia faailoa l aotelega e 200 o ituaiga i’a eseese, ua leai se toe fa’afituali o lo’o alia’i i lea motu, e leai fo’i ni ala e mafai ona o’o atu i ai ni meaola e ono lamatia ai le ola fa’anatura o manu felelei o lo’o avea lea motu ma mea e malolo i ai.

 

Talu mai le va’a fagota na pa’ulia ma le toe mafai ona ave’esea mai i le tausaga 1993, ua le toe i ai se isi fa’afitauli fa’apena o a’afia ai lea motu. E le maua ai se vai se’i vagana le timuga.

 

O le tele o meaola e tu’ufua ma soifua a’e i lea motu o Laumei. Peita’i, afai e fofoa laumei ma amata  ona ola a’e ua mafai fo’i ona fe’ausi, e aga’i i le Atu Fiti. Ola ai iina ma toe taliu mai pe a oo ina matutua ma lapopo’a o latou tino. O lea faiga ua mafai ona fa’amaonia ona ua mae’a makaina uma laumei e ola a’e i le motu ma e maua a’e lava i Fiti, ona tu’u ai lava lea e ola ola lelei i Fiti, peita’i, e toe maua a’e ua toe o’o mai fo’i i Rose Rose i le toe tino lapopo’a a’e.

 

I le afa o Victor sa le a’afia tele ai Tutuila ma Manu’a, ae na matua afaina ai lava meaola i le motu o Rose.  O le tino o lea va’a fagota, na i’u lava ina o atu nisi o inisinia fa’apitoa ma vaevaeina lea tino o lea va’a, ma toe uta ese mai i lea motu tu’ufua, ona o lo’o i ai sosia o le gataifale e ao ina fa’asaoina lelei, e pei o ‘amu, a’au ma le tele o nei i’a eseese o lo’o ola ai, fa’apea ma manufelelei o avea motu nei e lua ma latou ofaga.

 

O nei meaola uma o manufelelei, ma sa pepe nisi o nei manu, peita’i, e pei lava o meaola uma, ua latou iloa vaitau leaga ma e matele ina toe fa’atuputeleina i latou i nisi atumotu ma toe agai atu lava fo’i i Rose Atoll.

 

I le tamia nei, ua toe mata’ina fo’i lea fa’asao, o i’a ua fa’ateleina lava, ma o le ‘amu ma le a’au, ua tumau le matagofie ma le olaola lelei. Emeli a Brian Peck: brian_peck@fus.gov.

 

TOGISILIA FA’AI’UASO 2017 A LE KOLISI TUUFAATASI

 

O le tama’ita’i na avea le vasega fa’aiuaso o le Fa’au’uga Spring ASCC o ia lea o Vaimalu Vaia’u o Aunu’u. Ma o ona matua le Faipule Kitara Vaiau ma le faletua o Etevise Vaiau mai Aunu’u ma Alofau.

 

Ua fa’ailoa mai e Vaimalu, e lua ana kosi na tau’avea i lenei tausaga atoa. I le mae’a ai o le taumafanafana na te’a sa mae’a ai lona fa’ailoga o le Political Science, ae o le isi afa tausaga na saili ai lona fa’ailoga Pre Law, lea ua mae’a lelei  ma ua fa’au’u mai ai i le Kolisi. I le tausaga ua mavae na avea ai ma Intern i le Ofisa i Uosigitone DC i le NPO Fa’alapotopotoga ua igoa o le OCA. O i latou ia e vaaia toto’a a’afiaga e aotelega i motu o Asia ma le Vasa Pasefika.

 

I lenei fo’i tu’uaga umi o le a’oga po’o le tau mafanafana, o le a galue i le Ofisa o le Sui i le Konekeresi, Aumua Amata i Uosigitone DC fo’i, ae faa’autu i galuega fa’a-Ta’ita’i po’o le Leadership Foundation o se tasi fo’i o fa’alapotopotoga e gafa ma malo Asia ma le Pasefika.

 

O lenei tama’ita’i na amata mai ana a’oa’oga i le Matafao Elementary ma fa’amae’a lelei ai i le vasega 8. Na oo lea i le a’oga maualuga i Fagaitua High ma sa ia mauaina le avanoa e malaga ai fa’alua i le Junior Statemen Program ma o lona avanoa muamua a’o vasega 10 na malaga ai i Stanford University, ao le avanoa lona lua ina ua vasega 11 na malaga ai i le sikolasipi mo le avanoa e faigaluega ai i le Ofisa i le Konekeresi o Faleomavaega Eni Hunkin i na tausaga.

 

PFC SAUA, KEVING FA’AVALELOI

 

O le taimi nei ua mae’a a’oa’oga BCT ma AIT a se tasi o fitafita Samoa, le susuga PFC Saua, Kevin Fa’avaleloi mai le afio’aga o Nuuuli.

 

O ia lea o se alo e fa’asino ia Saua Losivale Saua ma Sese Bosnanzky Papali’itele Saua o Nuuuli lava. O le tausaga 2014 na fa’au’u mai ai o ia mai le aoga maualuga a Tafuna, maea fo’i ana a’oa’oga i le Kolisi i le 2016.

 

O ia lenei ua na’o ia lava le Samoa lana kosi sa tau’avea i le militeri Military Police, 31B ma ua fa’ai’u ma le manuia mai lana a’oa’oga fa’apitoa a le AIT i lea kosi i le vaiaso lona lua o Me, 2017. Na a’oa’oina fa’apitoa o ia i Fort Leonard Wood i Missouri State.

 

O lo’o ua momoli tele mai ona alofa’aga i si ona aiga atoa ae maise nai ona matua pele i le afio’aga o Nuuuli, ae maise o lana fa’amalo tele i le Auva’a o le Low Rider mo le 3XWinner i le Fa’agatama i le Tai 2017 Sisigafu’a a Amerika Samoa.

 

“Avea lava outou ma fa’amalosi’au i lenei fo’i taumafaiga, a maua lava se taimi e oo atu ai i laufanua o si tatou atunu’u, fa’amoemoe o le a avea ma se tasi o outou uso i le auva’a a le Manulele Tausala!” O sana fa’amatalaga lea sa fa’auia mai i le mesenger a le Facebook. Ia manuia foi ou faiva o se Leoleo a le Militeri.