Tala I Vaifanua


O se va’aiga i le potu o lo’o fa’atonutonu uma atu ai gaoioiga o afi tetele eletise a le ASPA i Satala. [ata: Leua Aiono Frost]

O se va’aiga i le isi vaega o le foai a le Tina Drabble Junior Golfer’s Foundation sa fa’ao’o ane i le American Samoa Junior Golfer’s Association i le aso Gafua o lenei vaiaso. O le isi vaega o lea foai o le siaki e $3,000. [ata: Leua Aiono Frost]

O se vaaiga i le tama’ita’i o Florina ma Nancy Kupa ua latou fiafia fa’atasi ma se tasi o tama’itai faigaluega i le ASPA i Satala ananafi. [ata: Leua Aiono Frost]

TATALA ALOA’IA NOFOAGA AFI TETELE A LE ASPA I SATALA

 

Ua mae’a le galuega tele sa feagai ai ma le ASPA i le toe fa’atuina lea o se nofoaga ua sili ona tumau mo latou afi tetele sa mua’i fa’aleagaina i le Galulolo tele o le tausaga 2009.

 

O le poloketi fou i Satala e $56 miliona, fa’atupeina mai vaega e tolu:FEMA $36.milliona, Inisiua o le Nofoaga Tuai ua fa’atama’ia e $17 miliona, ma le $2.5 miliona mai le ASPA.

 

I se tala o le galuega na saunoa ai le Matua ia Utu Abe Malae, “O lenei galuega ua fausia e inisinia o fausaga fa’aonaponei ua mafai ona fa’ataututuina luiga fa’anatura. Ua fausia ina ia fealofani lelei ma le tatou siosiomaga i ona ala eseese e ao ina sopotuaoia ai le nofo saogalemu ma le soifua sologa lelei o tagata o lo’o alaala tuaoi mai i lenei nofoaga.”

 

“Ua fausia i le sima ina ia mautu lelei ma le a’afia tele i lologa, ua fausia i u’amea ina ia le lafotuina i lalo i mafui’e, ua fa’auaeaina i ituaiga uaea eletise fou ina ia anagata i so’o se ituaiga tau e ono lamatia ai lo tatou saogalemu lautele ma fa’atutupu ai mu i le nofoaga, ua fausia fo’i ise fausaga e le anagofie i le pisisami aua o lo’o lumafale lava i le tatou alamoana.”

 

Mulimuli lava i lana saunoaga, “ua fausia e o tatou tama fanau, ina ia mautinoa, ua a’oa’oina i latou i fausaga mautu ma le anagata ina ia fa’asoa atu i o tatou aiga ma le tatou malo lea tomai, ma mautu atili ai le fa’avae o tatou atunu’u ma aiga lautele, i fausaga o tatou falenofo.”

 

“O le tagata na ia fa’aeletisea lenei galuega, o i latou ua agave’a i so’o se ituaiga o fausaga ua mae’a fa’atulafonoina e le FEMA ma le Malo tele, o le Inisinia sa ia pasia lenei nofoaga ua umia tusi pasi o fausaga e le pala gofio pe fa’aleagaina, ua fausia ina ia matua leai se so’ona malomaloa o afi moli ua fa’atuuina e valu, ua le toe i ai fo’i se asu pouliuli e toe aga’i mai i fafo i ona alaasu, aua ua fa’atautaia galuega uma ia fealofani ma le siomaga mama ma le lelei mo tagata soifua ma alaala latalata mai i le nofoaga.”

 

“O i latou na fausia, ua galulue fa’atasi ma o tatou tama fanau, le faipa’aga ua galulue fa’atasi ai nei kamupani a le Louis Berger Group Inc. ma le tatou Kamupani a le Paramount Builders a le susuga Papali’itele Lauli’i Alofa. Fa’afetai i lea so’otaga ua fa’auia atu ai fo’i tomai e sili ona mo’omia e o tatou tagata, aua fausaga o galuega o lumanai ai mo le tatou malo.”

 

Na amata mai lenei galuega e le faigamalo ua tuana’i Togiola Tulafono ma ua oo mai ua fa’amae’aina i lenei faigamalo Kovana Lolo M. Moliga. Fa’afetai i ta’ita’i sa manatu ia fatufatu mea lelei mo le atunu’u.

 

O le lauga a le sui a le Louis Berger sa ia fa’afetaia ai le agaga o tama fanau a Samoa e galulue punoua’i. O se avanoa lelei fo’i mo i latou ua latou iloa lelei ai lo tatou atunu’u ma o tatou tagata ma lo latou agaga alofa ma le galulue malosi.

 

Saunoa le taitai fono o le Komiti Fa’afoe a le ASPA, Fonoti Perelini, e faapea, “E le o se’e ese le va’a o lenei Komiti fa’afoe, o lo’o tatou o lava fa’atasi ma le Pulega o le tatou Malo, ina ia fausia galuega lelei ma le anagata mo le lumana’i o le atunu’u.”

 

O le fa’afetai a le afioga le Kovana Lolo Moliga, ia i latou uma sa faafoeina lenei galuega, ae maise tama fanau a le atunu’u sa galulue fa’atasi ma Louis Berger. Sa ia fa’afetaia fo’i le Komiti Fa’afoe.

 

O le lipine na o’otia lea e le faletua o Cynthia moliga, e tatala aloaia ai le galuega tele.

 

FAIMEAALOFA “TINA DRABBLE’S JR GOLFERS FOUNDATION”

 

Ona ua tulata i le taimi e malaga ai i fafo le aumalaga a le Junior Golfers Association i San Diego, mo le ta’amilosaga o le Galaway Jr Golfer’s World Program, lea ua taumafai ai le Junior Golfer’s Association, e saili tupe mo lea fa’amoemoe.

 

O le meaalofa foi ua taua’aoina e le Tina Drabble Junior Golfer Foundation, o le tinoitupe e $3,000 fa’apea ma mea ta’alo mo le fanau talavou e fa’aaogaina i a latou lesona ma ta’aloga Tapolo. “O lenei foa’i, e faia ma le agaga atoa, ina ia aoga le ola tausinio o le tama’ita’i o Tina Drabble i lea ta’aloga, i le olaga o se isi tamaititi po’o se teineititi o lona malo, e fa’aleleia atili ai fo’i lona taumafai i lea ta’aloga,” o se tala lea a le tina o Tina Drabble, Chande Ta’alolo Drabble, le peresetene o le Tina Drabble Junior Golfer’s Foundation.

 

Na talia lea meaalofa ma le agaga fa’afetai tele, e le to’atolu o sui iloga o le Junior Golfers Association, John Mitchell, Peter Young ma Alofia Afalava, fa’atasi ai ma le vasega o fanauiti ua agatonu i ai le foa’i, o i latou uma o sui totoino o le Junior Golfers Association a Amerika Samoa.

 

O le afiafi o le aso Gafua na te’a nei sa fa’atino ai lea foa’i, ma aso To’ona’i, a taeao lea, Me 26, e faia ai le Ta’amilosaga Tapolo i le Malae Tapolo i Iliili ina ia saili tupe ai le Sosaiete mo le aumalaga.

 

E to’alima sui talavou tapolo o le a malaga fa’atasi ma latou fa’atonu i lenei aumalaga ia Iuni 2017. O latou nei: Kale Satele, 5 tausaga; Kenai 10 tausaga; Emily Chen 10 tausaga; Reagan Duffy 10 tausaga; DeAngelo Yamson 12 tausaga ma le sui talavou mai Samoa e to’atasi o Niko Fiu 13 tausaga le matua. E malaga fa’atasi i latou ma Faia’oga e to’alua.

 

“I tausaga ua tea, sa fa’ailoa mai, e matua iloga ai lava le taumafaiga a alo talavou o Amerika Samoa i lenei lava ta’amilosaga tapolo a le fanau talavou. O tatou sui na iloga ona maoa’e latou taumafaiga e aofia ai Angie Langkilde, Tina Drabble, Willie Teleso, Frankie Lefiti, Ike Scanlan ma John Mitchell. O nisi ua avea ma Fa’atonu o le Tapolo i nisi o malae tapolo tetele o Amerika, ae na amata uma atu lava i lenei polokalama ma sa fai ma sui o lenei ituaiga o aumalaga tapolo a tamaiti talavou i San Diego,” se tala fiafia lea a le susuga le Faiaoga o le ‘au Tapolo a le Junior Golfers John Mitchell.

 

“O lenei tausinioga, ua avea pea ma ala e manatua ai alo sa tauva ma manumalo o le tatou atunu’u, e ui ina le to’atele i latou e malaga, ae fa’afetaia lava le susuga Fuga Tolani Teleso mo lona sao i lea fo’i fa’agatama ua mafai ai lava ona maua se avanoa mo Amerika Samoa e avatu ai ni tatou alo e tausinio i lenei ta’amilosaga tapolo mo fanau talavou,” o se tala lea a le ali’i o Peter Young.

 

I le au malaga lenei o lo’o i ai le tamaitititi mai Samoa o lo’o malaga ai. Sa i ai fo’i nisi tama’ita’i e to’alua mai Samoa na malaga i le au tapolo i le tausaga ua te’a ma ua fa’ailoa mai, ua tofu nei ma sikolasipi i le tapolo ma ua a’o’oga ai nei i Amerika i lenei tausaga.

 

“O avanoa fa’apenei e fa’aaoga tatau lava e alo mai Samoa, aua ua naunau i latou ina ia ulufale atu i le Iunaite Setete ma a’o’oga ai loa. Peita’i o tatou fanau, e matele ina fiafia lava i latou i le Football ma isi ta’aloga. E leiloa foi i lenei alo e malaga ma i matou, tauau fo’i e maua sona avanoa fa’apena,” o se tala fiafia lea a Mitchell.

 

E ese mai lenei meaalofa mo le tatou AS Junior Golfer’s Association, ua foa’i fo’i le Tina Drabble Junior Golfer’s Foundation i le Junior Golfer’s Association a Samoa, ma ua fa’ailoa mai e le tama’ita’i Peresetene o le TDJGF, “O lo’o ua i ai lava le matou fa’amoemoe maualiuga, e i ai se taimi lata mai e mafai ona faia ai se ta’amilosaga tapolo a le fanau talavou a Samoa na lua, ma fili fa’apitoa ai loa ni sui e malaga atu i San Diego i tausaga ta’itasi mo le ta’amilosaga iloga lea a le lalolagi atoa.”

 

O lo ua fa’ailoa mai, e tusa ma le ta’ito’a 40 - 60 tamaiti e mafai ona a’oa’oina i le tapolo i le tausaga e tasi, peita’i e tatau ona fa’aulu ma lesitala o latou suafa i le polokalama tapolo lea i le masina o Setema i tausaga ta’itasi.

Comment Here